Urukiko rwakatiye gufungwa burundu abasirikare bahamijwe kwica umuturage i Gikondo

Yanditswe na Jean Pierre Tuyisenge
Kuya 6 Ukwakira 2017 saa 11:33
Yasuwe :
0 1

Urukiko rwa Gisirikare rwakatiye gufungwa burundu abasirikare babiri bakurikiranyweho kurasa umuturage witwa Ntivuguruzwa Aime Yvan wari utuye i Gikondo agapfa.

Urubanza rwabereye mu ruhame baregwa ibyaha bitanu birimo ubufatanyacyaha mu bwicanyi, ubwambuzi bukoresheje kiboko, ubugande ku kazi, kurasa nta tegeko no konona ibintu by’undi ku bw’inabi, ibyo byaha byose babihamijwe.

Abo uko ari babiri bashinjwaga kuba mu ijoro ryo ku wa 9 rishyira ku wa 10 Gicurasi 2017, Pte Ishimwe Clausde ari kumwe na Pte Nshimiyumukiza Jean Pierre baroherejwe ku burinzi mu Kagari ka Rwampala, bigeze nijoro batangira kugenda bambura abantu ibyangombwa.

Umuhoza Claudine, umwe mu bo babyatse arabibura, umugabo we witwa Ntivuguruzwa Aime Yvan, aje kureba ibibaye bagirana amakimbirane bahita bamurasa arapfa.

Nshimiyumukiza yakomeje kurasa mu kabari kari aho hafi hameneka ibikoresho byari birimo, harimo frigo, radio, ibirahure, amadirishya n’ibindi.

Urukiko rwavuze ko rwasanze ibikorwa bakoze bihabanye n’amabwiriza bahawe bajya ku burinzi kuko babikoze babigambiriye nta tegeko bahawe ryo kurasa.

Urukiko rwanzuye ko Leta y’u Rwanda itagomba kuryozwa indishyi z’ibyaha byakozwe n’abo bombi kuko nta nyungu n’imwe ifite mu rupfu rwa nyakwigendera.

Urukiko rwemeje ko Nshimiyumukiza ahamwa n’ibyaha by’ubufatanyacyabaha mu bwicanyi, ubugande, kurasa nta tegeko n’icyaha cyo konona ibintu by’undi ku bw’inabi.

Ishimwe Claude yahamijwe ubufatanyacyaha mu bwicanyi, ubwambuzi bukoresheje ikiboko n’icyaha cyo kurasa nta tegeko.

Urukiko rwahanishije buri umwe igihano cy’igifungo cya burundu, runategeka ko abo basirikare ari bo bagomba kwiyishyurira indishyi zikomoka ku byaha bakoze.

Indishyi zizishyurwa

Banasabwe kwishyura indishyi zirimo iz’imbonezamusaruro zizahabwa uwari nyina wa nyakwigendera witwa Kampogo Esperance, zingana na miliyoni 3.5 Frw n’indishyi z’akababaro zingana na miliyoni 1.5 Frw, yose hamwe akaba miliyoni eshanu.

Abavandimwe ba nyakwigendera bagera kuri barindwi nabo bagomba guhabwa indishyi z’akababaro zingana na miliyoni imwe kuri buri umwe zose hamwe zikaba miliyoni zirindwi. Bakazahabwa n’ibyagendeye mu gushyingura bingana na miliyoni 1.5 Frw.

Bazahabwa kandi amafaranga yo gukurikirana urubanza angana n’ibihumbi 200 Frw; amafaranga y’ingwate y’amagarama angana n’ibihumbi 400Frw; amafaranga y’igihembo cya Avoka ibihumbi 700 Frw, yose hamwe akaba miliyoni 14.8 Frw.

Nyir’akabari kangijwemo ibikoresho yagenewe ibihumbi 500 Frw; yagenwe kandi ibihumbi 100 Frw kubera igihombo yatewe n’iminsi yamaze adakora; ikurikiranarubanza 50,000 Frw; igihembo cya Avoka 500,000 Frw; ingwate y’igarama y’ibihumbi 50 Frw; akazanahabwa indishyi zo kuba yaratakaje abakiriya baganaga akabari ke zingana n’ibihumbi 500 Frw; yose hamwe akaba miliyoni 1.7 Frw.

Umuhoza Claudine wari umugore wa nyakwigendera yagenewe indishyi z’akababaro zinga n’ibihumbi 500 Frw; indishyi mbonezamusaruro zingana n’ibihumbi 500 Frw; igihembo cya Avoka cy’ibihumbi 500 Frw; ikurikiranarubanza ringanana 50,000 Frw; yose hamwe akaba miliyoni 1.6 Frw.

Urukiko rwanzuye ko aba basirikare bazishyura indishyi zingana na 18,100,000 Frw ariko bose nta mitungo izwi bafite.

PTE Ishimwe Claude (ibumoso) na PTE Nshimyumukiza Jean Pierre bakatiwe gufungwa burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza