Aho Papa yasomeye misa i Nyandungu hagiye kubakwa ubusitani buzajya bunasengerwamo

Yanditswe na IGIHE
Kuya 4 Nzeri 2019 saa 06:16
Yasuwe :
0 0

Hagati ya tariki 7 na 9 Nzeri 1990, Mutagatifu Papa Yohani Pawulo II, yasuye u Rwanda aruzaniye ubutumwa bw’amahoro, ndetse ababarirwa muri mirongo bagira umugisha wo guhabwa ubusaserdoti na we.

Mu minsi itatu yamaze mu Rwanda, uwavuga ko ari mike ku bakristu Gatolika ntiyaba abeshye kuko buri wese yifuzaga kumuhobera cyangwa nibura kumubona yageze muri Paruwasi ye.

Gusa Papa yagerageje gusomera Misa mu bice bitandukanye by’igihugu birimo; Mbare mu Karere ka Muhanga, ku Kamonyi mu Karere ka Kamonyi, na Nyandungu muri Kicukiro.

Buri hantu, Papa yahasigaga ikimenyetso ndetse hubakwa ibikorwa remezo na Kiliziya Gatolika mu rwego rwo guha icyubahiro Umuyobozi wa Kiliziya Gatolika ku Isi.

Urugero, i Mbare hubatswe ikigo cy’urubyiruko cyahawe izina rya Cité de Nazareth naho Kamonyi hashyirwa urwibutso rw’amasuka abiri yahashyize kuwa 8 Nzeri 1990, agaragaza ubuhinzi n’igitebo kibika umusaruro, hejuru hakaba inyuguti za IHS (Iesus Humanium Salvator) zishushanya amagambo y’ikilatini asonabura ko Yezu ari Umukiza w’abantu.

Mu gishanga cya Nyandungu, Papa Yohani Pawulo II, yahasomye Misa kuwa 9 Nzeri 1990, yitabiriwe n’abantu benshi.

Alitari n’igitereko Papa yasomeyeho misa kuri uwo munsi, byari biri ku musozi wa Kanombe, iruhande rw’ahari Kaminuza ya Kigali Institute of Management (KIM), ku muhanda uva Kigali werekeza i Rwamagana ahazwi nko kuri 12.

Aho alitari yari iteretse, Papa yahashinzwe umusaraba munini nyuma Kiliziya Gatolika, yongeraho ikibumbano cy’igiti cyerekana Papa arimo gusoma Misa.

Nyuma y’imyaka 28 Papa Yohani Pawulo II asuye u Rwanda, abakora ibijyanye no kubungabunga babonye ko hari ikindi cyakongerwa mu kwibutsa ibi bihe bidasanzwe by’uruzinduko rwe.

Ikigo cy’Igihugu cyo kubungabunga ibidukikije (REMA), cyatangaje ko hagiye kubakwa ubusitani mu gishanga cya Nyandungu aho imbaga y’abantu yari ikoraniye yaje kumva ubutumwa bwa Papa mu gitambo cya misa yahasomeye.

Umuhuzabikorwa w’umushinga NUWEP uzatunganya ubusitani bwa Nyandungu, yabwiye KT Press ko ubu busitani bw’urwibutso rwa Papa buzaba bungana na metero 10.5 kuri metero 17 cyangwa se bwose bukangana na metero kare 178.5.

Ati “Ni ahantu ho kuvugira isengesho rito ry’umuntu ku giti cye. Bazajya basenga banabone amakuru ku mateka y’uruzinduko abakiri bato batazi”.

Uretse gukora ubusitani n’ibyatsi n’indabo, ubu busitani buzaba burimo ikibumbano cya Mutagatifu Papa Yohani Pawulo II, n’icya Bikira Mariya Nyina wa Yezu.

Djangwani ati “Turacyavugana na Kiliziya Gatolika ku bindi byashyirwa muri ubu busitani”.

Musenyeri wa Diyosezi ya Butare akaba na Perezida w’Inama y’Abepiskopi mu Rwanda, Musenyeri Philippe Rukamba, avuga ko Papa Yohani Pawulo II, ‘yigishije ubutumwa bw’amahoro ndetse asengera n’abarwayi. Twishimiye kugira ubwo busitani kuko abakristu bazahora bibuka ubutumwa bwe ubwo yabasuraga’.

Mgr Rukamba avuga ko ubwo Mutagatifu Yohani Pawulo II yazaga mu Rwanda, yahaye ubupadiri abagera kuri 30 bo mu Rwanda na Repubulika Iharanira Demokarasi ya Congo. Mu banyarwanda harimo na Mgr Antoine Kambanda wa Arkidiyosezi ya Kigali.

Gukora ubusitani bwa Papa ni kimwe mu bindi bikorwa by’umushinga NUWEP, uzakorerwa kuri hegitari 130 mu gishanga cya Nyandungu. Ibi bikorwa byose bizaba byarangiye muri Nzeri 2020, aho bizatwara miliyari 5.2 FRW.

Ahari ikimenyetso cya Papa i Nyandungu
Kiliziya Gatolika ivuga ko ubu busitani bwaba ari ikintu cyiza cyo gukomeza kwibukiranya ubutumwa Papa yatangiye mu Rwanda
Ubusitani bwa Papa buzubakwa muri aka gace

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza