Sudani y’Epfo: Abapolisi b’u Rwanda begukanye ibihembo mu gusiganwa ku maguru

Yanditswe na IGIHE
Kuya 14 Gashyantare 2018 saa 07:12
Yasuwe :
0 0

Abapolisi b’u Rwanda bari mu butumwa bwo kubungabunga amahoro bw’Umuryango w’Abibumbye muri Sudani y’Epfo (UNMISS) bitabiriye isiganwa ku maguru ry’intera ireshya na kilometero 10 rigamije guteza imbere ubuzima bwiza bw’abari mu bikorwa byo kubungabunga amahoro muri iki gihugu.

Iri siganwa ryitabiriwe n’abarenga ijana barimo abapolisi babungabunga amahoro bo mu bihugu bitandukanye birimo n’u Rwanda n’abandi bakozi b’Umuryango w’Abibumbye baturuka mu bihugu bitandukanye.

Abapolisi batanu bari mu bagize itsinda ry’abapolisi b’u Rwanda (RWAFPU2) bakorera mu Murwa Mukuru Juba nibo bahagarariye bagenzi babo muri iri siganwa. Ryateguwe n’umuryango wa gikirisitu ukorera mu bihugu bitandukanye (United Christians Assembly of Nations (UCAN).

Abapolisi b’u Rwanda bitwaye neza muri iri rushanwa dore ko begukanye imyanya ine ya mbere ndetse banahabwa ibihembo bitandukanye.

Rose Martin-King washinze uyu muryango wa gikirisitu (UCAN) mu 2013, ni umunya-Liberia akaba n’umukozi w’Umuryango w’Abibumbye, yashimiye abagize uruhare bose mu gutuma iri rushanwa rigenda neza, abibutsa ko ubuzima bwiza ariryo shingiro ry’ibikorwa byiza bageraho. Uyu muryango ufite intego zo gufasha abakene no kurengera imiryango iri mu kaga.

Yagize ati “Kubungabunga amahoro ntibishobora kugerwaho igihe abakozi b’Umuryango w’Abibumbye badafite ubuzima bwiza. Mukwiye guhorana intego yo kwirinda indwara zirimo izandura n’izitandura, kuko bizabafasha kubungabunga amagara yanyu no gukora neza akazi kanyu ka buri munsi. Nshimiye abitwaye neza mw’isiganwa ry’uyu munsi.’’

Umuyobozi w’itsinda ry’abapolisi babungabunga amahoro muri Sudani y’Epfo (RWAFPU2), ACP Bosco Rangira, yashimiye abateguye iri isiganwa, ashimangira ko imyitozo ngororamubiri iri mu bituma babasha kuzuza inshingano zabo.

Yagize ati ‘’Abapolisi b’u Rwanda babungabunga amahoro mu butumwa bw’Umuryango w’Abibumbye bazakomeza imyitozo igamije guhora bafite ubuzima bwiza, hagamijwe kubungabunga amahoro n’umutekano w’abaturage.’’

Polisi y’u Rwanda ifite abapolisi bagera kuri 400 babungabunga amahoro mu butumwa bw’Umuryango w’Abibumbye muri Sudani y’Epfo.

Abapolisi b’u Rwanda bitabiriye iri siganwa bari kumwe na bagenzi babo nyuma yo kwegukana ibihembo
Umwe mu bapolisi b’u Rwanda witwa CPL Joseph Imenyabayo, ashyikirizwa igihembo na Rose Martin-King

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza