Umusoro ku butaka wongerewe, hashyirwaho umwihariko ku bafite ibibanza bidakoreshwa

Yanditswe na Mathias Hitimana
Kuya 4 Kanama 2018 saa 07:51
Yasuwe :
0 0

Itegeko rishya ryatowe n’Inteko Ishinga Amategeko rigena umusoro ku mutungo utimukanwa ryazanye impinduka ku misoreshereze y’ubutaka, rinakoma mu nkokora abaguraga ibibanza byo kubakamo bakabibika.

Iri tegeko ryatowe ku mugoroba wo ku wa 2 Kanama 2018 riteganya ko umusoro ku butaka wasimbuye amahoro yishyurwaga ku butaka, uzajya utangwa ku gipimo kigenwa n’Inama Njyanama kuri metero kare, ariko icyo gipimo kikaba hagati ya 0 na 300 Frw kuri metero kare, mu gihe byari bisanzwe biri hagati ya 30-80 Frw/m2.

Perezida wa Komisiyo y’Ingengo y’Imari n’Umutungo by’Igihugu mu mutwe w’Abadepite, Mukayuhi Rwaka Constance, yavuze ko muri uwo musoro ku butaka hazacibwa intege abadakoresha ubutaka uko bikwiye, barimo abaguraga ibibanza ntibabyubakemo ibihagenewe bategereje kuzabyungukamo mu kubigurisha.

Yagize ati “Ku kibanza kidakoreshwa kizajya gicibwa umusoro w’inyongera, kizajya gisoreshwa uko biteganyijwe ariko gicibwe umusoro wa 100 % urenze ku gipimo gisanzwe.”

Ikindi umuntu ufite ikibanza kirengeje 300 m2 zigenewe ubutaka bwo guturaho, azajya acibwa umusoro wiyongereyeho 50 % kuri buri m2 irenzeho. Undi musoro ni uwavuye kuri 0.1% ukagera kuri 1% ku nzu yo guturamo idatuwemo na nyirayo.

Mu gutanga ibitekerezo ku mushinga w’itegeko, Depite Nkusi Juvenal yatewe impungenge n’uku kongera ry’umusoro ku nzu yo guturamo ndetse n’uw’ubutaka, kandi n’ubusanzwe abaturage bajyaga bavuga ko ubaremereye.

Yagize ati “Aho twajyaga hose ikibazo abaturage batugezagaho ni icyo gusorera ubutaka none tuwukubye inshuro 10. Twabirebye neza? Ubu umuntu wasoraga ibihumbi 5 Frw muzamwishyuza ibihumbi 50 Fw abibone na 5000 Frw atarabitangaga, umuntu wishyuraga ibihumbi 50 Frw muzamwishyuza ibihumbi 500 Frw abibone?”

Depite Mukayuhi yerekanye ko iyongerwa ry’uwo musoro byari ngombwa kuko uturere mbarwa aritwo twabona 10 % by’ingengo dukoresha, nyamara dukeneye gukora byinshi tudashingiye ku yo duhabwa na Guverinoma.

Ati “Uko tugenda dutera imbere ni ko abaturage basaba byinshi, niba hari umuhanda w’igitaka barashaka uwa kaburimbo, niba amazi ari muri metero 500 barayashaka imuhira.”

Yerekana ko u Rwanda rudakabije nubwo atari ukwigana uko abandi bakora kuko Uganda isoresha 12%; Tanzania (1%); Kenya (22%).

Yashimangiye ko abazasoreshwa ari abishoboye bafite inzu zindi zifite icyo zibinjiriza, kandi igipimo cy’umusoro cya 1% by’agaciro k’inyubako kizagerwaho mu gihe cy’imyaka ine.

Ku mwaka wa mbere ukurikira igihe iri tegeko rizaba ritangiye gukirikizwa igipimo cy’umusoro kizaba 0.25%; cyiyongere kuri 0.5% mu mwaka wa kabiri; kuri 0.75 % mu mwaka wa gatatu; mbere yo kugera kuri 1% guhera ku mwaka wa kane.

Nubwo umusoro w’ubutaka n’ibibanza wajemo impinduka ukazamuka, umuturage wo mu Karere ka Nyarugenge witwa Mukarulinda Violette unahafite ubutaka, yagaragaje ko ikibazo gikomeye atari umusoro ku butaka, ahubwo imbogamizi ziba mu kububyaza umusaruro, bityo abaturage bakwiye koroherezwa.

Uwizeyimana Justin ufite ikibanza muri Gasabo, we yabwiye IGIHE ko kuzamura umusoro ku bibanza bishobora kuzabera imbogamizi umuntu wajyaga agura ikibanza agategereza kuzacyubaka yabonye amikoro.

Ati “Ubusanzwe ikibanza kukigura ntucyubake hari ubwo biterwa n’ubushobozi buke, waba ufite nka bibiri warabiguze kuri make, ugategereza ko kizamura agaciro ngo uzabone uko nawe ubigurisha ugire icumbi. Niba umusoro wazamutse, nibitangira umuntu nukuzabibara, wabona ugiye guhomba ukakirekura.”

Abafite ubutaka mu Mujyi wa Kigali wa Kigali bahuriza cyane ku kunoza igishushanyo mbonera cy’umujyi, ahari ubutaka bw’ubuhinzi ntibusoreshwe nk’ubwagenewe ubucuruzi.

Itegeko rishya ryatowe kandi ryasoneye ubutaka bukoreshwa ubuhinzi n’ubworozi, butarenze hegitari ebyiri.

Ibibanza bidakoreshwa bizajya bisoreshwa mu buryo bwihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza