Mu Rwanda hagiye kubakwa ikigo kivura indwara z’umutima mu bana

Yanditswe na Ferdinand Maniraguha
Kuya 21 Nyakanga 2018 saa 09:24
Yasuwe :
0 0

Umuryango wo muri Israel udaharanira inyungu, Save a Child’s Heart (SACH) ufatanyije na Minisiteri y’ubuzima mu Rwanda, bagiye gushyiraho Ikigo cyihariye kizajya gikurikirana indwara z’umutima mu bana.

Byatangajwe kuri uyu wa Gatanu mu kiganiro n’abanyamakuru, ubwo inzobere z’abaganga baturutse mu muryango SACH zazaga gusuzuma indwara z’umutima z’abana mu bitaro bya Kaminuza bya Kigali (CHUK).

Uyu muryango urasuzuma abana 70, muri bo hazatoranywamo 20 bafite ibibazo bikomeye bajye kubagwa muri Israel ku buntu.

Perezida wa SACH, Haim Taib, yavuze ko mu rwego rwo gukemura ikibazo cy’ubuvuzi bw’indwara z’umutima mu buryo burambye, bateganya kubaka Ikigo cyihariye kizajya kivura abana.

Yagize ati “Naje kubona ko 50 % by’abana muri Afurika bafite hagati y’imyaka 0-5 bapfuye kubera indwara z’umutima. Kubera ko nzi ko abana ari bo ejo hazaza h’igihugu, byatumye mfata umwanzuro wo kubitaho”.

Yakomeje agira ati “Ndaza kwicarana na Minisitiri turebe gahunda zizakurikiraho uko twafasha ibi bitaro, uko twazana ibikoresho. Intego yanjye ni ukubaka ibitaro bishya by’abana kandi nkeka ko hamwe na Minisitiri tuzabishyiramo imbaraga bigakorwa”.

Biteganyijwe ko nyuma yo kubaga abana bazaba boherejwe muri Israel, ari bwo bazatangira kohereza mu Rwanda imashini n’ibindi bikoresho bizakenerwa kugira ngo icyo kigo gikore.

Minisitiri w’ubuzima, Dr Diane Gashumba, yavuze ko buri umwaka u Rwanda rukoresha miliyoni zisaga 500 rwohereza hanze abantu bafite indwara zitandukanye ziganjemo izitandura harimo n’iz’umutima.

Yavuze ko kuba SACH yatoranyije gufasha abana b’abanyarwanda ari ibyo gushimwa.

Yagize ati “Ku bwa Guverinoma y’u Rwanda ndabashimiye no kubw’ababyeyi bafite abana bari gusuzumwa. Ndanabashimira no kuba mwaratekereje ibirenze ibi, mugahitamo gufasha abaganga bacu, ni uburyo bwiza bwo gutuma uyu mushinga n’ ikigo mwitegura gushinga mu Rwanda biramba.”

Umuyobozi Nshingwabikorwa wa SACH, Simon Fisher, yavuze ko mu myaka itanu icyo kigo kizaba gikora neza.

Yongeyeho ko bazahugura abaganga b’abanyarwanda kugira ngo bagire ubumenyi bubabashisha kuvura indwara z’umutima zajyaga kuvurirwa hanze.

Ati “Nizera ko mu myaka itanu hano i Kigali hazaba hari ikigo kivura indwara z’umutima mu bana gikorwamo n’abaganga b’abanyarwanda. Sinakwizeza ko uburwayi bukomeye cyane buzaba buhavurirwa ariko nibura ubwinshi.”

Mukanyarwaya Jacqueline yabyaye gatatu abana be bapfa bataramara amezi atatu. Uwa Kane ahetse, agiye kuzuza umwaka ariko igihe kinini akimaze mu bitaro kubera indwara y’umutima.

Umwana wa Mukanyarwaya ni umwe mu batoranyijwe kujya kubagwa muri Israel, nyuma y’uko avurijwe mu bitaro bitandukanye hano mu Rwanda nka Kibagabaga, Kanombe n’ahandi bikananirana.

Uyu mubyeyi avuga ko yabyishimiye kuko umwana yari amaze kumuzengurukana henshi byarananiranye.

Yagize ati “Umwana yavutse nta kibazo mbona ari munini ariko ngiye gukingiza urukingo rw’amezi atatu n’igice basanga aho kwiyongera asubira inyuma akagira ikibazo cyo guhitwa no gukorora. Mpera ubwo ndatangira ndamuvuza biranga”.

Ubusanzwe habaho indwara z’umutima zivukanwa n’izo umuntu arwara yaravutse. Abana benshi bakunze kuzivukana.

Dr Rusingiza Emmanuel muganga w’indwara z’umutima mu bana kuri CHUK, avuga ko bimwe mu bimenyetso by’indwara z’umutima ku mwana ukivuka harimo kugira uruhu rusa n’ubururu, guhumeka vuba vuba, kugira ibyuya yonka, kunanirwa vuba mu gihe cyo konka n’ibindi.

Minisiteri y’ubuzima ivuga ko mu Rwanda hari abarwayi bagera ku bihumbi 30 b’indwara z’umutima, muri bo abana bagera ku gihumbi.

Umuryango SACH washinzwe mu 1995. Umaze kuvura indwara z’umutima abana 5000 bo mu bihugu 57, wanahuguye abaganga basaga 1200.

Minisitiri Diane Gashumba na Haim Taib mu kiganiro n'abanyamakuru
Minisitiri w'ubuzima Dr Diane Gashumba yashimiye SACH igiye gufasha kuvura indwara z'umutima mu bana
Haim yavuze ko umubare munini w'abana bato bapfa muri Afurika bicwa n'indwara z'umutima
Umuyobozi Nshingwabikorwa wa SACH, Simon Fisher yavuze ko mu myaka itanu icyo kigo kizaba gikora neza
Dr Rusingiza Emmanuel muganga w’indwara z’umutima mu bana kuri CHUK
Umwana wa Mukanyarwaya Jacqueline ni umwe mu bazajya kubagwa muri Israel

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza