Ngoma: Hatangiye kubakwa stade yemewe na Perezida Kagame

Yanditswe na Hakizimana Jean Paul
Kuya 5 Kanama 2018 saa 10:20
Yasuwe :
5 0

Mu Karere ka Ngoma hatangiye kubakwa stade iri muri eshatu Perezida Kagame yemereye abatuye Intara y’Uburasirazuba ubwo aherukayo mu bikorwa byo kwiyamamaza.

Mu byo Umukuru w’Igihugu yemereye abaturage b’Intara y’Uburasirazuba muri Nyakanga 2017, ubwo yari mu bikorwa byo kwiyamamaza harimo kuzubakirwa stade eshatu mu turere twa Ngoma, Bugesera na Nyagatare.

Ku ikubitiro Stade ya Ngoma niyo yatangiriweho, imirimo yo kuyubaka iri gukorwa n’ikompanyi y’Abashinwa.

Ni stade izajya ku buso bwa hegitari 4.5 nk’uko IGIHE yabitangarijwe na Mutabazi Célestin, Umuyobozi w’ishami rishinzwe ibikorwa remezo n’ubutaka mu Karere ka Ngoma.

Yagize ati "Iyi stade iri kubakwa mu Murenge wa Kibungo, imirimo y’ibanze yo gusiza aho izubakwa yatangiranye n’ukwezi kwa Kamena. Iri kubakwa na CRBC (China Road and Bridge Corporation) ikazaba iri ku buso bwa hegitari 4.5. Ni stade izaba ifite imyanya 3500 y’abantu bicaye neza.”

“Izubakwa mu gihe cy’umwaka umwe, itangweho arenga miliyari umunani z’amafaranga y’u Rwanda.”

Stade ya Ngoma izaba ifite ibindi bibuga ku mpande birimo ikizajya gikinirwaho Tennis n’ikindi kizajya gikinirwamo imikino itatu itandukanye irimo Volleyball, Basketball na Handball. Buri kibuga kizaba gifite amatara azatuma cyakinirwaho no mu masaha y’ijoro bibaye ngombwa.

Umuyobozi w’Akarere ka Ngoma, Nambaje Aphrodis, yabwiye IGIHE ko iyi stade ije ari ibisubizo mu baturage ba Ngoma ndetse no mu baturanyi kuko izajya ibafasha mu bikorwa bitandukanye by’imyidagaduro.

Yagize ati “Iyi Stade ni igisubizo ku batuye i Ngoma ndetse n’igihugu cyose kuko hazategurirwa imikino myinshi. Ndizera ko no mu Rwanda mu gihe twakwakira irushanwa rikomeye nka CAN cyangwa CHAN na hano ryahabera. Ikindi izadufasha kubona ahantu hisanzuye tuzajya dukorera ibirori.”

Bamwe mu baturage baganiriye na IGIHE batangaje ko iyi stade izabakura mu bwigunge ikagaragaza n’impano ku bakiri bato.

Ngaboyisonga James yagize ati “Izafasha abatuye Ngoma kuva mu bwigunge kuko izajya ikinirwaho n’ikipe yacu ya Etoile de l ‘Est, abantu bayirebe bisanzuye. Bizanatuma ikina umukino mwiza, izamure urwego rwayo nibishoboka inazamuke mu cyiciro cya mbere.”

Nsanzimana Eric we yagize ati “Icyo mbona nk’urubyiruko izadufasha mu buryo bwo kubona akazi mu gihe cyo kuyubaka, imikorere yacu itere imbere.”

Imirimo yo kubaka stade ya Ngoma yatangiye mbere y’izindi zirimo iya Bugesera na Nyagatare kuko ibyangombwa byayo byabonetse hakiri kare bikaba biteganyijwe ko n’izindi zizatangira kubakwa vuba kugira ngo mu gihe cy’umwaka zizabe zuzuye.

Iyi stade ni imwe muri eshatu Perezida Kagame yari aherutse kwemerera abaturage
Stade iri kubakwa izaba ifite ubushobozi bwo kwakira abantu 3500 bicaye neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza