Rubavu: Abaturage basabwe kwirinda gucumbikira ‘umwanzi’

Yanditswe na Mukwaya olivier
Kuya 29 Nyakanga 2018 saa 12:58
Yasuwe :
0 0

Abaturage bo mu Karere ka Rubavu basabwe kuba maso birinda gucumbikira abantu batazi bashobora kugira uruhare mu guhungabanya umutekano w’igihugu.

Kuri uyu wa Gatandatu ubwo hasozwaga ibiganiro bikangurira abaturage kwicungira umutekano mu Karere ka Rubavu, Col. Muhizi Pascal ukuriye Burigade ya 301 ikorera mu turere twa Rubavu na Nyabihu yasabye abaturage ubufatanye mu gucunga umutekano aho kubiharira ingabo gusa.

Yagize ati “Niba umwanzi yaje mukamuhisha mu nzu, ubwo turamushakisha nyine nubwo tutabyifuza kuko uko kumushakisha bigira ingaruka zitari nziza. Ntimuzifuze ko twohereza ingabo kuzana umutekano aho wahungabanye kuko barawushakisha kugeza igihe ugarukiye, ni ko kazi bashinzwe. Iyo wahishe umuntu ufite amasasu ubwo iyo arashe igikurikiraho nawe uracyumva.”

Col. Muhizi yavuze ko igihe umuturage yacumbikiye umugizi wa nabi hakitabazwa ingabo, uwo wabacumbikiye na we ingaruka zizamugeraho byanze bikunze.

Ati “None se nkubwire ngo narasira mu nzu yawe tuzaza dukomange ngo ‘byuka iyorosore’? Ibyo byaba ari ukubeshya. Ntabwo nabwira uyoboye Batayo ngo umuntu yaciye hariya maze ugende ukinguze bagukingurire utagize uwo uhutaza.”

“ We se yabikora nubwo naba ariko mbyifuza ? Ntiyabikora kuko no kuyobora ingabo bisaba imibare. N’iyo ubayoboye nabi bagapfa urabibazwa ugafungwa cyangwa ukanirukanwa.”

Yasabye abaturage gutanga amakuru ku gihe kugira ngo ikibazo cyose kibonetse gikumurwe mu gihe gikwiye.

Yagize ati “Uwo dutinya ni uwaza yihishe kandi mwabigizemo uruhare. Turabasaba gutangira amakuru ku gihe kuko iyo utinze ntacyo aba akimaze, uwapfuye aba yapfuye ntacyo tuba tukiramira. Abavugira iyo mubareke, abasakuza, abatukana mubihorere […] ntabwo uru Rwanda ari urukangwa n’induru n’amagambo bandika ku mbuga nkoranyambaga’’.

Umuturage wo mu Murenge wa Gisenyi, Niyigena Pascal, yavuze ko bazi neza ingaruka zo kubura umutekano, ku bw’ibyo bazi akamaro ko gufatanya.

Aka gace ni ko kari karayogojwe n’intambara y’abacengezi mu myaka ya 1997.

Niyigena yagize ati “Tuzi ibihe bigoranye twaciyemo ni yo mpamvu twiteguye gufatanya n’ingabo kuko umupaka urinzwe n’ingabo ariko umutekano w’imbere mu gihugu uratureba. Ni ugufatanya twese dutangira amakuru ku gihe’’.
Hashize ukwezi ubuyobozi bw’ingabo muri Rubavu butangije ubukangurambaga mu mirenge yose igize ako karere, basaba abaturage gukomeza ubufatanye mu gucunga umutekano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza