Muhanga: Guverineri Mureshyankwano yahaye icyizere abahejejwe mu bwigunge no kutagira amazi n’amashanyarazi

Yanditswe na Akimana Jean de Dieu
Kuya 28 Nyakanga 2018 saa 06:34
Yasuwe :
0 0

Guverineri w’Intara y’Amajyepfo, Mureshyankwano Marie Rose yijeje abatuye mu gice kinini cy’umurenge wa Muhanga, ko mu gihe gito bazahabwa amazi n’amashanyarazi nyuma yo kumugezaho imbogamizi bahura nazo kubera kutabigira.

Yabigarutseho ubwo yitabiraga inteko y’abaturage mu ntangiro z’iki cyumweru, akagezwaho ikibazo cyo kuba Akagali ka Kanyinya katagira amazi meza ndetse no n’amashanyarazi, abaturage bagasaba ko bayahabwa bakabasha kubahoneza no gutegura imishinga yabateza imbere.

Yagize ati "Iki gihugu ni icyacu kandi nitwe gikorera, ibikorwa by’iterambere byose birateganyijwe nubwo twese bitatugereraho rimwe ariko bigomba kubageraho namwe muragaragaza ko mukeneye amazi n’umuriro, tugiye gushakisha uko mu gihe gito mwabasha kubona amazi ndetse n’umuriro, mukabasha kwiteza imbere kuko aho umuriro n’amazi bigeze hagira agaciro kisumbuyeho.”

“Twebwe nk’abayobozi turi abakozi banyu, muradutuma natwe tukagira aho tugeza ubutumwa bwanyu bityo ibikorwa bikabageraho mukivana mu bwigunge ".

Yongeyeho ko aho amashanyarazi yageze biba byoroshye cyane ko n’ibigo by’amashuri bibasha gutanga ubumenyi bugezweho bukoresheje koranabuhanga.

Mureshyankwano yakomeje agira ati "Turabiziko abana bacu bagomba gusogongera ku ikoranabuhanga bakiri mu mashuri yo hasi ndetse bakabasha gufunguka amaso bakagira ubumenyi bwisumbuye kubwo baba bahawe, bityo uyu muriro urakenewe kandi natwe turabibonako aka gace gakenewemo ibibikorwa by’amajyambere".

Bamwe mu batuye muri ikigice bavuga ko kubona amazi ndetse n’umuriro w’amashanyarazi bizatuma bava mu bwigunge ndetse bakarwanya umwanda dore ko amazi ari isoko y’ubuzima.

Umunyamabanga Nshingwabikorwa w’umurenge wa Muhanga, Ntezirembo Jean Claude, ahamya ko ayo mashanyarazi n’amazi nibimara kugera muri iki gice bizahateza imbere kurushaho.

Yagaragaje ko hari inyungu ikomeye ku burezi kuko azafasha nk’abiga mu Rwunge rw’amashuri rwa Ngoma mu kwiga ikoranabuhanga, kuko wasangaga bisaba amafaranga yo kuzana moteri itanga ingufu ngo babashe kwiga. Ibyo bizagendana n’uko abaturage bazabasha gukora indi mishinga ibyara inyungu.

Yagize ati"Uyu muriro w’amashanyarazi n’amazi nibigera hano bizafasha abaturage bacu gutekereza uburyo bakwiteza imbere bakanateza imbere iki gice batuyemo bimakaza isuku, bizafasha bimwe mu bigo by’amashuri dufite bituriye aha cyane ko bari bafite imashini bigiraho ikoranabuhanga ariko ugasanga ziratangwaho byinshi, kubera umuriro bigiye guhinduka".

Kugeza ubu nuko mu karere ka Muhanga abafite umuriro w’amashanyarazi ndetse n’ukomoka ku zindi ngufu basaga 38%, harimo abagera kuri 27% bakoresha umuriro w’amashanyarazi akomoka ku ngufu z’amazi naho 11% bakoresha izindi ngufu zirimo akomoka ku mirasire y’izuba.

Guverineri Mureshyankwano mu kiganiro n'abaturage mu Murenge wa Muhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza