Abatarabigize umwuga bifuza kunyonga amagare mu mihanda izacamo Tour du Rwanda bashyizwe igorora

Yanditswe na Manzi Rema Jules
Kuya 3 Kanama 2018 saa 08:24
Yasuwe :
0 0

Ku nshuro ya mbere, abakunda gukina umukino wo gusiganwa ku magare ariko babikora bishimisha, bahawe uburenganzira bwo kuzajya babanziriza abakinnyi ba Tour du Rwanda mu mihanda izanyuramo, hagamijwe gukomeza gukundisha uyu mukino abantu bose.

Iki gikorwa kizaba ku minsi ibiri ya nyuma ya Tour du Rwanda aho 11 Kanama abakinnyi bava i Musanze bajya i Kigali, abatarabigize umwuga bo bazahagurukira kwa Nyirangarama bagasoreza imbere y’inyubako ya MIC mu Mujyi, naho tariki 12 Kanama bakazazenguruka mu Mujyi wa Kigali.

Nk’uko IGIHE yabitangarijwe na Rusagara Serge, umukozi muri Ferwacy, ushinzwe imenyekanishabikorwa, abatarabigize umwuga bazajya bahaguruka amasaha atatu mbere y’abakinnyi ba Tour du Rwanda, bikaba biri mu rwego rwo gukomeza gukundisha uyu mukino abantu bose kandi uwifuza kuwukina n’iyo yaba ageze mu za bukuru akabona ayo mahirwe.

Yagize ati “Ni igitekerezo kigamije gukomeza gukundisha Abanyarwanda umukino w’amagare. Abitabira Car Free Day mubona ko amagare asigaye ari menshi, abantu b’ingeri zitandukanye yaba abakuze n’abakiri bato ariko bakina bishimisha bariyongereye.”

Yakomeje agira ati “Ferwacy rero yifuje ko nabo bahabwa umwanya bakazanyonga ku minsi ibiri ya nyuma ya Tour du Rwanda ahantu hareshya n’ibirometero 50 mu cyiswe ‘Ride Along With Tour du Rwanda”.

Abo batabigize umwuga bazajya bahaguruka mbere amasaha atatu imbere yabo hakazajya haba hari imodoka ibacungira umutekano n’inyuma hari indi.

Rusagara yavuze ko abazakina icyo cyiciro batazaba bari mu irushanwa ndetse nta n’ibihembo bizaba birimo bityo bakazajya bagendera hamwe, baganira banarushaho kumenyana.

Kwiyandikisha mu bazitabira iki gikorwa, umuntu asabwa kuba afite igare noneho Umunyarwanda akishyura ibihumbi 10 Frw naho Umunyamahanga akishyura ibihumbi 20 Frw mu rwego rwo kwirinda akavuyo kazaterwa n’umubare mwinshi wazitabira, ayo mafaranga akazanakoreshwa mu kubagurira amazi n’ibindi bizakenerwa.

Abazitabira iki gikorwa bazishyura ibihumbi 10 ku Banyarwanda na 20 ku banyamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza