Umukozi wa Apple yirukanwe azira kumena amabanga ya iPhone X

Yanditswe na Mfitumukiza Moïse
Kuya 1 Ugushyingo 2017 saa 10:41
Yasuwe :
0 0

Ikompanyi yamamaye mu gukora ibikoresho by’ikoranabuhanga ya Apple yirukanye umukozi wayo bitewe n’uko umukobwa we yashyize hanze amashusho agaragaza imikorere ya telefone ya iPhone X nyamara itarashyirwa hanze.

iPhone X ni telefone igezweho iri mu ruhererekane rw’izikorwa na Apple igiye gukurikira iPhone 8 na iPhone 8 Plus zamuritswe ku ya 12 Nzeri 2017 ari nabwo hatangajwe umushinga wayo.

Mu gihe haburaga iminsi mike ngo ishyirwe hanze, umukobwa witwa Brooke Amelia Peterson wa Ken Bauer wakoraga muri Apple yashyize kuri YouTube ye amashusho ayigaragaza, igikorwa cyitishimiwe na Apple yahise ifata icyemezo cyo kwirukana se.

BBC ivuga ko Peterson yafashe aya mashusho muri Nzeri 2017 ubwo yasohokanaga na se bagiye gufata ifunguro rya saa sita muri Caffè Macs, ibarizwa ku cyicaro cya Apple muri California.

Aya mashusho Peterson yahise ayasiba abisabwe na Apple agaragaza se yishyura ibyo kurya akoresheje iPhone X mbere yo kuyimuha agatangira kuyikoresha anagaragaza imikorere yayo mu buryo bwimbitse.

Brooke Peterson yavuze ko umubyeyi we wari umaze imyaka ine akorera Apple yirukanywe ku kazi azira kwica rimwe mu mategeko agenga iyi kompanyi.

Yagize ati “Apple yakundaga umubyeyi wanjye, gusa yirukanwe kubera kwica itegeko, ni icyaha atakoze kandi arabisabira imbabazi.”

Iyi telefone iteganyijwe gushyirwa hanze ku ya 3 Ugushyingo 2017, ifungurwa hifashishijwe isura ya nyirayo, izaba igura amadolari ya Amerika 999, akabakaba ibihumbi 800 mu mafaranga y’u Rwanda.

Peterson yerekana imikorere ya Iphone X
Peterson yashyize hanze amashusho agaragaza se amwereka imikorere ya iPhone X

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza