Ruhango: Yagerageje guca igitsina umugabo we amushinja kumuca inyuma

Yanditswe na Iradukunda Desire
Kuya 31 Nyakanga 2018 saa 02:48
Yasuwe :
0 0

Umugore w’imyaka 23 wo Murenge wa Mbuye, mu Karere ka Ruhango yagerageje guca igitsina cy’umugabo amushinja kumuca inyuma.

Ku wa 29 Nyakanga 2018 nibwo uyu mugore yakomerekeje ubugabo bw’uwo bashakanye nyuma y’amakimbirane bagiranye amushinja kumuca inyuma.

Umuyobozi w’Akarere ka Ruhango, Habarurema Valens, yabwiye IGIHE ko uyu mugabo nyuma yo kurokoka icyo gikorwa, yagize ipfunwe ryo kubivuga ahitamo kwicecekera.

Ati “Byabaye mu ma saa saba z’ijoro ryo ku wa 29 Nyakanga 2018 nibwo umugore yagerageje gukata igitsina cy’umugabo we. Umugabo yarabihishe ntiyatabaza bya bindi by’abagabo byo kwihagararaho no kwanga kugaragaza ko bakubiswe n’abagore hanyuma mu gitondo nka saa tatu agiye kwivuza bamubajije icyo yabaye avuga ko ari umugore wamugize kuriya.”

Habarurema yakomeje avuga ko impamvu yateye umugore gushaka gukata igitsina cy’umugabo we, byaturutse ku makimbirane bari bafitanye ashingiye ku kuba umugore yarashinjaga umugabo we kumuca inyuma. Ngo umugore yahoraga avuga ko azaca umugabo we igitsina.

Kuri ubu inzego z’umutekano ziracyashakisha uyu mugore kuko nyuma yo gukora iki cyaha yahise atoroka, naho umugabo akaba arwariye ku bitaro by’Akarere ka Ruhango.

Uyu mugabo w’imyaka 32 yabanaga n’umugore we w’imyaka 23 batarasezerana imbere y’amategeko, bakaba bari banafitanye abana babiri.

Ifoto ya Satellite igaragaza Akarere ka Ruhango byabereyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza