Nubwo badahembwa, abajyanama b’ubuzima bakomeje kuba indashyikirwa mu iterambere

Yanditswe na Iradukunda Desire
Kuya 30 Nyakanga 2018 saa 12:50
Yasuwe :
0 0

Hambere aha mu 1995, Guverinoma y’u Rwanda yatangije gahunda y’abajyanama b’ubuzima ku rwego rw’imidugudu ngo bagire uruhare mu kugeza serivisi z’ubuzima kuri bose cyane cyane abana n’ababyeyi no kuziba icyuho cy’ibigo nderabuzima n’ibitaro byari mbarwa mu gihugu.

Kugeza ubu mu Rwanda hari abajyanama b’ubuzima 45,516 ku rwego rw’umudugudu, bavura 80% by’indwara. Umusanzu wabo ntawe uwushidikanyaho mu kugabanya impfu z’abana bapfa bari munsi y’imyaka itanu, gutanga uburyo bwo kuboneza urubyaro, kuvura malariya abana n’abakuru no gukangurira abaturage kwitabira serivisi z’ubuzima.

Hari kandi kureba uko isuku yifashe mu ngo, gukurikirana ababyeyi batwite no kubagira inama ndetse no gutanga amakuru ku bafite ibibazo byihutirwa bakoresheje itumanaho.

Ibi bikorwa byose abajyanama b’ubuzima babikora nta gihembo bategereje, uretse agahimbazamusyi nako badacyura mu rugo uko kakabaye kuko ijanisha rinini ringana na 70% risigara mu makoperative yabo no mu bikorwa by’iterambere bahuriyeho. Urugero nk’iyo umujyanama w’ubuzima yakoze ibikorwa by’ubuvuzi bituma ahabwa agahimbazamushyi ka 10 000 Frw, atahana 3000 Frw.

Maniraho Christophe umuhuzabikorwa w’abajyanama b’ubuzima mu Murenge wa Coko ho mu Karere ka Gakenke, asobanura ko agahimbazamusyi k’umujyanama w’ubuzima kabarwa bitewe n’akazi aba yakoze.

Yagize ati “Nkanjye nabonye 5000 mu mezi atatu ariko bitewe n’ibikorwa uba wakoze hari n’ababona ibihumbi bigera kuri 300 mu mezi atatu”.

Avuga ko ibyo byose biba byavuye mu manota bahabwa mu butumwa bohereza bw’ibikorwa bakoze (Rapid SMS), aya manota akazavunjwamo amafaranga.

Nubwo nta mushahara bagira, iyo ugeze hirya no hino mu gihugu usanga ibikorwa by’iterambere bidasanzwe abajyanama b’ubuzima bagezeho, babikesha guhuza imbaraga. Birimo kubaka inzu z’ubucuruzi, ibikorwa by’ubucuruzi, ubuhinzi, ubworozi n’ibindi.

Abajyanama b’ubuzima bo mu Karere ka Gatsibo, mu murenge wa Rugarama, bibumbiye muri Koperative Cobosaru Imboni, ni bamwe mu bageze ku bikorwa by’indashyikirwa, aho biyubakiye inzu y’imiryango 12 ifite agaciro ka miliyoni 40, ikaba ibinjiriza amafaranga angana na miliyoni 2.1 ku mwaka avuye mu bukode.

IGIHE yasuye iyi koperative imwe muri 14 zibarizwa mu Karere ka Gatsibo, igizwe n’abanyamuryango 174, bafite n’ibindi bikorwa by’ubucuruzi birimo ubw’imyaka no gucuruza amazi, bakesha umusanzu w’abanyamuryango no gucunga neza inkunga bagenerwa na Minisiteri y’ubuzima.

Umucungamutungo w’iyi Koperative, Uwantege Peace, yatangaje ko ibikorwa bagezeho babikesha guhuriza hamwe imbaraga.

Yagize ati “Twe dushyira hamwe ndetse dufite n’amahirwe yo kuba duturiye umuhanda hakorerwa ibikorwa by’iterambere. Twe twabonye ari cyo cyadufasha kuko gukodesha inzu ntibijya bisaza.”

Uretse kwihuriza hamwe mu makoperative, abajyanama b’ubuzima bafite n’ibikorwa bitandukanye by’iterambere bigejejeho ubwabo. Bamwe bafite amatungo magufi n’ibindi bakesha umwuga bakora

Murengera Casien umwe mu bajyanama b’ubuzima avuga ko hari byinshi amaze kugeraho birimo ubumenyi ku gucunga umutungo neza yakuye mu mahugurwa yahawe.

Yagize ati “Nabashije kwigurira igare, mfite amatungo atatu magufi. Ibyo ni ibyo navanye mu bumenyi bwa koperative no kwishyira hamwe n’abandi.”

Buri mezi atatu abajyanama b’ubuzima ba Rugarama bagabana inyungu ya koperative, ku buryo umwe ashobora kubona imihumbi 20 Frw. Murengera avuga kandi ko ibikorwa by’ubuzima bakora nabyo byababere imbarutso y’imibereho myiza kuko ibyo bakora babihera iwabo.

Uretse mu Karere ka Gatsibo, no mu tundi turere abajyanama b’ubuzima bafite ibikorwa by’indashyikirwa. Mu Murenge wa Coko ho mu Karere ka Gakenke abajyanama b’ubuzima biyujurije igorofa rya miliyoni zirenga 41 rifite imiryango 13 ikodeshwa ikabinjiriza amafaranga ibihumbi 150 ku kwezi.

Iyi Koperative yitwa ‘Ejo Heza Coko’ igizwe n’abanyamuryango 90, bafite n’ibikorwa by’ubucuruzi bw’inyongeramusaruro n’imiti y’amatungo.

Mu Karere ka Karongi naho abajyanama b’ubuzima bagize amakoperative 22 bahuje umusanzu wabo maze biyubakira umuturirwa ufite agaciro ka miliyoni 350 Frw.
Abajyanama b’ubuzima bo mu Karere ka Gisagara nabo bafite ibikorwa by’iterambere bagezeho birimo kwiyubakira inzu n’amacumbi bikodeshwa ndetse hari n’abafite ibikorwa by’ubuhinzi bw’urutoki n’ibindi.

Inzira iracyari ndende

Abajyanama b’ubuzima bavuga ko nubwo batanga umusanzu w’indashyikirwa hari ibikigoranye mu kazi kabo ka buri munsi nko kuba nta hantu habugenewe ho kubika imiti hatari mu ngo za bo. Bavuga ko nubwo bafite utubati twihariye bahawe two kubikamo imiti bishoboka ko yangirika, bagasabagushyirirwaho icyumba cy’umujyanama atangiramo serivise zitandukanye.

Basaba kandi kongerwa inkunga bahabwa na Minisiteri y’ubuzima cyangwa bakagenerwa umushahara.

Rugarama, Abajyanama b'Ubuzima bibumbiye hamwe biyubakira inzu ikodeshwa
Abanyamuryango ba koperative bagura imbuto y'ibishyimbo byo gutera kuri koperative ku giciro gito
Ubu ni ububiko bw'imyaka bwa Koperatibe COBOSARU Imboni
Abajyanama b'ubuzima bafite inzu zikodeshwa zifite izo mu gikari
Uwantege Peace, Umucungamari wa Koperative y'Abanyabuzima yo mu murenge wa Rugarama mu Karere ka Gatsibo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza