RwandAir yemerewe gukoresha ibibuga by’indege by’u Butaliyani

Yanditswe na Mukaneza M.Ange
Kuya 20 Kanama 2018 saa 12:02
Yasuwe :
0 0

U Rwanda rwasinyanye amasezerano n’u Butaliyani yatumye Sosiyete Nyarwanda y’ubwikorezi bw’indege, RwandAir, ibona uburenganzira bwo gukoresha ibibuga by’indege byose byo muri icyo gihugu.

Aya masezerano yasinywe kuri uyu wa Mbere, arebana no guhana uburenganzira busesuye bwo gukoresha ikirere n’ibibuga by’indege byo muri ibi bihugu.

U Rwanda rwari ruhagarariwe na Minisitiri w’Ibikorwaremezo, Amb. Claver Gatete mu gihe u Butaliyani bwahagarariwe na Ambasaderi Domenico Fornara.

Minisitiri Gatete yavuze ko aya masezerano yitezweho koroshya ubuhahirane hagati y’u Rwanda n’u Butaliyani, by’umwihariko mu birebana n’ubucuruzi n’ubukerarugendo.

Ati “Ibi bidufasha ku bijyanye n’ubucuruzi hagati y’ibihugu byombi, ku ishoramari, ubukerarugendo aho benshi cyane baza muri iki gihugu”.

Yakomeje agira ati “Iyi rero ni ingingo imwe itwemerera kugira ngo indege yacu ibe yajya mu Butaliyani ariko n’indege zabo zishobore kuba zaza mu Rwanda.”

Amb. Fornara uhagarariye u Butaliyani mu Rwanda, yavuze ko binyuze muri iyi masezerano RwandAir yemerewe gukoresha ikirere cy’iki gihugu, ndetse no kugwa ku bibuga byaho ariko itagamije kuhakura cyangwa kuhasiga abagenzi.

Ibi akaba ari nako bizagenda ku ndege zo mu Butaliyani zizakoresha ibibuga byo mu Rwanda.

Umuyobozi Mukuru wa RwandAir, Yvonne Makolo, yavuze ko muri gahunda y’imyaka itanu bafite harimo kongera ibihugu bakoreramo ingendo kandi u Butaliyani bukaba hamwe mu ho bateganyaga cyane.

RwandAir ubu ifite ibyerekezo 26, muri uyu mwaka ikaba yaratangije ingendo zirimo; Cape Town na Abuja.

Ifite indege 12 zirimo Airbus A330 – 300 imwe, Airbus A330 – 200 imwe, Boeing 737-800NG enye, Bombardier Q-400 Next Gen ebyiri, Bombardier CRJ-900 NextGen ebyiri na Boeing 737-700NG na zo ebyiri.

Yifuza gukuba kabiri uyu mubare w’indege mu myaka itanu iri imbere. RwandAir kandi imaze no kugira icyicaro i Cotonou gihuza ingendo zo muri Afurika y’Iburengerazuba mu mijyi ya Abidjan, Dakar, Libreville, Brazzaville na Douala, hifuzwa kongeraho Bamako na Conakry.

U Rwanda rumaze gusinya amasezerano nk’aya 75.

Ambasaderi Domenico Fornara na Minisitiri Gatete Claver basinya amasezerano yatumye RwandAir yemererwa gukoresha ibibuga byo mu Butaliyani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza