Muhanga: Guverineri Mureshyankwano yibukije abaturage ko abantu bitabye Imana bagomba kwandukuzwa

Yanditswe na Akimana Jean de Dieu
Kuya 3 Kanama 2018 saa 11:52
Yasuwe :
0 0

Guverineri w’Itara y’Amajyepfo, Mureshyankwano Marie Rose, yabwiye abaturage ko bagomba kujya bandukuza mu bitabo by’irangamimerere abantu bitabye Imana kandi bakabikorera ku gihe, kuko iyo bidakozwe bituma leta ikomeza kubafata nk’abakiriho kandi ikabateganyiriza mu ngengo y’imari.

Yabigarutseho ku wa Kabiri ubwo yari mu Murenge wa Shyogwe mu Kagali ka Ruli, ubwo hatangizwaga icyumweru cy’irangamimerere, abaturage bagahabwa umwanya wo kwandikisha abana ndetse no kwandukuza abitabye Imana.

Yagize ati "Kutandikisha abana bavutse ndetse no kutandukuza abapfuye ni ikosa kuko uba ubavukije uburenganzira bwabo bagombwa, ndetse nawe ubwawe uba wibujije byinshi kuko hari igihe biba ngombwa ko ushaka ibyangombwa runaka ukajya kubikora. Ikindi ni uko igihugu kiba kitazi abapfuye ngo kibakure mu mubare w’abaturage gifite giteganyiriza, ugasanga bishobora kugira ingaruka ku ngengo y’imari igihugu gikoresha buri mwaka."

Yongeyeho ko kugeza ubu ababyarira kwa muganga abana babo bahita bandikwa, ariko uwatunguwe akabyarira mu rugo bigorana, hakiyongeraho n’ikibazo cyo gusigana kw’ababyeyi mu kwandikisha abana.

Mureshyankwano yakomeje agira ati "Hari n’ababyarana mu buryo butemewe n’amategeko kubandikisha ntibyorohe, ikindi ni uko kwandukuza abapfuye usanga hari imiryango ifitanye ibibazo nayo bifata igihe kubera bamwe baba bahunga inshingano cyane ku babyeyi baba bitabye Imana."

Bamwe mu baturage bavuga ko batari basobanukiwe ko iyo umuntu apfuye hari ibindi bigomba gukorwa kugirango atazakomeza gufatwa nk’ukiriho, bityo bagiye guhindura imyumvire.

Mujyacyera Callixte w’imyaka 59, avuga ko we yari azi ko iyo umuntu apfuye biba birangiriye aho, bityo agiye kwandukuza uwe umaze imyaka 5 yitabye Imana.

Yagize ati "Nari nzi ko iyo umuntu apfuye biba birangiye ariko aba agomba kwitabwaho ku bundi buryo bwo kumwandukuza mu bitabo by’irangamimerere. Uwanjye amaze imyaka 5 yitabye Imana ariko sinigeze mukuza mu bitabo, ubwo nawe leta imufata nk’ukiriho kandi yarapfuye ndetse akanakomeza guteganyirizwa.”

Umurenge wa Shyogwe ni umwe muri 12 igize akarere ka Muhanga ariko ugaragaramo ikibazo cy’ubucucike ndetse ntihazwi neza imibare ifatika y’abawutuye biturutse ku babyara ntibandikishe abana ndetse no kutandukuza abapfuye.

Abaturage baganira n'abayobozi mbere yo kwandukuza abapfuye no kwandikisha abavutse
Guverineri w'Intara y'Amajyepfo, Mureshyankwano Marie Rose yibukije abaturage bo mu murenge wa Shyogwe kwandikisha abavutse no kwandukuza abitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza