Rubavu: Abikorera biyemeje kubaka isoko rya Gisenyi ryari ryaradindiye

Yanditswe na Mukwaya olivier
Kuya 13 Gashyantare 2018 saa 09:16
Yasuwe :
0 0

Ubuyobozi bushya bw’urugaga rw’abikorera mu Karere ka Rubavu, bwiyemeje ko bugiye gukemura ikibazo cy’isoko rya Gisenyi rimaze imyaka umunani imirimo yo kuryubaka yaradindiye.

Ibi ngo Bamwe bizagerwaho ari uko ubuyobozi bushya bushyize hamwe abacuruzi bagakorera mu mujyo umwe.

Umuyobozi mushya w’Urugaga rw’Abikorera mu Karere ka Rubavu, Kayumba Nyota Jeannette, afatanije na komite batorewe hamwe mu gihe cy’imyaka itatu iri imbere, yatangaje ko biyemeje ko bagiye kubaka isoko rya Gisenyi.

Yagize ati “Tugiye gushishikariza abacuruzi bose ndetse n’abafatanyabikorwa twishyire hamwe duhuze imbaraga kugira ngo iri soko ryacu rimaze iminsi ryaradindiye turyuzuze.”

Umuyobozi w’Urugaga rw’Abikorera ucyuye igihe, Niyonsaba Mabete Dieudonné, yavuze ko isoko rya Gisenyi ari kimwe mu bikorwa komite ye yifuzaga kuzasoza ikivi irangije kuryubaka ariko ntubyakunda, asaba komite yatowe kwesa uyu muhigo.

Yagize ati “Mu bikorwa bikomeye tubasigiye ni isoko rya Gisenyi murabizi neza ko ryari mu manza ariko ubu zararangiye akarere kararitsindiye. Ni ikintu cyihutirwa kigomba gushyirwamo imbaraga ndetse n’irya Petite barrière aho abikorera bagomba kugira uruhare mu kuricunga."

Mu 2016 inkiko zemeje ko Akarere ka Rubavu gatsinze ndetse umuhesha w’inkiko w’umwuga agashyikiriza ibyangombwa bigahesha uburenganzira bwo gusubirana iri soko.

Aho ryari rigeze rimaze gutwara amafaranga angana na miliyari imwe na miliyoni 300 z’amafaranga y’u Rwanda rikaba ryari ryaratangiye kubakwa n’akarere mu 2010, kaza kunanirwa biturutse ku mikoro make riragurishwa ari na byo byaje gukurura imanza bitewe n’uburyo byakozwemo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza