Rubavu: Umugabo yiyahuye nyuma y’amasaha make avuye gusenga

Yanditswe na Mukwaya Olivier
Kuya 20 Mata 2018 saa 07:27
Yasuwe :
0 0

Bihoyiki Gratien wari utuye mu Murenge wa Rubavu yasanzwe yapfuye yimanitse mu mugozi ku mugoroba wo kuri uyu wa Gatanu, umugore we avuga ko byamutunguye kuko nta kibazo bari bafitanye.

Uyu mugabo usize umugore n’abana babiri yari acumbitse mu Mudugudu w’Isangano mu Kagari ka Byahi muri Rubavu.

Umunyamabanga Nshingwabikorwa w’Akagari ka Byahi, Mbarushimana Honoré, yatangarije IGIHE ko amakuru y’urupfu rwe bayamenye ndetse bakabimenyesha inzego z’umutekano.

Yagize ati “Mu masaha y’umugoroba nibwo tumenye amakuru y’uko uyu mugabo yiyahuye. Yabanaga n’umugore bafitanye abana babiri, atwite inda ya gatatu akaba yakomokaga mu Karere ka Ngororero."

Umugore wa Nyakwigendera yatangarije inzego z’ibanze ko nta kibazo bari bafitanye ndetse ko bavuye gusenga mu masaha ya saa kumi akamuhereza amafaranga ngo ajye kugura ifu y’igikoma, yagaruka agasanga umuryango urafunze, akagira amakenga akarunguruka mu idirishya umugabo yimanitse mu mugozi.

Uyu mugore yahise yiyambaza abaturanyi bamufasha kwica urugi basanga umugabo we yamaze gushiramo umwuka.

Bihoyiki Gratien ngo yakundaga kugenda akabura rimwe na rimwe akavuga ko yakubiswe n’abamukekaho ubujura.

Ubuyobozi bw’Akagari ka Byahi bwahise buhamagara Polisi kugira ngo umurambo w’uyu mugabo ujyanwe mu bitaro gukorerwa isuzuma.

Umurenge wa Rubavu ukunze kugaragaramo impfu zishingiye ku bantu biyahura, muri Werurwe 2018 uwitwa Barayagwiza Jean w’imyaka 60 wari utuye mu Kagari ka Burinda, Umurenge wa Rubavu, Akarere ka Rubavu, yimanitse mu mugozi arapfa, asiga yanditse amazina y’abo afitiye ideni n’abarimufitiye.

Ubuyobozi buvuga ko akenshi ibi bibazo biterwa n’amakimbirane yo mu miryango akururwa n’ubuharike.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza