Nta gihugu cyatera imbere kititaye ku mikurire y’umwana - Minisitiri Nyirahabimana

Yanditswe na Evariste Nsengimana
Kuya 12 Kamena 2019 saa 08:10
Yasuwe :
0 0

Minisitiri w’Uburinganire n’Iterambere ry’Umuryango, Nyirahabimana Solina, yavuze ko u Rwanda rushyize imbere gahunda zo kwita ku burezi n’imikurire y’umwana mu buryo bwihariye kuko nta gihugu cyabasha gutera imbere uko byifuzwa kitita ku mikurire y’umwana akiri muto.

Minisitiri Nyirahabimana yabitangarije i Kigali kuri uyu wa 11 Kamena ubwo hatangizwaga inama Mpuzamahanga yiga ku mikurire y’umwana, ihuje abashakashatsi n’impuguke ku burezi, ubuzima n’imikurire y’umwana.

Iyi nama y’iminsi ibiri ifite insanganyamatsiko igaruka ku ‘Gushora imari mu mikurire y’umwana hagamijwe kongera ubushobozi bw’abakozi’.

Igenzura ryakozwe ku rwego rw’ubuzima bw’abaturage mu Rwanda DHS (2014-2015), rigaragaza ko abana bafite amezi 36-59 babasha gutera imbere mu gusoma, kubara, mu gihagararo, imyitwarire ari 63%.

Bivuze ko umwana umwe muri batatu mu Rwanda yari akeneye kwitabwaho byihariye. Icyo gihe 38% by’abari munsi y’imyaka itanu bari bagwingiye. Ibyo bituma Isi ihomba abakozi bafite ubumenyi bwayifasha guhangana n’ibibazo biyugarije.

Mu 2014, Guverinoma y’u Rwanda yatangije gahunda y’Urugo Mbonezamikurire rw’abana bato, bari munsi y’imyaka itandatu [Early Childhood Development: ECD], imwe mu zigamije gukumira no guhangana n’ibibazo by’igwingira n’imirire mibi mu bana.

Minisitiri Nyirasafari yavuze ko ubukungu bw’u Rwanda bushingiye ku bushobozi bw’abanyarwanda, akaba ariyo mpamvu rwashyizeho gahunda zihariye zo kwita ku mikurire y’umwana akiri muto.

Ati “Iterambere ry’igihugu cyacu rishingiye ku bumenyi bw’umuntu. Umwana tutamureze akiri muto, ngo azabe wa muntu ufite ubumenyi bwifuzwa, n’igihugu ntabwo cyabasha gutera imbere kuko abantu nibo bagikorera mu nzego zose.”

Inzobere mu by’ubuzima n’imikurire y’umwana zigaragaza ko gukura mu bwenge no mu gihagararo bikorwa kuva agisamwa kugera nibura ku myaka itatu. Icyo gihe cyihariye nibura 80% y’iterambere ry’ubwonko.

Minisitiri Nyirahabimana ati “Twese dufatanye guteza imbere imukurire y’umwana kuva akiri mu nda, afatwe neza abone ibikenewe cyane cyane mu minsi ya mbere 1000.”

Umuhuzabikorwa wa Porogaramu y’Igihugu Mbonezamikurire y’abana bato (NECDP), Dr Anita Asiimwe, yavuze ko umwana utitaweho akiri muto, bimugiraho ingaruka mu iterambere rye.

Ati “Ubwonko bwe ntibushobora gukura uko bikwiye kandi twifuza ko ubwonko bw’umunyarwanda bukura 100% kuko iyo butahageze, ubuzima bwe bugenda bumugora, mu mashuri agasibira, agata ishuri, mu buzima busanzwe ntamenye kubana n’abandi.”

Yavuze ko mu mwaka w’ingengo y’imari utaha (2019/2020), porogaramu mbonezamikurire y’abana bato yagenewe asaga miliyari 12 Frw ariko ko ntacyo yafasha mu gihe izindi nzego zirimo n’ababyeyi, ziteshutse ku nshingano zazo.

Ubushakashatsi bwamuritswe n’umuryango urengera abana ‘Save the Children’, bwagaragaje ibintu by’ingenzi ababyeyi bakorera abana babo bikagira uruhare rukomeye mu iterambere ry’ubwonko bwabo birimo kubaririmbira, kubabwira inkuru, gukina n’ibipupe, gusoma no kumenya amazina y’ibishushanyo n’ibindi.

Umuyobozi w’umushinga ugamije kuzamura ireme ry’uburezi muri Zambia (VVOB Zambia), Chikunduzi Lyson, yavuze ko kwigisha abana amasomo yo mu ishuri n’imikino bigamije gukangura ubwonko bwabo bikenera ibikoresho bihagije, ndetse igihugu cye cyahisemo gukoresha ibiboneka mu gihugu cyabo.

Mu zindi ngamba Leta yashyizeho zigamije gukumira igwingira ry’abana harimo gushishikariza abanyarwanda gutegura indyo yuzuye, guhinga imboga ku turima tw’igikoni, kwigisha gutegura indyo yuzuye no kwita ku buzima bw’umwana n’umubyeyi bikorerwa ku gikoni cy’umudugudu n’ibindi.

Muri gahunda y’imyaka irindwi Guverinoma yihaye, biteganyijwe ko binyuze muri izo gahunda zitandukanye zo kurwanya igwingira rizagabanuka rikava kuri 38% ryariho mu 2015 rikagera mu 2024 rigeze kuri 19%.

Minisitiri Nyirahabimana ubwo yagezaga ijambo ku bitabiriye iyi nama
Abahagarariye Minisiteri n'ibigo bitandukanye bari kuganira ku ngamba zafatirwa ikibazo cy'igwingira
U Rwanda rwashyize imbaraga mu bikorwa bigamije kuzamura imikurire y'abana bato

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza