U Rwanda mu bihugu bizungukira muri gahunda ya miliyoni $27 ya Ivanka Trump

Yanditswe na IGIHE
Kuya 11 Nyakanga 2019 saa 09:30
Yasuwe :
0 0

Gahunda ya Leta Zunze Ubumwe za Amerika irangajwe imbere na Ivanka Trump igamije kongerera ubushobozi abagore, igiye gushorwamo miliyoni $27, ikazagera ku mishinga itandukanye yo mu bihugu 22 birimo n’u Rwanda.

Ubwo yari mu kiganiro cyateguwe n’Ikigo cy’Abanyamerika Gishinzwe Iterambere Mpuzamahanga, (USAID), kuri uyu wa Gatatu, umukobwa wa Perezida Donald Trump, Ivanka Trump, yavuze ko kongerera ubushobozi abagore mu bijyanye n’ubukungu ari ingenzi mu iterambere, bikaba n’ingenzi ku mu kubaka umutekano w’igihugu icyo aricyo cyose.

Yavuze ko urebye ibihugu byinshi bizageramo iyi nkunga, "80% byahuye n’amakimbirane yakoreshejwemo intwaro mu binyacumi bibiri bishize."

Iyi gahunda yiswe Women’s Global Development and Prosperity Initiative (W-GDP) yatangijwe muri Gashyantare, aho izanyuzwamo ishoramari rya miliyoni $50 binyuze muri USAID.

Ifite intego yo gufasha abagore miliyoni 50 bo mu bihugu biri mu nzira y’amajyambere kugeza mu 2025, biciye mu bikorwa bya guverinoma ya leta zunze ubumwe za Amerika, ubufatanye bwa leta n’abikorera n’andi mafaranga azatangwa hagamijwe gushishikariza ubufatanye bw’ibigo n’imiryango itari iya leta.

Umuyobozi wa USAID, Mark Green, yavuze ko "kongerera abagore ubushobozi byubaka ibihugu bifite ubushobozi bwo guhangana ndetse bikabasha kwigira.”

Muri iyo mishinga izafashwa harimo iyo mu Rwanda y’abagore bakora mu bijyanye n’urwego rw’ingufu, imishinga yo muri Amerika y’Epfo igamije kubafasha gukora mu rwego rw’ikoranabuhanga mu bihugu bya Bresil, Chili, Colombia, Mexique na Peru, ndetse na gahunda yo gufasha abagore mu bworozi bw’inkoko muri Indonesie.

U Rwanda ni igihugu gikomeje gukora byinshi mu guteza imbere abagore mu nzego zose, aho ruza imbere ku Isi mu kugira umubare munini w’abagore mu buyobozi, barimo 61% mu Nteko Ishinga amategeko na 50% muri Guverinoma, ndetse mu mwaka ushize rwaje ku mwanya wa gatandatu ku Isi n’uwa mbere muri Afurika mu kuziba icyuho mu buringanire hagati y’abagabo n’abagore.

Ivanka Trump akomeje gushyira imbaraga mu bikorwa bigamije guteza imbere abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza