RDC: Kiliziya Gatolika igiye gukora indi myigaragambyo yamagana Kabila

Yanditswe na Jean Pierre Tuyisenge
Kuya 12 Gashyantare 2018 saa 07:56
Yasuwe :
0 0

Kiliziya Gatolika muri Repubulika Iharanira Demokarasi ya Congo yatangaje ko ku wa 25 Gashyantare hazakorwa indi myigaragambyo igamije gusaba Perezida Kabila kuva ku butegetsi.

Imyagaragambyo iherutse yabaye mu Ukuboza 2017 no muri Mutarama 2018 yari yabujijwe ndetse inzego z’umurekano zirayirwanya.

Mu itangazo ryashyizwe ahagaragara na Komite mpuzabikorwa y’abarayiki muri Congo (CLC), igira iti “ku wa 25 Gashyantare 2018, twaba turi mu gihugu cyangwa turi hanze y’igihugu, hatitawe ku idini cyangwa politiki, duhaguruke twese turwanye igitugu.”

Jeune Afrique dukeshe iyi nkuru ivuga ko iryo tangazo rya CLC ryasohotse mu masaha ane nyuma ya misa yabereye i Kinshasa hibukwa abaguye mu myigaragambyo yo ku wa 21 Mutarama.

Muri rusange abagera kuri 15 biciwe mu yo ku wa 31 Ukuboza na 21 Mutarama nk’uko Umuryango w’Abibumbye ubitangaza. Ubutegetsi buvuga ko buzi abantu babiri bonyine bayiguyemo ku wa 21.

Komisiyo ishinzwe uburenganzira bwa muntu muri Congo yagaragaje ko hapfuye abantu barindwi ku wa 31 naho ku wa 21 hagapfa bane.
CLC ivuga ko abaturage nta cyizere cyo kuva ku butegetsi babona ku bayobozi bariho.

Amatora ateganyijwe ku wa 23 Ukuboza 2018 ashobora gukura ku butegetsi Perezida Kabila ubumazeho manda ebyiri. Iya nyuma yarangiye kurangira ku wa 20 Ukuboza 2016.

CLC isaba akanama gashinzwe umutekano ka Loni, Umuryango wa Afurika yunze Ubumwe n’Umuryango w’Ubumwe bw’Ibihugu by’i Burayi kurenga ibyo gufata ibihano mu magambo gusa. Hagati aho, Kiliziya Gatolika yasabye Perezida Kabila gutangaza ku mugaragaro ko ataziyamamariza kuyobora Congo indi manda.

Kiliziya Gatolika igiye gukora indi myigaragambyo yamagana Kabila

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza