Abana b’Abanyarwanda mu bihumbi 150 bagiye kwigishwa gukora porogaramu za mudasobwa

Yanditswe na Ferdinand Maniraguha
Kuya 11 Gicurasi 2016 saa 09:16
Yasuwe :
0 0

Akurikije umuvuduko ikoranabuhanga rigezeho mu Rwanda no ku Isi yose muri rusange, Minisitiri w’Urubyiruko n’Ikoranabuhanga, Jean Philbert Nsengimana, ahamya ko ejo hazaza ubumenyi bw’ibanze ku bana buzajya buba bushingiye ku kumenya gukora porogaramu za mudasobwa.

Ibi Nsengimana yabitangaje ku itariki 10 Gicurasi 2016, mu muhango wo gutangiza icyumweru cyahariwe kwigisha abana bo muri Afurika gukora porogaramu za mudasobwa (Africa Code Week, ACW).

Yagize ati "Kuri ubu kujijuka bikwiye kurenga kumenya kwandika no gusoma ndetse bikanarenga kumenya gusa gukoresha mudasobwa. Ubumenyi bw’ibanze ku bari kuvuka bukwiye gushingira ku kumenya gukora porogaramu za mudasobwa.”

Yakomeje avuga ko kwigisha abana gukora porogaramu za mudasobwa bakiri bato bituma barushaho gutekereza neza bakaba bakora ibintu bishobora gukemura ibibazo bihari.

Nsengimana kandi yavuze ko kuba ibi bikorwa bibaye ku nshuro ya kabiri byatangirijwe mu Rwanda, byaturutse ku kuba n’ubusanzwe leta yari isanzwe ifite gahunda zigamije gufasha Abanyarwanda kurushaho gukoresha ikoranabuhanga.

Muri ACW, abana n’urubyiruko bafite hagati y’imyaka 8 na 24 bo mu bihugu 30 bya Afurika bazigishwa ku buntu gukora porogaramu za mudasobwa zitandukanye zirimo imikino, ibibazo n’ibisubizo n’izindi.

Umuyobozi mu Kigo gikora ibijyanye na porogaramu za mudasobwa (SAP) Pat Bakey yavuze ko impamvu bahisemo u Rwanda ari ibyo bakora bisanzwe biri mu ntego z’igihugu.

Ati "Impamvu ya mbere twahisemo gutangiriza iki gikorwa mu Rwanda ni ukubera ko bari biteguye mu bijyanye n’ibikorwaremezo. Ikindi ni ukubera ko umwaka ushize bitwaye neza bakagaragaza n’ubushake. U Rwanda kandi rufite ubuyobozi bwiza bwumva akamaro k’ikoranabuhanga ku kugera ku bukungu bushingiye ku bumenyi.”

Bakey yakomeje avuga ko intego bafite ari ukurushaho gutuma ubuzima bw’Abanyafurika burushaho kuba bwiza, binyuze mu ikoranabuhanga kandi mu buryo burambye.

Ati” Iyo tuvuze ngo ikoranabuhanga rihindura byinshi, nibyo koko rirabihindura. Iyo ushaka impinduka rero zirambye ugomba kwigisha abantu. Niyo mpamvu rero y’iki gikorwa cyo kwigisha abana gukora porogaramu za mudasobwa.”

Yongeyeho ko nta kizaba gishimishije nko kubona umwana w’Umunyarwanda yandikirwa n’uwo muri Amerika cyangwa ahandi amubwira ko yabonye porogaramu yakoze cyangwa se umukino(game) yabashije gukora.

Kwigisha abana gukora porogaramu za mudasobwa bizatangira kuva ku itariki ya 15 kugeza tariki 23 Ukwakira 2016, aho abagera ku bihumbi 150 aribo bazahabwa aya masomo.

Umwaka ushize abana bagera ku bihumbi 89 bo mu bihugu 17 nibo bahawe aya masomo.

Minisitiri Nsengimana avuga ko abakiri bato bakwiye kwigishwa gukora porogaramu za mudasobwa
Pat Bakey avuga ko mu Rwanda bazigisha abana ibihumbi 150
U Rwanda rwatoranyijwe nka kimwe mu bihugu bishyigikiye ikoranabuhanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza