Ubwato Perezida Kagame yahaye abanye-Nkombo buzongera gukora bitarenze uku kwezi

Yanditswe na Evariste Nsengimana
Kuya 11 Kanama 2018 saa 03:55
Yasuwe :
0 0

Minisiteri y’ibikorwa remezo (Mininfra) yatangaje bitarenze uku kwezi kwa Kanama, izaba yakemuye ikibazo cy’ubwato Perezida Kagame yahaye Abanye-Nkombo bumaze amezi atandatu buparitse, bukazaba bukora imirimo ibabyarira inyungu.

Abatuye ku kirwa cya Nkombo giherereye mu kiyaga cya Kivu, bamaze igihe binubira ko ubwo bwato bwahagaze guhera muri Gashyantare 2018, nyuma y’ukuzura k’umuhanda wa Kivu Belt watumye bubura abagenzi.

Uwitwa Musenge Emmanuel utuye ku Nkombo, aheruka kubwira IGIHE ko yifuza ko ubwo bwato bahawe mu 2012, bwakongera gukora bukababyarira inyungu.

Yagize ati "Ubu bwato bwadufashaga mu iterambere kuko bwa mbere bahaye abaturage mituweli bivuye mu musaruro wabwo ndetse no ku nshuro ya kabiri babahaye ihene bityo bibafasha kwikura mu bukene."

Umunyamabanga wa Leta muri Mininfra, ushinzwe gutwara abantu n’ibintu, Eng Uwihanganye Jean de Dieu, yabwiye Radiyo Rwanda, ko bwahagaze kubera ko byatewe nuko kuva Rusizi bugera i Rubavu bwakoreshaga amasaha agera ku 10 mu gihe unyuze mu mihanda ya Kivu Belt iheruka gukorwa neza akoresha amasaha ane, bituma bubura ababugana.

Ati “Ibyo biri mu mpamvu twavuga ko zikomeye zatumye bagenda babura abagenzi ntibwabasha gukomeza gukora.”

Eng. Uwihanganye yavuze ko mu gushaka gisubizo kirambye, babusuye bakumvikana n’abandi bireba ko hoherezwa itsinda ry’abatekinisiye rigamije kureba icyakorwa.

Ati “Mu myanzuro ryaduhaye, ryagaragaje ko dukeneye inyigo ikomeye irenze iyabo. Nabyo twabikozeho ku buryo dufite umutekinisiye mpuzamahanga mu by’amato uri hano mu Rwanda. Guhera mu byumweru bibiri biri imbere, azaturebera, aduhe impamvu.”

Yakomeje agira ati “Twihaye gahunda ko tuzaba twakemuye ikibazo cy’ubwo bwato mu mpera z’Ukwezi kwa Munani. Dusanze koko hari icyo twakora bukihuta tukaba twabusubizamo cyangwa se tukaba twanabwegurira abikorera ku giti cyabo bakabukoresha mu yindi mirimo.”

Imwe muri iyo mirimo, ni nk’ubwikorezi bw’ibintu, cyane cyane ubw’umucanga, ibikoresho by’uruganda rukora Sima rwa Cimerwa n’ibindi binyuzwa mu kiyaga cya Kivu.

Eng Uwihanganye yasobanuye ko nta kibazo cy’abaturage babura uko bagenda kuko uretse ubwo bwato, hari ubundi bubiri bwaguzwe buvuye mu rwunguko rw’ubwa mbere ariko ngo mu gihe kirambye, hari imishinga ikomeye ihari yo kongerera imbaraga ubwikorezi mu Kiyaga cya Kivu.

Iyo mishinga irimo kubaka ibyambu nk’icya Rusizi, Karongi, Nkora i Rutsiro n’icya Rubavu, inyigo zabyo zamaze kuvugururwa ku buryo kubyubaka bizakorwa bitarenze Gicurasi 2018, muri Kamena 2020 bikazatangira kubyazwa umusaruro, kuzana ubundi bwato bugezweho, burimo ubwo Perezida Kagame yemereye abatuye Nkombo II, bazagezwaho muri Kanama 2019.

Ubwato Perezida Kagame yahaye abanye-Nkombo bumaze amezi atandatu buparitse kubera ko abagenzi bwatwaraga basigaye bagenda n'imodoka zinyura mu muhanda wa Kivu Belt

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza