Uko icyumba ntangamibare cyagabanyije ubusinzi, amakimbirane no guta amashuri muri Sake

Yanditswe na Hakizimana Jean Paul
Kuya 10 Nyakanga 2019 saa 04:23
Yasuwe :
0 0

Mu midugudu yose uko ari 34 , mu bigo by’amashuri birindwi ndetse no mu Kigo Nderabuzima biherereye mu Murenge wa Sake wo mu Karere ka Ngoma, batangije uburyo bushya bwo gukurikirana no kumenya ibibera mu midugudu yabo hifashishijwe icyumba ntangamibare.

Ni icyumba kibarizwamo amakuru yose y’urwo rwego, urugero nko ku mudugudu usangamo bimwe mu bibazo bibangamiye imibereho y’abaturage baho, ingo zifitanye amakimbirane, abaturage babaswe n’ubusinzi, ingo zitarara mu nzitiramibu, ingo zikoresha agatadowa n’ibindi byinshi biguha ishusho rusange y’uwo mudugudu winjiyemo.

Ni ibintu byafashije abaturage bo muri uyu Murenge cyane ngo kuko mbere hari ingo 82 zifitanye amakimbirane none ubu mu murenge wose hasigaye ingo 28.

Hategekimana Jean Bosco n’umugore we Uwamahoro Jennifer, bavuga ko urugo rwabo rwahoze rurimo amakimbirane kuburyo bakundaga kwiyamwa n’abaturanyi cyane kubera gutongana buri munsi.

Baje gushyirwa ku rutonde rw’ingo zirangwamo amakimbirane mu mudugudu wa Nyagasozi, bituma bicara barisuzuma.

Hategekimana yagize ati “Buri muturage yarazaga akatubwira ngo tumanitse mu cyumba kiri kwa mudugudu mu ngo zigaragaramo amakimbirane, ukibaza impamvu mu mudugudu wose ari wowe ukwiye kumanikwa muri icyo cyumba, njye n’umugore wanjye twaricaye dusanga ntibikwiye ko duhama kuri urwo rutonde duhitamo gushyira hamwe.”

Icyumba ntangamibare ku bigo by’amashuri

Mu bigo birindwi biri muri uyu Murenge wa Sake, buri kigo gifite icyumba ntangamibare. Iki cyumba kikaba kimaze gutuma mu banyeshuri 38 bari barataye ishuri mu mwaka wa 2018, abagera kuri 18 barigarukamo mu gihe abandi 19 hamenyekanye amakuru yabo.

Mu byumba byose byo ku mashuri usangamo imibare igaragaza abana bataye ishuri, ababyeyi babo ndetse naho baturuka. Usangamo imibare y’abana basibye muri icyo cyumweru bigafasha ubuyobozi n’abarimu kubakurikirana hakiri kare batarata ishuri.

Umuyobozi w’ikigo cya Nshiri, Nduwimana Emmanuel yagize ati “ Muri iki cyumba dufitemo imibare igaragaza abana bize nabi mu cyumweru gishize, ibyo bituma nk’ubuyobozi dufatanyije n’ababyeyi duhita dutangira gukurikirana wa mwana tukamenya impamvu mu cyumweru gishize yize asibagurika umubyeyi agatanga impamvu.”

Ndamyumugabe Jean de Dieu umaze imyaka itandatu yigisha indimi ku Ishuri Ryisumbuye rya Sake avuga ko iki cyumba cyatumye ireme ry’uburezi ryiyongera.

Ati “ Bituma umwarimu yongera ireme ry’uburezi atanga akanakurikirana ba bana bata ishuri ndetse n’abasiba isomo rye kuburyo na we atanga amakuru ku banyeshuri basibye bigatuma bakurikiranwa n’ubuyobozi. Mbere byaragoranaga kuko ubuyobozi wasangaga aribwo butanga raporo gusa.”

Icyumba ntangamibare ku Kigo Nderabuzima

Ku kigo Nderabuzima cya Rukoma naho hari cyumba ntangamibare aho gikubiyemo ibirimo ubuzima bw’umwana n’umubyeyi, uko bakurikiranwa uhereye ku mujyana w’ubuzima, imibare y’abaturage bivuje mu kwezi gushize, indwara yahagaragaye cyane, imibare y’abivurije ku bajyanama b’ubuzima, abana bafite ikibazo cy’imirire mibi n’ibindi.

Umuyobozi w’Iki kigo nderabuzima cya Rukoma Sr Godeberthe Uwimana yagize ati “Mu gihe gito iki cyumba kimaze cyatugiriye akamaro kanini cyane, ubundi usanga imibare dushyira hano dusanzwe tuyifite ariko iri inyuma iyo mu mpapuro na raporo ariko aho tuyishyiriye hanze uhita umenya muri buri serivisi ibiri kuhakorerwa uko bizamuka ndetse nuko byadindiye.”

Umunyamabanga Nshingwabikorwa w’Umurenge wa Sake, Mukayiranga Marie Gloriose avuga ko iki cyumba cyakomotse ku byumba by’imihigo basanganwe ku murenge.

Yagize ati “Tujya gutekereza ku byumba ntangamibare byahereye kuri gahunda y’intara yadusabaga kugira icyumba cy’imihigo ku rwego rw’umurenge n’akagali. Uko twagendaga tuganirira ku meza y’imihigo nibwo abaturage badusabye ko icyo cyumba cyamanuka kikagera ku rwego rw’umudugudu kuko nibyo byatanga umusaruro cyane.”

Uyu muyobozi yakomeje avuga ko byaboroheye cyane gukemura ibibazo byakundaga kurangwa mu baturage.

Ati “Iyo ninjiye mu cyumba cy’umudugudu nkasanga handitsemo ko nko kwa Yohani ari abantu babana mu buryo bw’amakimbirane, biramfasha cyane kuko mpita ngenda nkabareba nkabaganiriza kuburyo bisubiraho ndetse na wa muturage wibonye muri icyo cyumba ashaka uko yisubiraho.”

Umurenge wa Sake uherereye mu Karere ka Ngoma, utuwe n’abaturage 27 366, ukagirwa n’utugari tune ndetse n’imidugudu 34.

Umuyobozi w'umudugudu wa Nyagasozi Habarurema Jean Marie Vianney avuga ko kuva aho batangiye kugaragaza amakuru yose yo muri uyu mudugudu hahise haboneka impinduka mu bibazo byari bibugarije
Umuyobozi w'Ikigo Nderabuzima cya Rukoma Sr Godeberthe Uwimana avuga ko ubusanzwe aya makuru babaga bayafite mu bitabo byabo ariko aho bayashyiriye ahagaragara buri muturage araza akamenya uko mu mudugudu hahagaze
Umunyamabanga nshingwabikorwa w'Umurenge wa Sake, Mukayiranga Marie Gloriose avuga ko iki cyumba ntangamibare cyatumye buri wese amenya inshingano ze neza
Ibyumba bikorerwamo n'abajyanama b'ubuzima nibyo byahise bihindurwa n'ibyumba ntangamibare mu Murenge wose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza