#Kwibohora25: Abanyarwanda baba mu Bushinwa bishimiye imbuto za politiki nziza zashibutsemo iterambere

Yanditswe na IGIHE
Kuya 10 Nyakanga 2019 saa 06:46
Yasuwe :
0 0

Abanyarwanda baba mu Bushinwa bifatanyije n’inshuti zabo mu birori byo kwizihiza imyaka 25 ishize u Rwanda rubohowe mu maboko y’ubutegetsi bubi, bwavanguye abaturage bikarugeza kuri Jenoside yakorewe Abatutsi mu 1994.

Ibi birori byabereye mu gace ka Chaoyang kari mu Mujyi wa Beijing mu Bushinwa, ku wa 8 Nyakanga 2019. Byitabiriwe n’Abanyarwanda bahaba n’abahiga, abahagarariye ibihugu by’abo n’abandi bashyitsi baturutse mu bice bitandukanye by’icyo gihugu.

Ababyitabiriye basangijwe intambwe igihugu kimaze gutera nyuma y’ibihe bikomeye cyanyuzemo byagisize iheruheru, ubuzima bwacyo buri mu kaga.

Ambasaderi w’u Rwanda mu Bushinwa, Kayonga Charles, yashimye ingabo zari ziyobowe na Perezida Kagame zitangiye kubohora igihugu.

Yagize ati “Turishimira Guverinoma yacu irangajwe imbere na Perezida wa Repubulika Paul Kagame. Turashimira intera u Rwanda rugezeho mu myaka 25 nyuma yo guharika Jenoside yakorewe Abatutsi mu 1994. Turashimira ingabo za RPA.’’

Yakomeje avuga ko “Ibyo twishimira uyu munsi byiza ni imbuto za politiki nziza irimo ubwiyunge, ubutabera no guhangana n’ibibazo bitandukanye byari byugarije Abanyarwanda.”

Ubusanzwe Umunsi wo Kwibohora wizihizwa mu gihugu hose ku wa 4 Nyakanga buri mwaka, hazirikanwa igihe ingabo zari iza RPA zashyize iherezo kuri Jenoside yakorerwaga Abatutsi yahagaritswe imaze guhitana inzirakarengane zirenga miliyoni.

Mu kwifatanya n’abakurikiranye ibyo birori byabereye kuri Stade Amahoro ku wa 4 Nyakanga 2019, Abanyarwanda batuye Beijing bahuriye kuri Ambasade y’u Rwanda mu Bushinwa barabikurikirana.

Ambasaderi Kayonga yongeyeho ko kwibohora ari n’umwanya mwiza wo kwishimira intambwe yatewe mu gukura imbaga y’Abanyarwanda mu bukene.

U Rwanda rufite intego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Mu butumwa yageneye urubyiruko, Amassaderi Kayonga yarwibukije ko inshingano zarwo ari ugukoresha neza amahirwe igihugu cyaruhaye rukongera imbaraga mu masomo yarwo kuko rwitezweho byinshi mu gutanga umusanzu mu iterambere ry’igihugu.

Yarushishikarije kwihesha agaciro no kugira indangaciro z’ubunyarwanda kuko arizo zashoboje urubyiruko rwa RPA gukora ibikorwa by’ indashyikirwa byo kubohora igihugu.

Yagize ati “Kugira intsinzi mu buzima bwa buri muntu biva ku ndangagaciro zirimo ishyaka, ikinyabupfura no kureba kure.”

Umuyobozi Mukuru w’Ishami rishinzwe Afurika muri Ministeri y’Ububanyi n’Amahanga, Dai Bing, wari uhagarariye Leta y’u Bushinwa mu birori yashimye intambwe u Rwanda rwateye mu ruhando rwa Afurika no mu mahanga.

Ati “Mu myaka ya vuba Leta y’u Rwanda n’Abanyarwanda bagejeje igihugu ahantu hashimishije mu bwiyunge n’umutekano, ubukungu no kuzamura imibereho myiza y’abaturage. Ibi ni ibyo gushimira kandi tubifuriza kurushaho kujya mbere.’’

Yavuze ko “Leta y’u Bushinwa ntizahwema gusigasira umubano mwiza hagati y’ibihugu byombi kugira ngo turusheho guharanira ejo heza h’abaturage bacu.”

Ku Cyumweru hateguwe umukino w’umupira w’amaguru wahuje ikipe igizwe n’Abanyarwanda yahuye n’iy’abayobozi bo mu nzego za Leta mu Bushinwa. Uyu mukino wari ugamije kongera ibiganiro n’aba bayobozi mu kubafasha kurushaho gusobanukirwa iterambere u Rwanda rwagezeho.

Ambasaderi w’u Rwanda mu Bushinwa, Kayonga Charles, yashimye ingabo zitangiye kubohora igihugu
Abakobwa beza bataramiye abitabiriye ibi birori byabereye mu Bushinwa
Bacinye akadiho mu kwizihiza ibirori byo kwibohora k'u Rwanda
Intore zivuna sambwe muri ibi birori
Ni ibirori byanitabiriwe n'abarimo inshuti z'u Rwanda
Hanatanzwe ubutumwa buganisha ku kwibohora nyako u Rwanda rumazemo imyaka 25
Ambasaderi w’u Rwanda mu Bushinwa, Kayonga Charles, yafashe ifoto y'urwibutso n'abakozi ba ambasade
Mu butumwa bwatangiwe muri iki gikorwa hanibukijwe ko amarembo agana mu Rwanda afunguriye ababyifuza bose
Ibirori byasojwe n'isangira ryahuje abayobozi batandukanye
Mu kwizihiza isabukuru y'imyaka 25 ishize u Rwanda rwibohoye hakaswe umutsima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza