U Rwanda ruryamiye amajanja nyuma y’igitero cy’ikoranabuhanga cyibasiye ibihugu bigera ku 150

Yanditswe na Rabbi Malo Umucunguzi
Kuya 14 Gicurasi 2017 saa 07:58
Yasuwe :
0 0

Kuwa Gatanu w’iki cyumweru nibwo habaye igitero gikomeye cy’ikoranabuhanga, ubu harabarurwa ko cyibasiye abagera ku 200,000 mu bihugu bigera mu 150 birimo ibikomeye ku Isi nk’u Bwongereza, u Buhinde, u Bufaransa n’u Burusiya.

Iki gitero gishingiye kuri Virusi yiswe ‘Wannacry’, ubwo cyatangiraga kuwa Gatanu cyahereye mu ikoranabuhanga ry’ibitaro bitandukanye n’urwego rw’ubuvuzi mu Bwongereza (National Health Service, NHS), ku buryo gahunda nyinshi zari zahawe abarwayi zasubitswe.

Nk’uko byagaragajwe n’ibipimo by’ikigo cy’Abarusiya gitanga ubwirinzi bwa mudasobwa, Kaspersky, iki gitero cyageze no mu bihugu bya Afurika nka Tanzania, Kenya, Misiri na Afurika y’Epfo.

Umuyobozi w’Ikigo cy’Igihugu cy’Ikoranabuhanga (RISA), Muhizi Bagamba Innocent, yabwiye IGIHE ko mu Rwanda kitahageze ariko ko hari gukorwa ibishoboka byose mu gukaza ubwirinzi mu ikoranabuhanga.

Yagize ati “Turi gukurikirana, turagenda tugenzura ku mirongo yose y’ikoranabuhanga, twavuganye n’ibigo byose, abashinzwe ikoranabuhanga benshi mu bigo bya leta n’ibyigenga hari imbuga duhuriraho, tukababwira ngo mukomeze mube maso ariko kugeza ubu mu Rwanda ntabwo byari byahaba.”

Minisitiri ushinzwe ikoranabuhanga muri Kenya, Joe Mucheru, we yatangaje ko icyo gitero cyibasiye ahanini abakoresha porogaramu za Windows, abakigabye bakaba bari bahanze amaso amabanki n’ibigo by’imari.

Muhizi yakomeje avuga ko amakuru yagaragaye ari uko i Burayi hibasirwaga ibigo by’imari, ibigega by’ubwizigame n’ibindi bigo ahanini bifite icyuho mu ikoranabuhanga ryabyo kandi bikoresha porogaramu za Microsoft Windows.

Yakomeje agira ati “Aho rero icya mbere ni uko ugomba kuba ufite uburyo bw’inyongera ubikamo amakuru yawe (backup) kandi bikorwa buri munsi. Ikindi iyo hari ahantu ikoranabuhanga ryawe rifite intege nke, hari uburyo bwo gukemura ibyo bibazo niba ari n’uko porogaramu iteye. Nibyo dushishikariza abantu gukora kugira ngo icyo kibazo kitabaho.”

Icyo gihe ngo niba umuntu afite uburyo bw’inyongera abikamo amakuru, iyo haje igitero kikinjira mku makuru, asiba uburyo bwiniwemo n’abajura agakoresha ubusigaye.

Yakomeje agira ati “Ariko icyo tumaze kubona, nk’iki gitero ntabwo ari ukwinjira mu mabanga gutyo gusa, bohereza nka email bashyizeho dosiye bayihishe, bakakubwira ko ari nk’inzandiko zo mu kazi cyangwa z’ibintu watumije, wayifungura bagahita binjira mu makuru yawe. Iyo ufite Antivirus imeze neza irayitahura ndetse warasannye porogaramu yawe nabwo ntibapfa kwinjiramo.”

Akomeza agira ati “Ibyo rero bikaba aribyo dushishikariza abantu, tukababwira ngo babe biteguye kuko biragenda bihindura isura, uko byari bimeze bwa mbere siko bimeze ubungubu.”

Amakuru aragenda agaragaza ko abagabye iki gitero bifashishije uduporogaramu duheruka kwibwa mu Kigo Gishinzwe Umutekano w’Igihugu muri Leta Zunze Ubumwe za Amerika (NSA).

Ni igitero cyagendaga gifunga mudasobwa mu nganda zikora imodoka, ibitaro bikomeye, amaduka n’amashuri mu bihugu bitandukanye, aho mu ntangiriro "WannaCry" yafungaga amadosiye yose muri mudasobwa, ubundi igasaba ba nyira yo ko bagomba kwishyura amadolari $300, kugira ngo amadosiye yongere afunguke bayasubirane. Yashoboraga kwiyongera akagera kuri $600 niba uwasabwe kwishyura atabikoze mu minsi itatu.

Umuyobozi wa Polisi y’u Burayi, Rob Wainwright, yabwiye ITV ko umubare uheruka w’abagizweho ingaruka ari 200, 000 mu bihugu nibura 150, abenshi bakaba ibigo by’ubucuruzi birimo n’ibinini cyane.

Yakomeje agira ati "Kugeza ubu ikibazo kiri kugenda gihindura isura, mfite impungenge ko umubare uza kuba munini cyane kuri uyu wa Mbere mu gitondo, abantu nibasubira ku kazi bagacana mudasobwa zabo.”

Iki gitero cyanageze mu Burusiya cyibasira mudasobwa za Minisiteri y’Umutekano w’Igihugu ndetse gihagarika n’ikoranabuhanga rikoreshwa ahategerwa gari ya moshi mu Budage.

Uku niko byabaga bimeze umuntu agerageje kwinjira muri serivisi za NHS yagabweho igitero cya virusi yiswe ‘Wannacry’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza