Ibyatuma uryoherwa na St Valentin kandi nta mukunzi ugira

Yanditswe na Mukaneza M.Ange
Kuya 12 Gashyantare 2018 saa 01:30
Yasuwe :
1 0

Mu gihe Gashyantare ari ukwezi abakundana hirya no hino ku isi bongera kuzirikana no kwizihiza urukundo rwabo, ku batagira abakunzi biba bigoye kuko bongera guhura na byinshi bibibutsa ko bari bonyine kabone nubwo yaba ari yo mahitamo yabo.

Tariki ya 14 Gashyantare, ni bwo Kiliziya Gatolika yizihiza Mutagatifu Valentin (Saint Valentin), umurinzi w’abakundana. Nubwo inkomoko y’uyu munsi ishingiye ku idini usanga wizihizwa n’abantu b’ingeri zose, aho abashakanye n’abakirambagizanya bongera ibyo ari byo byose bigamije gutuma ikibatsi cy’urukundo kirushaho kugurumana.

Ku batagira abakunzi ariko ni igihe kigoye cyane kuko nubwo aba ari umunsi usanzwe w’akazi, dore ko mu Rwanda nta kiruhuko gitangwa, aho berekeje amaso hose bahabona bya bikorwa bituma bongera gutekereza ku rukundo.

Kutagira umukunzi ariko ntibikwiye gutuma kuri uyu munsi abandi bajya mu byishimo ngo wowe wigunge, kuko burya urukundo atari ururi hagati y’umukobwa n’umuhungu gusa.

IGIHE yagerageje kubakusanyiriza bimwe mu bikorwa ushobora gukora kuri St Valentin, bigatuma wongera kuvugurura imibereho yawe ndetse ukaba n’umwanya mwiza wo kongera gushimangira agaciro inshuti, abavandimwe n’umuryango bafite mu buzima bwawe.

Tegura umunsi mukuru n’inshuti zawe zitagira abakunzi

Kimwe mu byo ushobora gukora kuri St Valentin igihe utagira umukunzi, ni ugutegura umunsi mukuru ugatumiramo inshuti zawe na zo zitagira abo bakundana.

Muri ibi birori mushobora gusangira amafunguro n’ibinyobwa mukunda ndetse mugakora ibindi bikorwa bitandukanye bitewe n’icyo buri wese akunda.

Biba byiza kurushaho igihe mu munsi mukuru nk’uyu mwahuriyemo muri abakobwa cyangwa abahungu gusa hatabayeho kwivanga kuko ari bwo murushaho kuganira mwisanzuye ndetse ntihabe haza igitekerezo cyo kuba bamwe bavamo bagatangira kugirana ibiganiro byihariye hagati y’umuhungu n’umukobwa.

Ibirori nk’ibi byaba byabereye mu rugo iwawe cyangwa ahandi runaka, byongera kukwibutsa ko kutagira umukunzi atari iherezo ry’isi, ko igihe udafite inshuti ubuzima bushobora kuba bwiza.

Igurire ibintu byose wumva wifuza guhabwa

Nk’uko Clarissa Silva, umuhanga mu bijyanye n’imibanire y’abantu yabitangarije ikinyamakuru the Bustle, nta mpamvu yo gutegereza guhabwa impano n’undi muntu kandi wenda ufite ubushobozi bwo kwiha icyo ukeneye.

Ntukwiye gutegereza kugira umukunzi ngo akujyane kurya amafunguro y’ahantu runaka, kugura imyambaro cyangwa imirimbo runaka.

Igihe ufite ubushobozi, St Valentin ni igihe cyiza cyo kwigurira no kwiha ibintu byose wahoze wifuza, ibi bizatuma wumva nta tandukaniro riri hagati yawe n’abafite abakunzi kuko impano bahawe n’abandi wowe uzaba wazihaye ndetse wanagize amahirwe yo kwihitiramo ikikugoneye.

Itegurire amafunguro ukunda

Aho gusohoka ngo ujye kurira muri restaurant runaka uza guhuriramo n’abakundana bahasohekeye ndetse ku biciro biri hejuru dore ko akenshi biba byazamutse, fata umwanya witekere amafunguro ukunda, ariko udakunze koroherwa no kubona umwanya wo gutegura.

Uretse amafunguro,ushobora kuvugura umuvinyo cyangwa ikindi kinyobwa ukabijyanisha kuko nubwo uba uri wenyine ntibikuraho ko umubiri wawe ukeneye amafunguro aryoshye ngo wiyime kubera ko udafite uwo musangira.

Ibi ushobora kubikora ari na ko wirebera film cyangwa usoma igitabo ukunda, inama akaba ari ukwirinda ibifite aho bihurira n’urukundo kuko byagusubiza muri bya bitekerezo wari ugamije kwirinda.

Marana umwanya n’umuryango wawe

St Valentin burya ni umwanya wo gusangira urukundo mu byiciro bitandukanye. Ni yo mpamvu aho guheranwa n’agahinda witekerezaho,ukanibaza impamvu utagira umukunzi, ikiruta ari ugukoresha uwo mwanya ukishimana n’abo mu muryango wawe.

Ushobora gusanga umubyeyi wawe, nyogokuru cyangwa undi wo mu muryango wawe, na we adafite uwo basangira ibyishimo bya St Valentin. Kubana na bo kuri uyu munsi byongera kubagaragariza agaciro bafite mu buzima bwawe ndetse bakagira icyizere cyo gukomeza kubaho neza kuko uba uberetse ko batari bonyine.

Kora ibikorwa by’urukundo

Silva kandi avuga ko aho guta umwanya wawe uri mu maganya, ukwiye kuwufata ukora ibikorwa bitandukanye, by’umwihariko ibigirira akamaro abakeneye ubufasha bwihariye.

Gusura abarwayi kwa muganga, kubakorera isuku, gufasha umukecuru cyangwa umusaza muturanye mu mirimo itandukanye atabasha kwikorera, ni uburyo burushaho gutuma wumva ko nubwo hari ikintu runaka utarabasha kugeraho, ibyo ufite bikunyuze, kandi wifuza gushima ubinyujije mu gutera abandi ingabo mu bitugu.

Kora imyitozo ngororangingo

Mu bikorwa bishobora gutuma umererwa neza ku munsi w’abakundana kandi nta mukunzi ugira n’imyitozo ngororangingo. Uretse kuba siporo igira uruhare mu gutuma ubuzima bwawe burushaho kuba bwiza, ni n’umuti nyawo wo kuruhuka mu mutwe no kwihanaguramo ibitekerezo bibi.

Uretse ibi kandi aho gufata igihe utekereza ku mpamvu udafite umukunzi kandi wenda nta n’icyo wabihinduraho, St Valentin ikwiye kukubera umwanya mwiza wo kongera kwisuzuma, ugashyira ku murongo ibyo wifuza igihe waba usubiye mu rukundo.

Kwimenya bizagira uruhare mu gutuma ubona umukunzi ndetse mukabasha kurambana n’igihe uhisemo kubaho wenyine ukamenya uko ubyitwaramo.

ange[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza