Twahirwa yasinye amasezerano ya miliyoni 500 $ yo kugemura urusenda mu Bushinwa

Yanditswe na Habimana James
Kuya 14 Nzeri 2019 saa 06:33
Yasuwe :
0 0

Twahirwa Dieudonné washize Gashora Farms ihinga ikanongorera agaciro urusenda, yasinye amasezerano ya miliyoni 100 z’amadolari ku mwaka, yo kohereza urusenda mu Bushinwa mu gihe cy’imyaka itanu.

Ni amasezerano y’imyaka itanu yasinyanye n’ikigo GK International Enterprises Company Limited cyo mu Bushinwa.

Muri aya masezerano Dieudonné Twahirwa, azajya ajyana mu Bushinwa toni ibihumbi 50 buri mwaka z’urusenda.

GK International Enterprise Co Ltd ni ikigo gikomeye mu Bushinwa, gisanzwe gitanga ibicuruzwa hirya no hino ku isi.

Aya masezerano aje nyuma y’aho Twahirwa wize ibijyanye n’ubuhinzi n’ubworozi muri Kaminuza y’u Rwanda, avuye mu kazi ke agatangira gukora ubuhinzi bw’urusenda mu myaka itatu ishize.

Twahirwa yavuze ko “u Bushinwa bufite isoko rinini ry’urusenda rutandukanye, ndizera ko tuzavanamo inyungu nyinshi nubwo hari byinshi ngomba gushora.”

Kugeza ubu Gashora Farms ijyana mu mahanga urusenda mu bihugu bitandukanye birimo u Bwongereza, u Busuwisi, u Buholandi, u Bubiligi, u Bufaransa, u Buhinde na Leta Zunze Ubumwe za Amerika.

Nyuma y’imyaka 3 atangiye akazi ko guhinga urusenda, ubu Gashora Farms yaguye ibikorwa biva kuri hegitari eshashatu zigera kuri hegitari 160.

Imibare itangwa na Banki y’isi igaragaza ko Gashora Farms isarura toni 10 buri gihembwe cy’ihingwa.

Mu 2017 nabwo yasisanye amasezerano n’ikigo Kai Jiang Xian zi Wei Food amasezerano nk’aya, bizatuma yohereza urusenda mu bihugu bya Aziya birimo u Buhinde.

Twahirwa yavuze ko “Abashinwa bafite inyungu ikomeye mu kugura umusaruro wo muri Afurika, kandi bafata umusaruro wanjye ko ari mwiza cyane, bakunda kuwugura ku bwinshi.”

Nyuma yo kurangiza amasomo ye mu mwaka wa 2012, muri 2013 yaje kubona akazi k’igihe gito (amezi atatu) mu ruganda Horizon Sopyrwa ruhinga ibireti rukanabitunganya ,karangiye yinjira mu bikorwa by’ubuhinzi.

Mu kiganiro aherutse kugira na IGIHE, Twahirwa yavuze ko yatangiye ahinga inyanya na watermelon ku bufatanye na mugenzi we, buri wese atangije ibihumbi 500 by’amafaranga y’u Rwanda, ariko ngo yaje kubireka bitewe n’ihindagurika ry’ibiciro ku masoko ku buryo yabonaga bitangiye kumugusha mu gihombo.

Urusenda agurisha mu mahanga ruri mu byiciro birimo urubisi (Fresh bird eye chili) n’urwumye (Dry Africa bird eye chili).

Twahirwa yasinye amasezerano ya miliyoni 100 z'amadorali yo kugemura urusenda mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza