Pariki y’Akagera yongerewemo izindi Nkura umunani n’Intare ebyiri

Yanditswe na Rabbi Malo Umucunguzi
Kuya 9 Gicurasi 2017 saa 11:56
Yasuwe :
0 0

Pariki y’Igihugu y’Akagera yagejejwemo izindi Nkura z’Umukara umunani n’izindi Ntare ebyiri zaturutse muri Afurika y’Epfo, mu gukomeza kugarura mu gihugu ubu bwoko bw’inyamaswa bwari bumaze imyaka bwarahacitse.

Ku wa 2 Gicurasi nibwo Inkura z’Umukara 10 zagejejwe muri Pariki y’Igihugu y’Akagera nyuma y’imyaka 10 zitakihabarizwa, bitewe n’ibikorwa bya ba rushimusi baba bashaka amahembe yazo, agurwa akayabo ku isoko mpuzamahanga nubwo ubu bucuruzi butemewe.

Ahagana mu 1970, mu Akagera habagamo Inkura z’Umukara zigera kuri 50, ariko uwo mubare waje kugabanuka cyane kugeza ubwo iya nyuma yaherukaga kuhagaragara mu 2007.

Ikigo cy’Igihugu cy’Iterambere, RDB, giheruka gutangaza ko ibyumweru bibiri bya mbere bya Gicurasi bizarangira mu Rwanda hagejejwe Inkura z’Umukara 20 zizaturuka muri Afurika y’Epfo, igihugu cyahaye Intare u Rwanda mu 2015.

Nk’uko ubuyobozi bwa Pariki y’Igihugu y’Akagera bwabitangaje bwifashishije Twitter, izi Nkura umunani zindi zagejejwe mu gihugu kuri uyu wa Kabiri. Ngo ziraba zishyizwe ahantu hihariye mu minsi mike, hakurikiranwe uko ubuzima bwazo buhagaze mbere y’uko zoherezwa muri Pariki nk’izindi nyamaswa.

Iki gikorwa cyahuriranye no kugeza muri Pariki y’Igihugu y’Akagera izindi Ntare ebyiri z’ingabo, Polisi y’igihugu ikaba yafashije mu mutekano wazo kuva ku Kibuga Mpuzamahanga cy’Indege cya Kigali kugeza muri pariki.

Ubuyobozi bwa Pariki wakomeje bugira buti “Ibikorwa byose byateguwe kugira ngo kugeza Inkura umunani n’Intare ebyiri mu Akagera uyu munsi bigende neza.”

Izi ntare zifite imyaka itatu ziravukana, zikaba ari impano yaturutse muri Afurika y’Epfo itanzwe na Dinokeng Game Reserve. Nyuma y’ukuza kwazo, ubu Intare zose hamwe zibaye 19.

Muri Kamena 2015 nibwo Ikigo cy’Igihugu cy’Iterambere (RDB) gifatanyije n’ikigo gicunga pariki zitandukanye muri Afurika zirimo n’iy’Akagera, African Parks, cyagejeje mu Rwanda intare zirindwi zirimo ingore eshanu, zigaruka mu Rwanda gutyo nyuma y’imyaka igera kuri 15 zaracitse.

Ni igikorwa cyongerera imbaraga ubukerarugendo bw’u Rwanda, urwego rwinjiriza igihugu amadovize menshi kuko nko mu mwaka ushize inyungu yabwo yageze kuri miliyoni 404 z’Amadolari ya Amerika.

Nyuma y’ibikorwa bya ba rushimusi byagabanyije cyane umubare w’inyamaswa zisurwa muri Pariki y’Igihugu y’Akagera cyangwa na zo zigahungabanya abaturage, mu 2010 imicungire y’iyi Pariki yarahindutse ubwo yajyaga mu maboko ya African Parks ifatayije na RDB.

Ubu hariho uruzitiro rurimo amashanyarazi rutandukanya pariki n’ikindi gice, naho Inkura cyangwa Intare zikaba zifite uburyo bwo kuzikurikirana mu ikoranabuhanga aho ziri hose muri pariki, hakaba itsinda rirwanya ba rushimusi ryifashisha imbwa na kajugujugu ikoreshwa mu igenzura bibaye ngombwa.

Ibi byose bizashoboka ku nkunga ya Howard G. Buffett Foundation, umuryango w’umuherwe w’Umunyamerika wanafashije cyane mu kugarura Inkura mu Rwanda.

Pariki y’Igihugu y’Akagera ifata ubuso bwa km² 1 200, ikaba iri hagati y’u Rwanda na Tanzania. Ni iya cyera ahagana mu 1934, mu mwaka ushize ikaba yarasuwe na ba mukerarugendo barenga 36000 mu mwaka ushize wa 2016.

Iyi Pariki imaze kugera ku rundi rwego muri Afurika kuko ari intaho y’inyamaswa eshanu zikomeye kuri uyu mugabane zizwi nka “Big Five”, arizo Intare, Inzovu, Urusamagwe, Imbogo n’Inkura.

Inkura y'amezi 18 hamwe na nyina
Ubwo izi nyamaswa zagezwaga ku kibuga cy'indege i Kanombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza