Umubyeyi wizihiwe! Uko umwana wa Uwizeye yarerewe mu kigo kiri mu ruganda rw’icyayi

Yanditswe na IGIHE
Kuya 9 Ukwakira 2019 saa 08:53
Yasuwe :
0 0

Ku wa 29 Kanama 2017 nibwo Ishami ry’Umuryango w’Abibumbye ryita ku Bana (UNICEF) ryasinyanye n’Ikigo cy’Igihugu gishinzwe kohereza mu mahanga ibikomoka ku buhinzi mu Rwanda (NAEB) amasezerano y’ubufatanye mu by’ubujyanama na tekiniki mu gushimangira iyubahirizwa ry’uburenganzira bw’abana barimo abajyanwa n’ababyeyi babo bakora mu mirima y’icyayi.

Aya masezerano amaze imyaka ibiri ashyizweho umukono ari mu cyerekezo UNICEF cyo kwita ku buzima bw’umwana, imirire ye n’imikurire bijyana no guharanira uburenganzira bw’abajyanwa mu mirimo ivunanye nko gukora mu cyayi.

Mu byo yibanzeho harimo gufasha ababyeyi bakora mu cyayi bafite abana kubona amarerero babashyiramo, bagakurikiranwa.

Uwizeye Jean de Dieu ukora mu Ruganda rw’Icyayi rwa SORWATHÉ ruri mu Murenge wa Kinihira mu Karere ka Rulindo ari mu bungukiye muri iyi gahunda ya UNICEF.

Uyu mugabo w’imyaka 30 buri gitondo ajyana ku kazi umwana we w’umukobwa [Anitha], aho ahererwa uburezi mu Kigo kiri mu ruganda gifashwa na UNICEF.

Mu gihe cy’akazi, Anita aba akina na bagenzi bakurikiranwa n’ababitaho babihuguriwe. Afata ifunguro rya mu gitondo n’irya saa Sita mbere yuko umubyeyi we amucyura ndetse aba yizeye ko umukobwa we ari mu biganza bitekanye.

Uwizeye yavuze ko akunda cyane kuvana umwana we ku kazi, bakajya gutaramana mu rugo.

Yagize ati “Igihe nishimira ni ubwo mba mfashe Anitha mukuye mu kigo nyuma y’akazi kuko tuba tugiye kumarana umwanya munini turi kumwe mu rugo.’’

Yakomeje avuga ko umwana we akunda by’umwihariko kuririmba no guhimba indirimbo ze.

Amwenyura, yagize ati “Akunda ko turirimbana, rimwe na rimwe aririmba indirimbo ze. Buri gihe simba nzi ibyo ari kuririmba ariko ngerageza kumufasha.’’

Uwizeye kandi anakorera umwana we ibikinisho yifashishije ibikoresho birimo amacupa ya pulasitiki n’amajerekani byashaje.

Ati “Igikinisho akunda ni imodoka nto ikozwe mu bikoresho bitandukanye.’’

Uyu mubyeyi wishimira cyane gukinana na Anitha avuga ko yamenye agaciro ko kwita ku mwana mu mikurire ye.

Yagize ati “Mukuru wa Anitha ntabwo buri gihe nakinaga na we. Ntekereza ko ntumvaga akamaro k’ingenzi ko kubona umubyeyi akina n’umwana we.’’

UNICEF yafashije ababyeyi barimo Uwizeye kumenya agaciro k’iminsi ya mbere 1000 mu buzima bw’umwana n’uburyo iyo yitaweho ashobora gukura neza.

Anitha ni umwana ukina kandi umubyeyi we ahamya ko inyungu zibirimo agenda azibona umunsi ku wundi.

U Rwanda rwateye intambwe mu kwita ku mibereho n’uburezi by’umwana. Ibi biri mu ntego Isi yihaye ko abana bose bazaba bafite uburenganzira ku marerero n’uburezi bubanziriza amashuri y’incuke bitarenze 2030.

Hagati ya 2015 na 2017, abana 850 bakuwe mu mirimo yo gukora mu cyayi, muri bo 520 bigishijwe imyuga irimo kubaza, gusudira, kudoda, kuboha n’iyindi.

Uwizeye n'umwana we Anitha nyuma y'akazi ajya kumufara aho barererwa
Uwizeye afite akajerekani akina n'umwana we. Yavuze ko akiri umwana yatwaraga amajerekani aremereye ariko ubu ayakoramo ibikinisho by'umukobwa we
Uwizeye aryoherwa no kuba hamwe n'umukobwa we mu masaha ya nyuma y'akazi
Uwizeye Jean de Dieu w'imyaka 31 akina n'umwana we

Amafoto: UNICEF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza