Guverinoma iri kwiga ku buryo bwo kubungabunga ibirwa biri mu Rwanda

Yanditswe na IGIHE
Kuya 22 Nzeri 2019 saa 10:11
Yasuwe :
0 0

Hari kwigwa imbanzirizamushinga y’itegeko rishya rizashyira mu byiciro bitandukanye ibirwa biri mu Rwanda kugira ngo hafatwe ingamba zitandukanye zo kubibungabunga.

Umuyobozi ushinzwe iby’igenzura ry’amategeko ajyanye n’ibidukikije mu kigo cy’Igihugu gishinzwe Ibidukikije (REMA), Remy Duhuze yabwiye The New Times dukesha iyi nkuru ko iyo mbanzirizamushinga iri kuganirwaho n’inzego zitandukanye.

Duhuze yavuze ko kugeza ubu mu Rwanda bamaze kumenya ko hari ibirwa 131 mu biyaga bitandukanye biri hirya no hino mu gihugu.

Ati “Mu Rwanda hari ibiyaga 23. Muri byo hari ibirwa 131 tumaze kumenya, muri byo ibirwa 113 biri mu kiyaga cya Kivu ku ruhande rw’u Rwanda. Tugomba kubimenya neza no kubishyira mu byiciro kugira ngo turusheho kubibungabunga.”

Inzobere mu bidukikije zivuga ko ibirwa ari iby’agaciro ku rusobe rw’ibinyabuzima kuko akenshi bibaho ubwoko bw’inyamaswa n’ibimera bidakunze kuboneka ahandi.

Ibirwa bikunze kuba intaho ikomeye y’ibiguruka birimo inyoni, ndetse bivugwa ko ibirwa ku isi bituweho n’abantu basaga miliyoni 600, ni ukuvuga kimwe cya cumi cy’abatuye isi yose.

Duhuze yavuze ko kubw’ako kamaro kose k’ibirwa, bafashe ingamba zo kubibungabunga.

Ati “Bimwe mu biri kwigwaho ni ugushyira ibirwa mu byiciro bibiri. Icya mbere ni icy’ibirwa bishobora guturwaho bikaba byakoreshwa mu mirimo itandukanye nko mu buhinzi, ariko bikubahiriza amabwiriza. Ikindi cyiciro ni icy’ibirwa bizaba ibya Leta bikitabwaho mu buryo bwihariye nyuma yo kwimura no guha ingurane ababituyeho.”

Duhuze yavuze ko hari n’abasaba ko habaho ibyiciro bitatu by’ibirwa.

Ati “Harimo ibirwa bishobora guturwaho bikanakorerwaho ibikorwa bitandukanye. Icyiciro cya kabiri byaba ibirwa byahindurwamo ahantu h’ubukerarugendo hakaba hanubakwa amahoteli, naho icya gatatu ni icyiciro cy’ibirwa byabungabungwa ku buryo nta gikorwa kindi na kimwe kihakorerwa.”

Yavuze ko bakiri kwiga kuri iryo tegeko kuko bigaragara ko hazazamo ibyo kwimura abaturage kubw’ingurane.

Duhuze yavuze ko iryo tegeko rizanarushaho gutuma ibinyabuzima biri ku birwa no mu mazi abikikije birindwa kwangizwa, kuko byagaragaye ko hari abaturage batuye mu birwa batubahiriza amategeko agenga ibidukikije nko kutagira ibikorwa bikorerwa muri metero 50 uvuye ku mazi.

Yavuze ko ibyo bituma hari ubwo nk’imiti bashyira mu bihingwa imanuka ikajya mu mazi, ikica ibinyabuzima biyarimo.

Duhuze avuga ko batangiye igenzura ku bikorwa byangiza ibidukikije bikorerwa ku birwa, ababikora ndetse n’ikigero cy’urusobe rw’ibinyabuzima bimaze kwangizwa.

Kwangiza urusobe rw’ibinyabuzima biri mu mazi bishobora kugira ingaruka ku musaruro w’amafi nko mu kiyaga cya Kivu gikorerwamo uburobyi cyane.

Bumwe mu bwoko bw’amafi buboneka mu kiyaga cya Kivu harimo nk’Isambaza, Indugu na tilapia.

Ikiyaga cya Kivu mu mwaka wa 2018 cyarobwemo amafi angana na toni 18,879, ni ukuvuga 70 % by’umusaruro w’amafi yarobwe mu Rwanda hose.

Mu Rwanda hari ibirwa 131 mu biyaga bitandukanye biri hirya no hino mu gihugu.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza