Umuryango w’Abibumbye wakirije yombi icyemezo cya Kabila cyo kutiyamamaza

Yanditswe na Akayezu Jean de Dieu
Kuya 11 Kanama 2018 saa 07:58
Yasuwe :
0 0

Umunyamabanga Mukuru w’Umuryango w’Abibumbye, António Guterres, yashimye bikomeye icyemezo cyafashwe na Perezida wa Repubulika Iharanira Demokarasi ya Congo, Joseph Kabila, cyo kutongera kwiyamamariza kuyobora iki gihugu.

Joseph Kabila umaze imyaka igera kuri 17 ku butegetsi bwa RDC yafashe umwanzuro w’uko ataziyamamariza manda ye ya gatatu, yemera gukurikiza ibiteganywa n’Itegeko Nshinga ry’iki gihugu.

Mu itangazo ryashyizwe ahagaragara n’Umuvuguzi wa Guterres kuri uyu wa 9 Kanama, Loni yavuze ko yishimiye icyemezo cya Kabila kandi ko izakomeza kugira uruhare mu mitegurire y’aya matora ateganyijwe mu Ukuboza uyu mwaka.

Iri tangazo rigira riti “Umunyamabanga Mukuru yafashije bikomeye mu bikorwa byo gutegura amatora ya Perezida n’ay’Abadepite azaba ku wa 23 Ukuboza 2018 muri RDC.”

Loni ivuga ko izakomeza gukorana bya hafi na guverinoma ya RDC n’abaturage bayo muri rusange by’umwihariko mu kugira ngo amatora azagende neza kandi habeho guhererekanya ubutegetsi mu nzira zinyuze mu mucyo.

Ku wa 8 Kamena 2018, nibwo Kabila yatangaje ko atazayimamariza gukomeza kuyobora RDC, kuko manda ebyiri yemererwa n’Itegeko Nshinga ry’iki gihugu zarangiye mu mpera za 2016, ariko ntahite ava ku butegetsi kuko atari yakabonye umusimbura binyuze mu nzira z’amatora.

Ihuriro ry’amashyaka ari ku butegetsi ari naho Kabila abarizwa, ryemeje ko muri aya matora rizahagararirwa na Emmanuel Ramazani Shadary, wigeze kuba Minisitiri w’umutekano.

Umunyamabanga Mukuru wa Loni Antonio Guterres yashimye icyemezo cya Kabila

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza