Byinshi kuri Benimana, umunyarwanda wa mbere ukora imashini z’imikino y’amahirwe (Video)

Yanditswe na Thamimu Hakizimana
Kuya 28 Kamena 2019 saa 05:26
Yasuwe :
0 0

Benimana Richard, utuye mu Murenge wa Gatsata, mu Karere ka Gasabo mu Mujyi wa Kigali, yabashije gukora ibyuma by’imikino y’amahirwe bikoresha ikoranabuhanga.

Uyu mugabo wize ibijyanye n’indimi n’ubugeni mu mashuri yisumbuye, ahamya ko impano yo gukora ibi byuma by’imikino y’amahirwe atayivukanye ahubwo yayikuye mu bumenyi bw’amwe mu masomo atandukanye yize n’amahugurwa yagiye ahabwa.

Mu kiganiro na IGIHE, Benimana yemeza ko ubushake n’ibitekerezo byo gukora imikino y’amahirwe yatangiye kubigira nyuma y’uko yari amaze imyaka igera kuri irindwi akora bigo bitandukanye by’imikino y’amahirwe.

Ibyuma by’imikino y’amahirwe akora bigizwe n’ibice bitandukanye birimo ibirahuri bya Pulasitiki n’ibikoresho byatunganyirijwe mu nganda byagenewe gukora iyi mikino.

Benimana avuga ko yahisemo kwihangira uyu murimo kugira ngo azabashe kwiteza imbere.

Ati “Gutekereza gukora imashini z’imikino y’amahirwe byatewe nuko nabikozemo igihe kirekire kuko natangiye kubikoramo guhera 2012, ndetse ikindi gitekerezo cyaturutse ku kuba hari gahunda yo kwihangira imirimo ikunze kumvikana cyane abayobozi bashishikariza urubyiruko”.

Benimana ahamya ko ibyuma bye by’imikino y’amahirwe bitandukanye n’ibindi bisanzwe kuko byo bidasaba gushyirwamo amafaranga kugira ngo bikinywe, ahubwo bisaba ko uje kubikina ajya kwishyura ku babishinzwe.

Ati “Biratandukanye ariko itandukaniro ntabwo ari rinini kuko nk’uko wabyitegerereje ntabwo bikoresha uburyo busanzwe, ntabwo bikoresha ibiceri bikoresha uburyo bw’amayinite.”

Anemeza ko n’imikino iri mu byuma bye itandukanye n’isanzwe imenyerewe mu bindi byuma ndetse yahisemo iyo mikino kuko yasanze ariyo abantu bakuru n’abiyubashye bakunda.

Icyuma cye kimwe kiba gifite agaciro byubura ka miliyoni ebyiri atari yashyiramo porogaramu z’imikino.

Benimana afite intego yo gukora ibi byuma ari byinshi hanyuma akabishyira ku soko kugira ngo bibashe kumubyarira umusaruro.

Ati “Ibijyanye n’intego urumva niba maze gukora ibyuma igisigaye ni ukubishyira ku isoko kandi ndateganya kuba nzabishyiraho nko mu kwezi kumwe kuri imbere cyangwa abiri.”

Akomeza avuga ko nta bwoba na buke afite bw’uko abanyamahanga bakora iyi mikino y’amahirwe bashobora kumuhemukira. Yagiriye inama urubyiruko yo kwitinyuka rukabyaza umusaruro impano rwifitemo.

Izi mashini zitandukanye n'izimenyerewe kuko zo zidakinwa ari uko ubanje gushyiramo ibiceri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza