00:00:00
IGIHE NETWORK

Imbaraga za Umugiraneza na bagenzi be mu gukora imigati n’ibisuguti mu bijumba (Video)

Mu 2014 nibwo Umugiraneza Régis yasangije bagenzi be igitekerezo cyo kwihangira umurimo nk’uburyo bwo guharura inzira izatuma badategera abandi amaboko mu gushaka akazi.

Umugiraneza yisunze abakobwa batatu biganye mu mashuri yisumbuye bashinga CARL Group, ikigo gihinnye amazina yabo (Clarisse, Ada, Régis na Larissa).

Ni ikigo cyongerera agaciro ibikomoka ku buhinzi cyibanda cyane ku bijumba by’umwihariko icya ‘Orange’ gikungahaye ku ntungamubiri ya Vitamin A.

Igitekerezo cyo gutangira uyu mushinga, Umugiraneza unayobora CARL Group yakigize akiri ku ntebe y’ishuri muri Kaminuza.

Mu kiganiro yahaye IGIHE, Umugiraneza yavuze ko yatekereje uyu mushinga ubwo yigaga ubuhinzi n’ubworozi muri Kaminuza y’u Rwanda, mu Ishami ry’Ubukungu bushingiye ku Buhinzi n’Ubworozi.

Yagize ati “Ndi mu wa Gatatu nibwo nabitekereje mu gukora ubushakashatsi. Narebye ku bintu abantu benshi batarakoraho, nza kubona ko nakwita ku kijumba.’’

Yavuze ko yabonaga ibijumba bifatwa nk’ifunguro ridahabwa agaciro nyamara ryaratunze Abanyarwanda benshi, ahubwo ugasanga bigaburirwa amatungo cyangwa bikaborera mu mirima.

Yakomeje avuga ko “Nashatse kureba impamvu, nganiriye na mwarimu wanjye biba byiza anyemerera kubikoraho igitabo.’’

Ubwo uyu musore yakoraga ubushakashatsi yasanze hari ubwoko bushya bw’ibijumba bwagejejwe mu Rwanda mu 2012 kandi bikungahaye ku ntungamubiri ziganjemo iya Vitamin A.

Yatekereje ku musanzu ku kugabanya imirire mibi

Kuva 2015, u Rwanda rukoresha ibipimo by’ubushakashatsi ku baturage n’imibereho yabo (DHS) rikorwa rimwe mu myaka itanu; ubuheruka bwagaragaje ko abana bari munsi y’imyaka itanu bagwingiye bitewe n’ingaruka z’imirire mibi ari 38%; Intara y’Uburengerazuba ifite ijanisha riri hejuru ( 45%); Amajyepfo (41%); Amajyaruguru (39%); Uburasirazuba (39%) naho Umujyi wa Kigali ni 23%.

Umugiraneza yagerageje gushaka impamvu haba hari ikibazo cy’imirire mibi mu gihe hari ibijumba bifite intungamubiri zishobora guhangana n’indwara itera.

Yakomeje ati “Nasanze kuba abaturage batarya ibijumba, bitagabanuka. Ngisoza amasomo [Mata 2014], natangiye kureba uko umuturage yarya cya kijumba na za ntungamubiri zikirimo kandi yishimye.’’

“Natangiye gutekereza ibintu byinshi umuntu yakura mu bijumba, nahereye ku macaroni ariko tuza gusanga bisaba ishoramari rihambaye, dutangira n’ibintu twakwikorera n’intoki bidasaba amafaranga menshi.’’

Mu Ukwakira 2014 nibwo Umugiraneza avuga neza ko yatangiye urugendo rwo kubaka ikigo gitunganya imigati n’ibisuguti gikoresheje ibijumba.

We na bagenzi be bagiye muri RDB bikandagira

Mu kubara inkuru ye yavuze ko bagiye gushaka ibyangombwa mu Kigo cy’Igihugu cy’Iterambere (RDB) bikandagira.

Yagize ati “Twatangiranye n’abakobwa batatu barimo abo twiganye mu mashuri yisumbuye. Ku wa 22 Ukwakira 2014 nibwo twagiye muri RDB ariko dufite ubwoba kuko nta mafaranga twari dufite. Twari tuzi ko nituhagera baza kuyatwaka, twagezeyo baduha urupapuro rwo kuzuza, tugeze ku mugabane twemeranya gushyiraho ibihumbi 800 Frw twumvaga twabona aho tuyaguza.’’

Mu mpera za 2015 nibwo Umugiraneza yitabiriye amarushanwa y’urubyiruko agamije gutanga ibitekerezo byo kwihangira imirimo ndetse baza no guhembwa binyuze muri Minisiteri y’Urubyiruko na Dot Rwanda.

Mu ntangiriro Umugiraneza yajyaga mu Karere ka Muhanga kuzana ibijumba, bagakorera amandazi mu rugo iwabo.

Yagize ati “Ibijumba twarabisekuraga mu isekuru twakuye mu baturanyi. Abakiliya barazaga bakagura amandazi kuko n’iyo twakoraga icyo gihe. Batubwiraga ko aryoshye, dutangira kuyatanga kuri butike. Twatangiye kubona amasoko, ugasanga abantu bakoze iminsi mikuru, baratubwiye ngo tubahe twa tundazi.’’

Ni intangiriro yagereranyije no gucuruza ibitekerezo kuko hari amasoko basabaga kandi nta bikorwa bifatika bafite.

Umugiraneza Régis yagize igitekerezo cyo gutangira kubyaza ibijumba umusaruro akiri ku ntebe y'ishuri muri Kaminuza

Imashini ya mbere baguze yo kuvanga ibyo bijumba bayikesheje amafaranga batsindiye mu irushanwa rya Minisiteri y’Urubyiruko. Nyuma barisuganyije bubaka ifuru y’inkwi yo gutekeramo imigati.

Mu buhamya bwe, Umugiraneza yavuze ko bitewe n’ibikoresho n’ubunararibonye hari imigati itarashyaga neza. Ibi byatumye mu 2017 bafata umwanya wo guhagarika ibikorwa babanza kunoza umushinga.

Nyuma yo kwisuganya, uru rubyiruko rwagannye Ikigega gishinzwe guteza imbere Imishinga mito n’Iciriritse, BDF, muri gahunda ifasha urubyiruko rwasoje kaminuza rusaba inguzanyo.

Umugiraneza yavuze ko “Twabashije guhindura imikorere tuva mu buryo gakondo. Ubu ikijumba kinyura mu mashini iyo gitunganywa. Byagabanyije ibijumba byatakaraga mu kubihata kuko twakoreshaga ibyuma.’’

CARL Group ifite abakozi umunani ariko iteganya kongeraho abandi batatu bazayifasha kumenyekanisha ibikorwa by’ikigo.

Munganyika Angelique wize ibijyanye no gutunganya Amafunguro (Food Science) muri Koleji y’Ubumenyi n’Ikoranabuhanga (CST) wahawemo akazi yavuze ko yishimira ubumenyi ahungukira.

Yagize ati “Inyungu mbona ni uko iyo nkora akazi kandi ngahabwa amafaranga. Njyenda ngira ubumenyi kuko ibyo nkora bijyanye n’ibyo nize. Intambwe ikigo kiriho igaragaza ko ikintu cyose gisaba kwitinyuka kuko iyo watinyutse ugira icyo ugeraho.’’

CARL Group ikoresha ibijumba igemurirwa n’abahinzi 126 barimo abikorera n’abibumbiye mu matsinda bo mu duce twa Muhanga, Bugesera, Kayonza na Rulindo. Yihaye intego ko mu 2020 izaba ikorana na 800.

Mu cyumweru ikoresha ibiro 500 by’ibijumba mu gutunganya imigati y’uburyohe bw’umwimerere kuko 60% byawo ari ikijumba.

Carl Group ikorera i Kanombe mu Karere ka Kicukiro. Ifite intego yo kugeza imigati yayo ku isoko rya Kigali ndetse umwaka uzasiga itunganya ibisuguti na keke.

Imigati ikorwa mu bijumba bya 'Orange' iba ifite uburyohe bw'umwimerere
Umukozi wa CARL Group yerekana uko imigati yamaze gufungwa iba imeze
CARL Group ikoresha nibura ibiro 500 by'ibijumba ku cyumweru mu gutunganya imigati
Imigati ikorwa yifitemo umwimerere wa 60% wa Vitamin A iva mu bijumba

Amafoto na Video: Salomo George


Ibitekerezo

  • Rwose ndamukunze ahibwo nange nize food prodiction azampe guhagararira akarere ka kayonza kuko buriya nubwo yihangiye imirimo ariko twakunganirana kandi ugasahanga business yabaye nini cyane plz muzampuze nawe 0788270568 murakoze

  • Rwose ndamukunze ahibwo nange nize food prodiction azampe guhagararira akarere ka kayonza kuko buriya nubwo yihangiye imirimo ariko twakunganirana kandi ugasahanga business yabaye nini cyane plz muzampuze nawe 0788270568 murakoze

  • Rwose ni byiza

  • Rwose ni byiza


Tanga igitekerezo


BIGEJEJEYO