Abahanga bagaragaje impungenge batewe n’ubwenge bw’ubukorano ‘Artificial Intelligence’

Yanditswe na Habimana Jean Baptiste
Kuya 11 Ukwakira 2017 saa 12:57
Yasuwe :
0 0

Uko imyaka yicuma niko abantu barushaho kwaguka mu bitekerezo, bagafunguka amaso bashaka inzira yabafasha koroshya ibyo bakora binyuze mu ikoranabuhanga ryabaye nk’indorerwamo y’iterambere ry’abatuye isi.

Abahanga bo ku isi ya none barajwe ishinga no gukora porogaramu zikoresha mudasobwa n’ama-robots mu gutekereza no kwishakamo ibisubizo nta ruhare rwa muntu rubirimo, mu cyiswe ’Artificial Intelligence (AI)’ twakwita ubwenge bw’ubukorano.

Abahanga bavuga mu 2035 mudasobwa zizaba zifite ubwenge nk’ubw’umuntu ndetse zikabasha gutekereza, kwiga no guteganya iby’ahazaza hatabayeho kujijiganya.

Vox dukesha iyi nkuru itangaza ko igiteye impungenge cyane ari uko mu minsi izaza, ‘robot’ izaba ifite ubwenge nk’ubw’umuntu, igaragara ikanavuga nkawe, bakanagirana imishyikirano, igaragaza ubwenge buhanitse kurusha ubw’uwayikoze.

Igihe kizagera ishobore kwiyitaho ndetse bitewe n’uko yakozwe mu ibanga ibe yagaragaza imyitwarire idasanzwe byatuma iva aho yashyizwe ikaba yagira ibyo yangiza idasize n’iby’abayikoze.

Impuguke mu by’ubugenge, abahanga mu bya mudasobwa, abakora ‘robots’ n’abahanga mu by’imibereho myiza y’abaturage bagaragaje impungenge batewe na AI n’uburyo bwo kwitegura guhangana n’ingaruka zayo.

Umuyobozi wa Future of Humanity Institute muri Kaminuza ya Oxford, Nick Bostrom, yavuze ko guha ubushobozi nk’ubwo imashini ari ikibazo gikomeye kandi ko abantu bagomba kubyitaho cyane kuko bishobora kurangira nabi.

Bostrom yavuze ko bikwiye ko abahanga mu bya mudasobwa bazamura impano zabo mu gukora ubushakashatsi no kugenzura ubu bwenge karemano.

Impuguke akaba n’umwarimu mu by’imitekerereze muri Kaminuza ya Harvard, Steven Pinker, yavuze ko abantu bakwiye kugira impungenge ku ihindagurika ry’ikirere, icurwa ry’intwaro za kirimbuzi, indwara z’inzaduka zibasira benshi, impinduka mu bya politiki n’iyimurwa ry’abakozi rya hato na hato.

Igabanuka ry’imirimo

Mu gihe AI ikomeje gutekerezwaho umunsi ku wundi, abantu bagomba guhora biteguye ko ikoreshwa ry’ubwenge karemano rizagabanya imirimo bityo hakwiye gufatwa ingamba zo guhangana na byo.

Moshe Vardi, umwarimu muri Kaminuza ya Rice muri Texas, avuga ko hari ibintu bine abantu bagomba kwitaho bizaturuka ku ikoreshwa ry’ubwenge karemano.

Icya mbere ni ingaruka zizaturuka ku kubura akazi, kuko ikoranabuhanga ubwaryo rizakomeza gutera; icya kabiri ni imyanzuro ku ikoreshwa ry’ubwenge karemano kuko abantu bakeneye kubiganiraho mu buryo burambuye ku mirimo izaharirwa abantu n’izakorwa n’ikoranabuhanga; icy’ikorwa ry’intwaro za kirimbuzi ndetse n’icyo kunanirwa kugenzura izi mashini.

Abahanga bagaragaza ko ikoranabuhanga ry’ubwenge karemano rizongera umubare w’abadafite akazi, ariko bakanashimangira ko rizaha abantu umwanya wo gutekereza mu buryo buhanitse.

Impuguke mu bya mudasobwa muri Kaminuza ya New York, Julian Togelius, yavuze ko atewe impungenge n’ingaruka iri koranabuhanga rizagira kuko rizinjizwa mu nzego zose. Yibajije niba hazahangwa imirimo mishya cyane mu nzego za serivisi ishobora kugoboka abantu mu gihe imirimo yose yihariwe n’ikoranabuhanga.

Abantu bahumurijwe ku mikorere ya AI

Impuguke mu bya mudasobwa akaba n’umwarimu muri Kaminuza ya Stanford, Sebastian Thrun, yavuze ko yanejejwe n’ubu bwenge karemano ndetse ngo nta kibazo bimuteye.

Yagaragaje ko buzafasha abantu imwe mu mirimo bakabona igihe cyo kuruhuka no guhanga udushya.

Umwarimu mu by’ubukungu muri Kaminuza ya George Mason muri Virginia, Bryan Caplan, yavuze ko ubwenge karemano butagiteye ubwoba nk’ikiremwamuntu kiburi inyuma, ahubwo ni nk’amatungo yo mu rugo, kuko bwakorewe kuzanira inyungu ababukoze.

Mu bishimwa ubwenge karemano ni uko nibukomeza gutezwa imbere, bizahindura imibereho y’abantu mu bikorwa birimo nko gutwara imodoka nta mushoferi n’indi mirimo izafasha abantu kuzuza inshingano zirenze izo yari basanganywe.

Ubwenge bw'ubukorano buzakoreshwa mu gutekereza no kwishakamo ibisubizo nta ruhare umuntu abigizemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza