Umujyi wa Kigali urateganya kwimura imiryango ibihumbi 13 ituye mu manegeka

Yanditswe na Evariste Nsengimana
Kuya 30 Nyakanga 2018 saa 08:43
Yasuwe :
1 2

Ubuyobozi bw’Umujyi wa Kigali, bwatangaje ko buteganya kwimura imiryango ibihumbi 13 ituye ahantu hashobora gushyira ubuzima bwayo mu kaga.

Byatangajwe kuri iki cyumweru n’Umuyobozi w’Umujyi wa Kigali, Marie-Chantal Rwakazina, mu nama y’abanyamuryango ba RPF Inkotanyi muri uwo mujyi.

Iyo nama yanemerejwemo ko Rwakazina aba Umuyobozi Mukuru wa RPF Inkotanyi mu Mujyi wa Kigali, agasimbura Nyamulinda Pascal, uheruka kwegura.

Uyu muhigo Umujyi wa Kigali uwihaye nyuma y’aho imvura yaguye mu gihembwe cya mbere cya 2018, yahitanye abantu basaga 200 mu gihugu hose, ikangiza n’ibikorwa remezo bitandukanye.

Rwakazina yatangaje ko kwimura iyo miryango ituye mu manegeka, bizahera ku batuye ku misozi ya Rebero na Jali, mbere y’uko igihe cy’imvura nyinshi kigera.

Yagize ati “Nk’umuyobozi wa RPF-Inkotanyi mu Mujyi wa Kigali mbereye umuyobozi, niyemeje kwihutisha umushinga wo kwimura imiryango irenga ibihumbi 13 ituye mu manegeka mu mujyi, mu gihe cy’umwaka umwe, nka kimwe mu bikorwa byo kuvugurura imiturire, gutegura umujyi uboneye, ufite isuku ariko na none no kurinda abaturage ibiza.”

Rwakazina yavuze ko kwimura abatuye mu manegeka bizahera ku miryango ibabaye cyane kurusha indi, cyane cyane ituye ku misozi ihanamye n’imiryango ifite inzu zidakomeye, kikazakomereza ku bandi uko ubushobozi buzagenda buboneka.

Icyo gikorwa kizakurikiranwa n’ibiro bishinzwe imiturire mu Mujyi wa Kigali.

Umujyi wa Kigali wavuze kandi ko hari gukorwa ubukangurambaga ku muryango ituye mu manegeka kugira ngo nayo igire icyo ikora mu kwirinda ibyashyira mu kaga ubuzima bwayo.

Kwimura imiryango ituye mu manegeka ni kimwe mu bikorwa by’ingenzi biteganywa n’igishushanyo mbonera cy’umujyi kirimo kuvugururwa.

Umujyi wa Kigali uvuga ko icyiciro cya mbere cyagezweho ku kigero cya 75% ugereranije n’intego wari wihaye nk’uko The New Times yabitangaje, ngo hagiye habaho imbogamizi zijyanye n’amikoro bituma kitagerwaho 100%.

Ibarura riheruka gukorwa n’umujyi wa Kigali, ryerekanye ko imiryango isaga ibihumbi 34 ariyo ituye mu buryo bw’akajagari.

Kwimura iyi miryango, bizahera ku bafite ubushobozi buke n'abafite inzu zidakomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza