Muhanga: Abagore bacuruza udutaro bakanguriwe kwishyira hamwe bagakora imishinga

Yanditswe na Akimana Jean de Dieu
Kuya 12 Kanama 2018 saa 09:13
Yasuwe :
0 0

Abagore babyariye iwabo bacuruza agataro mu mujyi wa Muhanga, bahuguwe ku buryo bwo kwihangira imirimo, bigakorwa biciye mu kwibumbira hamwe bagakora imishinga yo kwiteza imbere, bahereye ku mishinga mito idasaba igishoro gihambaye.

Ku wa Gatanu tariki 10 Kanama 2018 nibwo umukozi w’Ikigega cyashyizweho ku bufatanye bwa Guverinoma y’u Rwanda na Banki Itsura amajyambere kigamije gufasha abagore n’urubyiruko kwiteza imbere, BDF, mu Karere ka Muhanga, Niyonsaba Felix, yaganiraga n’abagore basaga 30 bari bamaze icyumweru mu mahugurwa ku kwihangira imirimo.

Abo bagore bibukijwe ko gutera imbere ntawe byaremewe wenyine, bityo bagomba gukora uko bashoboye bagakora imishinga ijyanye n’ubushobozi bwabo badategereje gukora iminini isaba igishoro kiremereye.

Yagize ati "Ubumenyi mukuye muri aya mahugurwa bugomba kubafasha kurwanya ubujiji mwari mufite mugaharanira gutera imbere kuko iterambere ni irya twese kandi mugakora uburyo bwose muhera ku mishinga iciriritse kuko niyo izabafasha gutera imbere vuba".

Yongeraho ko gukorana n’abandi mu makoperative byabafasha kungurana ubumenyi no gushyira hamwe igishoro cyo guheraho.

Yakomeje agira ati "Burya kwishyira hamwe n’abandi mu makoperative ntako bisa kuko ubumenyi mufite mubushyize hamwe mwese bubafasha gutekereza ikintu kimwe, ikindi ni uko mugena uburyo bwo kwibonera igishoro no gukora imishinga mito ari nayo muba mufitiye ubumenyi kuko imishinga migari yo kuyitangira iba igoye".

Nyirarekeraho Chantal wahuguwe yabwiye IGIHE ko aya mahugurwa bayungukiyemo byinshi bigiye kubafasha kwishyira hamwe bakiteza imbere.

Yagize ati “Biciye muri aya mahugurwa twamenye byinshi cyane, tugiye kwishyira hamwe mu makoperative tunagane ibigo by’imari dukore imishinga ndetse bitugurize amafaranga dukore ibikorwa bifatika byo gukora imitobe mu mbuto, amasabune y’amazi n’ibindi, biturinde kwirirwa ducengana n’inzego z’umutekano".

Aba bagore 32 basanzwe bafite ikimina bahurijwemo na Caritas ya Diyoseze ya Kabgayi aho bahura mu mpera za buri kwezi bakizigamira amafaranga 500 buri muntu.

Ayo mahugurwa bigiyemo uko bakora imitobe ikozwe mu mbuto zitandukanye, amasabune y’amazi ndetse n’asanzwe, banakangurirwa kwaka inguzanyo zitandukanye ngo iyi mishinga ikomeze gukora ibakure mu bwigunge.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza