Kwamamaza

Perezida Kagame yasabye amahanga guhangana n’ihinduka ry’ikirere ryibasira abakene

Yanditswe kuya 26-01-2015 saa 09:26' na Deus Ntakirutimana


Perezida wa Repubulika y’u Rwanda, Paul Kagame, asanga ibihugu by’Isi bikwiye guhagurikira ikibazo cy’imihindagurikire y’ikirere kuko igira ingaruka zikomeye ku batishoboye.
Mu nama mpuzamahanga ya 45 yigaga ku bukungu bw’Isi yaberaga i Davos mu Busuwisi, yasoje ku wa Gatandatu tariki ya 24 Mutarama 2015, hasuzumwa ku kibazo cy’imihindagurikire y’ikirere.
Ingaruka z’imihindagurikire y’ikirere ngo usanga zibasira cyane ab’amikoro make. Hari imyuzure yica ikanasenyera abatuye ku manegka, hari (...)

Perezida wa Repubulika y’u Rwanda, Paul Kagame, asanga ibihugu by’Isi bikwiye guhagurikira ikibazo cy’imihindagurikire y’ikirere kuko igira ingaruka zikomeye ku batishoboye.

Mu nama mpuzamahanga ya 45 yigaga ku bukungu bw’Isi yaberaga i Davos mu Busuwisi, yasoje ku wa Gatandatu tariki ya 24 Mutarama 2015, hasuzumwa ku kibazo cy’imihindagurikire y’ikirere.

Ingaruka z’imihindagurikire y’ikirere ngo usanga zibasira cyane ab’amikoro make. Hari imyuzure yica ikanasenyera abatuye ku manegka, hari ubushyuhe buteza ibibazo, hataniyibagijwe ubutayu, amapfa, ibyuka bihumanya ikirere n’ibindi bikururwa no kwangiza ibidukikije.

Perezida Kagame yabwiye abari aho ko u Rwanda rwarateye intambwe mu guhangana n’imihindagurikire y’ikirere, ariko n’Isi ikwiye guhaguruka uko bishoboka kose.

Ati “Umwaka ushize twashyizeho ikigega ku mihindagurikire y’ikirere. Ubwo twagitangizaga twahise tubona miliyoni 75 z’amadolari ya Amerika yavuye mu mu ngengo y’imari ya Leta n’abafatanyabikorwa. Ibi bigaragaza uko twitaye kuri iki kibazo.”

Yakomeje avuga ko iyi ntambwe u Rwanda rwateye hari icyizere itanga. Ati “Biratanga icyizere kuko buri muntu avuga uburyo iki kibazo cyihutirwa. Iyi nayo ni intambwe ubwayo yatewe kuba biri ku mutima wa buri wese no gushaka kugira icyo akora.”

Umukuru w’Igihugu kandi yagaragaje ibyakozwe n’u Rwanda mu guhangana n’iki kibazo birimo gukora amaterasi y’indinganire ku misozi ihanamye, gutera amashyamba nk’igikorwa kigamije kubungabunga amashyamba kuko igihugu cyari cyaratakaje igice kinini cy’amashyamba bitewe n’impamvu zinyuranye ziirmo ibikorwa by’ubuhinzi no gushaka ibicanwa.

Mu gukomeza gushakira umuti iki kibazo ngo hashyizweho uburyo bwatuma abaturage batongera gutema aya mashyamba, gutera ibiti bundi bushya, hashyirwaho uburyo ubuhinzi bukomeza ariko bitabangamiye amashyamba, ndetse hanashyirwaho uburyo bwo gushaka amashyinga arondereza ibicanwa (Rondereza, Canarumwe).

Yasoje iri jambo asaba amahanga gushyira hamwe agahagurukira iki kibazo. Ati “ Rero dukwiye guhuza izi mbaraga za buri gihugu n’izo ku rwego mpuzamahanga.”

Paul Polman, Umushoramari w’Umuholandi yabwiye abari muri iyi nama ko ingaruka z’iyi mihindagurikire zibasira cyane abakene kandi ikiguzi cy’izangizwa nazo kibaka kiri hejuru.

Ati “Turagenda tubona ko hari imihindagurikire y’ikirere kandi iba ihenze cyane ku Isi. Ku bijyanye n’ibiza bituruka ku miterere y’Isi mu myaka 10 ishize hasabwe miliyari 2700 z’amadolari ya Amerika z’ikiguzi cy’inyongera kandi ni abakene bahazaharira cyane.”

Polman yongeyeho ko gukenera ibiribwa bituma hangizwa 50% by’amashyamba ku Isi. Nyamara nabyo ngo bitera ikibazo kuko kuyatema bituma ubushyuhe buzamukaho 15%, nabyo ngo bigira ingaruka ku bakene.

Ban Ki-Moon, Umunyamabanga Mukuru wa Loni yasabye abatuye Isi gushora imari yabo mu bikorwa bitagira ingaruka kuri iyi mihindagurikire.

Yavuze ko mu myaka 15 iri imbere kugera mu mpera za 2030, Isi izashora imari mu bikorwa remezo bishya, asaba ko yashorwa mu bikoresho bisohora umwuka muke wa Carbon.

U Rwanda rwafunguye ku mugaragaro ikigega cyo guteza imbere imishinga igamije iterambere ry’ibidukikije (Fonerwa) mu rwego rwo guteza imbere ibidukikije no gukumira ihindagurika ry’ibihe, tariki ya 9 Ukwakira 2014, igikorwa cyatangijwe na Minisitiri w’intebe Murekezi Anastase.

Amasezerano mpuzamahanga agamije kurengera ibidukikije yasinywe mu 1987 i Montreal muri Canada n’ibihugu bitandukanye agamije gukumira ihindagurika ry’ikirere agaragaza ko ibidukikije bifite uruhare mu iterambere rirambye.

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 14 August 2016
Copyright © 2009 -2014 - IGIHE Ltd - All Rights Reserved