Andela yashishikarije Abanyarwandakazi gutinyuka gukora porogaramu z’ikoranabuhanga

Yanditswe na Sekamana Mathias
Kuya 2 Kanama 2019 saa 08:49
Yasuwe :
0 0

Ikigo gishora imari mu kubaka ubushobozi bw’abakora porogaramu z’ikoranabuhanga zo muri za telefoni, mudasobwa no kuri murandasi, Andela, cyakanguriye Abanyarwanda by’umwihariko igitsina gore, gutinyuka gukora uyu mwuga.

Impamvu ngo ni uko abari n’abategarugori usanga bitinya muri uyu mwuga ku isi yose, atari no mu Rwanda gusa. Mu gihe cy’umwaka Andela imaze ikorera mu Rwanda, abakobwa bari ku gipimo kitageze ku icumi ku ijana mu bantu ifasha.

Iki kigo kimaze kwakira ubusabe bw’abifuza kugikoreramo bugera ku 8,000. Muri abo abemewe gukorana na Andela bagera kuri 80 gusa.

Umuyobozi wa Andela mu Rwanda, Clement Uwajeneza, avuga ko impamvu bashishikariza abanyarwandakazi kwitabira gukora uwo mwuga, ari uko biri no mu murongo wa Leta y’u Rwanda.

Ati “Turashaka gushishikariza abana b’abakobwa kwitinyuka bagakora uyu mwuga, ntibumve ko ari umwuga w’abahungu gusa. Nubundi u Rwanda ruri imbere mu kubwira abana b’abakobwa kwitinyuka.”

Uyu mwuga wo gukora porogaramu z’ikoranabuhanga ngo uracyafite imbogamizi ikomeye y’uko mu Rwanda nta kazi gahoraho kahaba, ariko ngo bafite icyizere kuko ibigo byinshi bitangiye gukoresha porogaramu z’ikoranabuhanga.

Uwajeneza yakomeje ati “N’umubare muto uhari usanga utaguma muri uyu mwuga ngo uwukuriremo. Babikora imyaka mike bakajya mu bindi.”

Ngo hari amahirwe menshi ahari yo kubona akazi hanze y’igihugu kuko hari ibihugu byinshi bikenera umubare w’abakora porogaramu z’ikoranabuhanga, baruta abagira ubwo bumenyi buri mwaka.

Ati “Muri Amerika bakenera abantu ibihumbi 200 bakora porogaramu buri mwaka kandi babona nk’ibihumbi 50.Ni aho twahereye tuvuga ko uwakwigisha urubyiruko rwa Afurika byagira umumaro.”

Yavuze kandi ko akamaro k’uyu mwuga ku banyarwanda ari ukureba ibibazo biri mu muryango nyarwanda byakemurwa n’ikoranabuhanga, ugahera kuri ibyo ushaka porogaramu zabikemura, ntubyumve nk’ibintu biri kure y’ubuzima busanzwe bw’abaturage.

Umwe mu bakobwa batangiye guhugurwa muri Andela yabwiye IGIHE ko kuba abana b’abakobwa bakitinya bakumva batakora uyu mwuga ari imyumvire itajyanye n’igihe.

Ati “Icyo ushaka cyose gisaba ko ugiha umwanya. Iyo ni imyumvire itajyanye n’igihe. Ndahamagarira abakobwa bagenzi banjye gutinyuka. Maze amezi atatu yonyine ariko ubumenyi bwarazamutse cyane. Mu mezi atanu nzaba ndi ku rwego mpuzamahanga.”

Andela ihugura abifuza gukora umwuga wo gukora porogaramu, bagakomeza bagakorana nayo cyangwa babona abandi bashoramari babaha inyungu ziruta iza Andela bakabakorera, cyane ko umuntu ukoranye na Andela agira ubumenyi n’ubunararibonye buri ku rwego mpuzamahanga.

Andela yashishikarije Abanyarwandakazi gutinyuka gukora porogaramu z’ikoranabuhanga
Abakora uyu mwuga mu bigo bitandukanye bunguranye ibitekerezo mu ku iterambere ryawo
Nyuma y'umwaka umwe, Andela yakiriye ubusabe burenga 8000 bafatamo abarenga gato 80
Umubare w'abakobwa bari mu mwuga wo gukora porogaramu z'ikoranabuhanga uracyari muto
Umuyobozi wa Andela mu Rwanda, Clement Uwajeneza avuga ko mu Rwanda akazi kakiri gake ku bakora porogaramu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza