Mukabunani wa PS Imberakuri yagereranyije Ntaganda n’umuntu wavangiwe mu mutwe

Yanditswe na Ferdinand Maniraguha
Kuya 21 Nzeri 2018 saa 06:05
Yasuwe :
0 0

Perezida w’ishyaka PS Imberakuri yavuze ko Me Ntaganda Bernard wiyitirira iri shyaka, politiki yo mu Rwanda yamunaniye akaba asigaye avuga nk’uwavangiwe mu mutwe.

Yabitangaje kuri uyu wa Gatanu mu kiganiro n’abanyamakuru cyari kigamije kwitandukanya n’itangazo Ntaganda aherutse gusohora avuga ko Ingabire Victoire uherutse kurekurwa ku mbabazi za Perezida wa Repubulika, ashyirwaho iterabwoba.

Ntaganda wahoze muri PS Imberakuri akaryirukanwamo muri Werurwe 2010, kuri uyu wa Kane yasohoye itangazo risa n’iryagarukaga ku magambo Perezida Kagame yavuze tariki 19 Nzeri ubwo yarahizaga abadepite bashya, aho yaciye amarenga ko Ingabire Victoire atitonze nubwo yarekuwe ashobora kongera gufungwa.

Muri iryo tangazo ryitiriwe PS Imberakuri, Ntaganda avuga ko ari urwango n’iterabwoba Leta iri gushyira kuri Ingabire.

Mukabunani yabwiye abanyamakuru ko ishyaka rye ryitandukanyije n’itangazo rya Ntaganda ndetse ko atarivugira kandi atakiri umunyamuryango waryo.

Yavuze ko amagambo Ntaganda yakoresheje muri iryo tangazo agaragaza ko yavangiwe mu mutwe.

Ati “Ntaganda afite ikibazo. Twe turabona ko afite ikibazo gikomeye. Uriya muntu politiki yo mu Rwanda yaramunaniye burundu ku buryo ageze aho, niba ari ukuvangirwa mu mu mutwe, ariko ibyo avuga ni ibintu bidafite urwego wabishyiraho.”

Mukabunani yemera ko ishyaka ayoboye ritavuga rumwe n’ubutegetsi, icyakora ngo umurongo waryo ni ukunenga ibitagenda neza ariko mu buryo bwubaka.
Mu itangazo Ntaganda asaba ko urubuga rwa politiki rufungurwa mu Rwanda abatavuga rumwe nayo bakagaragaza ibitekerezo byabo.

Mukabunani uherutse gutorerwa kuba umudepite yavuze ko urubuga rwa politiki mu Rwanda rwafunguye, ngo iyo bitaba ibyo ntibaba barinjiye mu Nteko.

Ati “Twe turi abahamya bo kugaragaza ko urubuga rwa politiki mu Rwanda rwatangiye gufunguka neza. Iyo urebye uko twiyamamaje mu 2013, twarazitiwe ku buryo bwose. Hari n’aho twajyaga ntitwiyamamaze tugataha ariko ubu twaragiye turiyamamaza, imikoranire hagati y’abiyamamazaga n’abayobozi b’inzego z’ibanze yari myiza.”

Mukabunani avuga ko impamvu Ntaganda akunze kumvikana yitirira ishyaka PS Imberakuri ari uko atifuza ko ritera imbere, ngo ‘buri gihe aba ashaka ko bisenyuka.’

Iri shyaka ngo rigiye gukoresha inzira yo kumwihanangiriza, nabyanga rizicara ribiganireho barebe niba bamugeza mu nkiko.

Si ubwa mbere Ntaganda asohora itangazo mu izina rya PS Imberakuri akamaganirwa kure n’ubuyobozi bwaryo bwemewe n’amategeko.

Ku wa 12 Mutarama 2014 uruhande rwa Ntaganda Bernard rwasohoye itangazo rivuga ko ryifatanije n’umutwe wa FDLR ku mugaragaro.

Muri ubu bufatanye havugwagamo kandi andi mashyaka nka RDI Rwanda Nziza iyobowe na Twagiramungu Faustin na RNC ya Kayumba Nyamwasa.

Abayobozi ba PS Imberakuri mu kiganiro n'abanyamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza