Ibintu bitangaje Bibiliya yagiye ivuga mbere y’uko Siyansi ibivumbura

Yanditswe na Iradukunda Serge
Kuya 12 Kanama 2019 saa 08:34
Yasuwe :
0 0

Hari ibibazo byinshi siyansi yagiye yibaza cyangwa igashidikanyaho nyamara Bibiliya yaragize icyo ibivugaho mu myaka myinshi yabanje, nyuma siyansi ikaza nayo kugaragaza ko koko ari uko biri.

Ubushakashatsi bugaragaza ko Bibiliya ari cyo gitabo gikuze kurusha ibindi kuko imaze imyaka isaga 2700. Mbere y’uko inkuru ziri muri Bibiliya zitangira kwandikwa zahererekanwaga mu magambo. Abahanga mu bya Bibiliya bagaragaza ko igitabo cy’Intangiriro ari cyo cya mbere cyashyizwe mu nyandiko mu myaka igera kuri 3400 ishize.

Siyansi igezweho yo yavutse mu kinyejana cya 17, ubwo havumburwaga ibikoresho nk’isaha na telescope.

Twabakusanyirije bimwe mu byo Bibiliya yagiye ivuga mbere y’uko siyansi ibigaragaza.

Isi itendetse ku busa

Bibiliya yavuze ibijyanye n’uko isi iri mu isanzure ntaho ifashe mbere y’uko siyansi igira icyo ibivugaho.

Ibyo bigaragara muri Yobu 26: 7 aho hagira hati "Ikasikazi yahashanjije hejuru y’ubusa, N’isi yayitendetse ku busa”.

Bibiliya yavuze iby’agace kagize ikintu ‘Atome’ mbere

Atome ni agace gato cyane katagaragara kagize ikintu cyose kiriho.

Bibiliya yavuze ibijyanye n’aka gace gato mbere, siyansi yo iza kuvumbura ko ikigaragara cyose kigizwe n’ibitagaragara (atome) mu kinyejana cya 19.

Mu gitabo cy’Abaheburayo 11:3 hagira hati “Kwizera ni ko kutumenyesha yuko isi yaremwe n’ijambo ry’Imana, ni cyo cyatumye ibiboneka bitaremwa mu bigaragara”.

Ubuhanga mu kubaka ubwato

Byafashe igihe abahanga mu kubaka ubwato kugira ngo bamenye ingero za nyazo bagomba gukoresha kugira ngo ubwato bushikame mu Nyanja aho, ingero z’uburebure zigomba kuba zikubye inshuro esheshatu ingero z’ubugari,

Nyamara Bibiliya yari yarabivuze igihe Imana yahaga Nowa itegeko ryo kubaka Inkuge.

Mu gitabo cy’Itangiriro 6: 15 hagira hati “Uyibaze utya: uburebure bw’umurambararo bw’iyo nkuge bube mikono magana atatu, ubugari bwayo bube mikono mirongo itanu, uburebure bw’igihagararo bwayo bube mikono mirongo itatu”.

Amasoko yo munsi y’inyanja

Mu 1970 nibwo abashakashatsi bavumbuye ko ku ndiba y’inyanja haba amasoko y’amazi, mbere abantu bumvaga ko inyanja zigaburirwa amazi n’imigezi izisukamo ndetse n’imvura gusa.

Mu gitabo cya Yobu Bibiliya yagize icyo ivuga kuri aya masoko yo mu ndiba y’inyanja. Muri Yobu 38:16 hagira hati “Mbese wageze ku masōko y’inyanja, Cyangwa wazerereye mu kuzimu kw’imuhengeri?”

Akamaro k’amaraso mu mubiri

Mu myaka 120 ishize abantu benshi iyo bakomerekaga bakava bakurizagamo gupfa , nyamara Bibiliya yo yari yarerekanye ko amaraso ari bwo buzima.

Mu Balewi 17:11 hagira hati “Kuko ubugingo bw’inyama buba mu maraso, nanjye nyabahereye gusukwa ku gicaniro ngo abe impongano y’ubugingo bwanyu, kuko amaraso ari yo mpongano, ayihindurwa n’ubugingo buyarimo”.

Gushyira umurwayi mu kato

Siyansi yamaze igihe kinini itarerekana uburyo umuntu ashobora kwandura indwara binyuze mu mwuka no gukoranaho kuko ntibyari bizwi ko zimwe mu ndwara zandura binyuze mu mwuka ndetse no gukoranaho, gusa Bibiliya yo yari yaragize icyo ivuga ku bijyanye no gushyira mu kato abantu bafite indwara zandura muri ubwo buryo.

Abalewi 13:45-46 hagira hati “Umubembe urwaye uwo muze agende yambaye imyenda ishishimutse, atendeje umusatsi, ajye yipfuka ubwanwa, ajye avuga cyane ati ‘Ndahumanye, ndahumanye.

Iminsi yose akirwaye uwo muze azaba ahumanye, arahumanye abe ukwe, ature hirya y’aho mubambye amahema.”

Guseka no kunezerwa ni umuti

Mu Migani 17: 22 hagira hati “Umutima unezerewe ni umuti mwiza, Ariko umutima ubabaye umutera konda”.

Kuri ubu siyansi yagaragaje ko guseka no kwishima bigabanye imisemburo itera uguhangayika, bikongera ubwirinzi bw’umubiri ukagira ubushobozi bwo kurwanya indwara.

Hari ibintu bitangaje Bibiliya yagiye ivuga mbere y’uko Siyansi ibivumbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza