Urubyiruko rwa Arkidiyosezi Gatolika ya Kigali rwatanze amaraso yo gufasha indembe

Yanditswe na Evariste Nsengimana
Kuya 6 Kanama 2018 saa 07:53
Yasuwe :
0 0

Urubyiruko 300 rwo muri Paruwasi 30 zigize Arkidiyosezi Gatolika ya Kigali, rwatanze amaraso ahabwa abarwayi b’indembe kwa muganga.

Iki gikorwa cyabereye mu Karere ka Gakenke kuri uyu wa Mbere, aho urubyiruko 1500 rwo muri Arkidiyosezi ya Kigali rwari rumaze iminsi itanu mu ihuriro ryarwo.

Padiri Jean de Dieu Nshimiyimana, ushinzwe urubyiruko muri Arkidiyosezi ya Kigali, yavuze ko gutanga amaraso ari igikorwa cy’urukundo abakristu cyane cyane urubyiruko bakwiriye gukora.

Ati “Twumvikanye ko igikorwa cy’urukundo n’impuhwe twakora ari ugufashisha amaraso imbabare. Urubyiruko rw’Abagatolika rugomba kuyatanga kuko ibikorwa by’urukundo birabareba kandi barabizi ko kuyatanga ari ugutanga ubuzima. Iyo uyatanze, hari benshi uba ukijije. Ikindi, uyu munsi urayatanga, ejo nawe uzayakenera.”

Urubyiruko 800 rwagaragaje ko rwifuza gutanga amaraso kandi rwujuje ibisabwa nk’ibiro, imyaka y’ubukure n’ibindi ariko ikigo cy’igihugu cyo gutanga amaraso kibasha kwakira ay’abagera kuri 300 uyu munsi, abandi bakazasangwa aho bakomoka mu zindi gahunda nk’izi zizategurwa.

Shema Janvière, umwe mu rubyiruko rwafashishije amaraso, yavuze ko mu ihuriro bashishikarijwe kuyatanga, akumva ari igikorwa cyiza, akiyemeza kucyitabira.

Ati “Ndi gutanga amaraso kubera ko hari bagenzi banjye bashobora kugira ikibazo cyo kuyahabwa bakayabura kandi nyafite. Nanjye wenda hari igihe nazagera nkayabura bakayampa.”

Umuhuzabikorwa w’urubyiruko muri Arkidiyosezi ya Kigali, Nkurunziza Théogène, usanzwe unayatanga we yagize ati “Nubwo ntamenya ngo amaraso yanjye yahawe kanaka, nishima iyo numvise ko yatabaye umuntu wari ugiye kubura ubuzima bwe.”

Umuyobozi w’agategenyo mu kigo cy’igihugu cyo gutanga amaraso, ishami rya Kigali, akaba anashinzwe ubukanguramba, Mukamazimpaka Alexia, yashimiye urwo rubyiruko na Kiliziya Gatolika mu gikorwa cy’indashyikirwa bakoze.

Ati “Iyo umuntu atanze amaraso inshuro imwe, ashobora kubyutsa icyarimwe abarwayi batatu ku gitanda cy’ibitaro.”

Umwaka ushize, abantu ibihumbi birenga 68 nibo batanze amaraso, ikigero cyo guhaza amaraso ibitaro kigera kuri 91,3%, intego ikaba ari uko uyu mwaka abayatanga bazarenga ibihumbi 75.

Mu ihuriro ry’urubyiruko rizasozwa kuri uyu wa Kabiri hatangirwamo inyigisho zigamije kururera ngo rukure runogeye Imana n’abantu, batorezwamo kwihangira umurimo, kwirinda ibiyobyabwenge, icuruzwa ry’abantu n’ibindi.

Urubyiruko 300 rwatanze amaraso yo gutabara indembe
Padiri Jean de Dieu Nshimiyimana, ushinzwe urubyiruko muri Arkidiyosezi ya Kigali, yavuze ko gutanga amaraso ari igikorwa cy’urukundo
Umuhuzabikorwa w’urubyiruko muri Arkidiyosezi ya Kigali, Nkurunziza Théogène, yavuze ko we asanzwe atanga amaraso
Umuyobozi w’agategenyo mu kigo cy’igihugu cyo gutanga amaraso, ishami rya Kigali, akaba anashinzwe ubukanguramba, Mukamazimpaka Alexia, yashimiye urwo rubyiruko na Kiliziya Gatolika mu gikorwa cy’indashyikirwa bakoze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza