Azzedine Lagab wo muri Algeria yegukanye agace ka mbere ka Tour du Rwanda 2018 (Amafoto na Video)

Yanditswe na Ishimwe Israel, Manzi Rema Jules
Kuya 5 Kanama 2018 saa 10:23
Yasuwe :
0 0

Umunya-Algeria Azzedine Lagab yegukanye agace ka Mbere ka Tour du Rwanda 2018 yatangiriye mu Karere ka Rwamagana kuri iki Cyumweru, akoresheje amasaha 2:12’21’’ ku ntera y’ibilometero 97.5.

Isiganwa ry’uyu munsi ryatangiye abakinnyi b’Abanyarwanda bagaragaza icyizere cyo kwegukana aka gace kakiniwe mu Mujyi wa Rwamagana, aho abasiganwa bazengurutse inshuro 15. Ndayisenga Valens ukinira Pays Olonne Cycliste Côte de Lumière (POCCL) yo mu Bufaransa na Ukiniwabo René Jean Paul wa Les Amis Sportifs y’i Rubavu bamaze igihe bayoboye ariko mu kuzenguruka ku nshuro ya 13, igikundi cyabafashe bagendera hamwe.

Ubwo abakinnyi bose 79 bazengurukaga bwa nyuma, abagera kuri barindwi basize igikundi ariko Azzedine Lagab ahagerera rimwe na Lozano David wa Team Novo Nordisk banganyije ibihe.

Ndayisenga Valens ni we Munyarwanda waje hafi ku mwanya wa gatanu aho asigwa n’uwa mbere amasegonda 12 mu gihe abandi bari mu icumi ba mbere ari Mugisha Moïse wa karindwi na Rugamba Janvier wa munani basigwa amasegonda 18.

Azzedine Lagab w´imyaka 32 akinira Ikipe ya Groupement Sportif des Pétroliers d’Algérie. Uyu munsi yanditse amateka yo kwegukana agace ka gatatu mu nshuro enye amaze kwitabira Tour du Rwanda.

Akigera mu Rwanda, yanditse ku rukuta rwe rwa Twitter amagambo agaragaza ko yifitiye icyizere.

Yagize ati ‘‘Ejo (uyu munsi) nzatangira ku nshuro ya kane isiganwa rya Tour du Rwanda nkunda. Biteye ubwuzu uburyo uyu mukino ukomeza gutera imbere. Nizeye kwitwara neza hamwe n’ikipe yanjye nto ya GSP.’’

Tour du Rwanda iri kuba ku nshuro ya 10 yatangiye kuri iki Cyumweru, tariki ya 5 Kanama izasozwa ku wa 12 Kanama 2018. Amakipe 16 ni yo yitabiriye iri siganwa rizazenguruka mu bice bitandukanye by’igihugu ku ntera y’ibilometero 948.6 mu minsi umunani.

Kuri uyu wa Mbere, tariki ya 6 Kanama 2018, Tour du Rwanda irakomeza hakinwa agace ka Kabiri kazava Kigali-Huye ku ntera y´ibilometero 120.5.

Mu mashusho, reba uko agace ka mbere ka Tour du Rwanda kagenze

Amafoto y’abegukanye ibihembo

Azzedine Lagab ni we wambaye umwenda w'umuhondo utangwa na Minisiteri ya Siporo n'Umuco (Minispoc). Yawushyikirijwe n’Umufaransa David Lappartient uyobora Ishyirahamwe ry’Umukino w’Amagare ku Isi
Ndayisenga Valens ukinira Pays Olonne Cycliste Côte de Lumière (POCCL) yo mu Bufaransa yahawe igihembo cy’umukinnyi wahize abandi mu kuzamuka, gitangwa na Banki y’Ubucuruzi ya Cogebanque
Ukiniwabo René Jean Paul ukinira Les Amis Sportifs yahembwe nk’umukinnyi mwiza unyonga ahatambika (best sprinter) gitangwa na SP Rwanda
Jonas Döring ukinira Akros–Renfer SA yo mu Busuwisi yahembwe nk’umukinnyi muto witwaye neza
Ndayisenga Valens yahembwe na “Rwanda Tea, A Natural Reawakening” nk’umukinnyi wagaragaje guhangana gukomeye
Azzedine Lagab yahembwe na RwandAir nk'Umunyafurika mwiza
Ndayisenga Valens yahembwe n’Ikigo cy’Igihugu cy’Iterambere (RDB) kibinyujije muri "Visit Rwanda" nk'umukinnyi mwiza w'Umunyarwanda
Groupement Sportif des Pétroliers d'Algérie iri ku isonga mu makipe yitwaye neza
Groupement Sportif des Pétroliers d'Algérie iyobowe na Azzedine Lagab ni yo yabaye iya mbere
Rwanda Tea yashoye miliyoni 51 Frw muri ‘‘Tour du Rwanda 2018’’ mu kumenyekanisha icyayi cy’u Rwanda
Cogebanque imaze kuba ubukombe mu gutanga serivisi za banki mu Rwanda

Bitandukanye n’izindi Tour du Rwanda zatangiriraga mu Mujyi wa Kigali, ku nshuro ya mbere, iri siganwa mpuzamahanga rizenguruka u Rwanda ku magare ryatangiriye mu Ntara y’u Burasirazuba, mu Karere ka Rwamagana ahafatwa nk’igicumbi cy’ahashibutse inkorokoro z’igihugu mu kunyonga igare.

Kuva iri siganwa ryaba mpuzamahanga mu 2009, ni ubwa mbere agace kabanza katangiriye hanze y’Umujyi wa Kigali. Abanya-Rwamagana ni bo baganuye kuri iri siganwa ryitabiriwe n’abakinnyi 79 bakomoka mu bihugu 17.

Byabaye ibyishimo by’impurirane ku batuye aka gace bihereye ijisho umukino w’igare mu gihe aka karere ariko kabarizwamo ikipe ya Les Amis Sportifs iterwa inkunga na Cogebanque yareze abakinnyi bakomeye nka Ndayisenga Valens na Uwizeye Jean Claude bakina muri Equipe De POC Côte De Lumière yo mu Bufaransa.

Tour du Rwanda 2018 yitabiriwe n’abakinnyi 50 bayikandagiyemo bwa mbere n’ibihugu bitatu birimo Irlande, Finlande na Angola ndetse n’amakipe atandatu mashya. U Rwanda ni rwo rufitemo umubare munini w’abenegihugu (18) n’ubwo abazaba bakinira amakipe y’imbere mu gihugu ari 15, abandi bari mu yo hanze.

Iri rushanwa rya nyuma ryo ku bipimo bya 2.2 riri gukinwa bwa nyuma mbere yo kuzamurwa ku rundi rwego rizatwara asaga miliyoni 500 Frw, ryatewe inkunga na MINISPOC, RDB, Skol, Cogebanque, RwandaAir, Rwanda Tea, Prime Insurance, SP, Inyange LTD, RMC (Rwanda Motorcycle Company), Rwanda Foam Ltd, Ameki Color, Polisi y’Igihugu, Komite Olempike na Sebamed.

UKO AGACE KA MBERE KA TOUR DU RWANDA KAGENZE:

Uko abakinnyi 25 ba mbere bakurikirana nyuma y'umunsi wa mbere
Azzedine Lagab wo muri Algeria yegukanye agace ka mbere ka Tour du Rwanda 2018
Mu gusoza, umukinnyi wa Ethiopia yaguye hasi
Cogebanque itanga serivisi zitandukanye ishyigikira iterambere ry'amagare mu Rwanda

13:50: Azzedine Lagab wo muri Algeria yegukanye agace ka mbere ka Tour du Rwanda. Umunyarwanda waje hafi ni Ndayisenga Valens uri ku mwanya wa gatanu.

13:40: Mu gihe basigaje kuzenguruka rimwe, Ndayisenga Valens yagarutse imbere. Ari kumwe n’abandi nka barindwi basize igikundi amasegonda 22.

13:30: Abasiganwa basigaje kuzenguruka inshuro ebyiri, kugeza ubu bose bari kumwe mu gikundi. Mu kanya gato nibwo bari busoreze imbere ya Dereva Hotel.

Ndayisenga Valens yasize abandi mu nshuro za mbere bazenguruka ariko baza kumunyuraho bagiye gusoza
Ndayisenga Valens (imbere) na Ukiniwabo René Jean Paul bamaze akanya bayoboye

13:10: Abakinnyi bose bari kugendera mu gikundi. Ukiniwabo René Jean Paul wari imbere bamufashe. Basigaje kuzenguruka inshuro enye.

13:04: Abasiganwa bamaze kuzenguruka inshuro 11, Ukiniwabo René Jean Paul ari imbere wenyine. Ndayisenga Valens bari kumwe igikundi cyamufashe bari kugendana.

12:56: Ndayisenga Valens na Ukiniwabo René Jean Paul bakomeje kuza ku isonga. Iyi mihanda iri gukoreshwa barayizi kuko ni ho bazamuriye izina mu mukino w’amagare. Abakinnyi bari mu gikundi bongeye kwishyira hamwe, bari kugenda bacungana.

-  Abasiganwa bahagurukiye ku Bitaro bya Rwamagana. Bari kunyura mu muhanda werekeza kuri Saint Aloys, bagakata kuri Poid Lourds, bakazamukira kuri AVEGA bakagaruka aho bahagurukiye.

12:45: Abasiganwa basoje inshuro ya cyenda. Ndayisenga Valens na Ukiniwabo René Jean Paul bari imbere, bakurikiwe na Uwizeye Jean Claude n’Umunyamerika Rugg Timothy.

Imihanda izakoreshwa muri Tour du Rwanda 2018

-  Ku wa 5 Kanama: Rwamagana-Rwamagana: 104 Km
-  Ku wa 6 Kanama: Kigali-Huye: 120,3 Km
-  Ku wa 7 Kanama: Huye-Musanze: 195,3Km
-  Ku wa 8 Kanama: Musanze-Karongi: 135,8 Km
-  Ku wa 9 Kanama: Karongi-Rubavu: 95,1 Km
-  Ku wa 10 Kanama: Rubavu-Kinigi (Parike y’Ibirunga): 108,5 km
-  Ku wa 11 Kanama: Musanze- Kigali (imbere ya MIC): 107,4 km
-  Ku wa 12 Kanama: Kigali (Stade Amahoro)- Kigali (Nyamirambo): 82,2 km

-  Umunyafurika y’Epfo, Calvin Beneke, yagize ikibazo atobokesha ipine ry’inyuma mu nzira, abakanishi b’ikipe ye ya Luso bahita bamuha ubutabazi bwihuse.

12:35: Baracyayoboye, bamaze gusiga igikundi umunota umwe n’amasegonda 11.

12:30: Abanyarwanda babiri, Ndayisenga Valens na Ukiniwabo René Jean Paul baracyayoboye. Abasiganwa basigaje kuzenguruka inshuro icyenda.

- Amafoto y’abakinnyi basiganwa mu muhanda

Abakinnyi bakunze kugendera mu gikundi muri aka gace kakiniwe ahantu higanjemo ahatambika

12:20: Abasiganwa bamaze kuzenguruka inshuro esheshatu. Ndayisenga Valens na Ukiniwabo René Jean Paul ukinira Les Amis Sportifs bari imbere. Basize igikundi ho amasegonda 40.

11:45: Mugisha Samuel wa Team Rwanda ari mu bayoboye mu kuzenguruka ku nshuro ya kabiri. Mugisha ari mu bakinnyi bigaragaje cyane muri Tour du Rwanda 2016 cyane mu gusiganwa ahazamuka.

Abakinnyi mbere yo guhaguruka bahatana mu gace ka mbere ka Tour du Rwanda 2018
Tour du Rwanda 2018 yitabiriwe n'abakinnyi 79

Icyizere ku bakinnyi bari gukinira mu mihanda basanzwe bitorezamo

-  Ukiniwabo René Jean Paul ukinira Les Amis Sportif y’i Rwamagana aho Tour du Rwanda 2018 yatangiriye, aganira na IGIHE yavuze ko ari amahirwe yo kwigaragaza imbere y’abafana babo no mu mihanda basanzwe bitorezamo.

Yagize ati "Ubu tugiye gukinira mu rugo niko navuga. Urebye ikipe yacu imeze neza n’ubwo twagize ikibazo muzi tukabura umutoza wacu [witabye Imana mu byumweru bibiri bishize] ariko yari yaramaze kudutegura, turashaka kumwereka ko atakoreye ubusa."

11:30: Abakinnyi bazengurutse inshuro ya mbere ku ntera ya kilometero 6.5 muri 15 bari bukore.

Uwizeyimana Bonaventure ukinira Benediction Club y'i Rubavu asinya
Nsengimana Jean Bosco wa Benediction Club y'i Rubavu yiyandika
Mbere yo gusiganwa, abakinnyi babanza kwiyandikisha
Abakinnyi b’amagare bakoresha inkweto zihariye

-  Umufaransa David Lappartient uyobora Ishyirahamwe ry’Umukino w’Amagare ku Isi na Perezida wa Ferwacy, Bayingana Aimable ni bo batangije isiganwa.

11:20: Tour du Rwanda ku nshuro ya 10 itangirijwe ku mugaragaro mu Karere ka Rwamagana. Yatangijwe hafatwa umunota wo kwibuka Rugambwa Jean Baptiste wari Perezida wa Les Amis Sportifs y’i Rwamagana, anayibereye umutoza, witabye Imana azize impanuka ku wa 22 Nyakanga 2018.

-  Rugg Timothy, Umunyamerika wigaragaje muri Tour du Rwanda 2016 akinira ikipe ya Lowestrate.Ca yo muri Canada akegukana agace ka mbere (Prologue) ndetse n’akandi kavaga i Karongi kerekeza i Rusizi ariko agasigara mu mitwe ya benshi kubera uburyo yakubitaga icupa rya Champagne ku munwa nta gukuraho, yongeye kwitabira iri siganwa uyu mwaka ari kumwe n’Ikipe ya Embrace The World yo mu Budage.

Aganira na IGIHE mbere yo guhaguruka mu Gace ka Mbere ka Tour du Rwanda 2018, yagize ati "Ndishimye kugaruka muri Tour du Rwanda. Gusa ndababaye kuba uyu munsi nta prologue ihari, kuko nari kubatsinda. Iri siganwa rirakomeye, harimo abakinnyi benshi bashobora gutsinda by’umwihariko Abanyarwanda nka Mugisha Samuel, Ndayisenga na Nsengimana bagiye begukana iri siganwa, ni benshi bakomeye."

Rugg yakomeje avuga ko uyu mwaka afite ikipe ikomeye ariko we atameze neza cyane nka 2016 bityo icyo yiteze akaba ari ugufasha ikipe ye byashoboka akazanegukanamo uduce nka tubiri bikaba byaba bihagije.

Soma hano inkuru Ruggy yegukana agace kavaga Karongi kagana Rusizi mu 2016: Tour du Rwanda: Rugg Timothy yegukanye agace ka Karongi-Rusizi, Ndayisenga aracyayoboye

Abafana b’igare i Rwamagana ni benshi ...
Umutekano wo mu muhanda muri Tour du Rwanda urizewe kuko Polisi y’Igihugu izajyana na yo mu bice byose izanyuramo
Mugisha Samuel yitabwaho na muganga we mbere yo guhaguruka
Munyaneza Didier uzwi nka Kylian Mbappé ari mu bakinnyi bitezwe muri iyi Tour du Rwanda
Mugisha Samuel usanzwe ukinira Dimension Data for Qhubeka yo muri Afurika y’Epfo ari kumwe na Team Rwanda

11:00: Abakinnyi bose bari kwishyushya, banakorerwa massage mbere yo guhaguruka mu gihe abandi bakiri gusinya. Buri nshuro imwe muri 16 bazenguruka mu Mujyi wa Rwamagana ingana n’ibilometero 6.5.

10:50: Abakinnyi batangiye kugera aho bahagurukira kuri Rond Point ya Rwamagana. Bakirijwe amashyi y’urufaya. Muri aka Gace ka Mbere ka Tour du Rwanda barazenguruka inshuro 15.

-  Habura iminsi ibiri ngo Tour du Rwanda itangire, Ikipe y’Igihugu ya Eritrea yatangaje ko itazitabira Tour du Rwanda, isimbuzwa SNH Velo Club yo muri Cameroun. Kuva mu 2009, Eritrea yegukanye uduce twinshi (19) kurusha ibindi bihugu.

Areruya Joseph ni we wegukanye Tour du Rwanda 2017. Aha yari akikijwe na Minisitiri wa Siporo n'Umuco, Uwacu Julienne n'Umuyobozi wa Ferwacy, Bayingana Aimable

- Umunyarwanda Areruya Joseph ukinira Delko Marseille Provence KTM yo mu Bufaransa, ni we wegukanye Tour du Rwanda mu mwaka ushize (icyo gihe yakiniraga Dimension Data for Qubeka yo muri Afurika y’Epfo). Ku gicamunsi cyo ku wa 19 Ugushyingo 2017, haririmbwaga Rwanda Nziza, ibyishimo ari byose ku Banyarwanda bari bateraniye kuri Stade Amahoro i Remera.

-  Imihanda ikikije aho isiganwa rigiye gutangirira yuzuyeho abafana benshi kuva ku bana bato kugeza ku basaza n’abakecuru b’imvi z’uruyenzi.

10:30: Mu Murenge wa Kigabiro muri Rwamagana ahagiye gutangirira Tour du Rwanda, abakunzi b’umukino w’amagare mu byiciro byose bahageze aho biteguye guha ijisho isiganwa rimaze kuba ubukombe mu Rwanda no hanze yarwo rya Tour du Rwanda.

Abana bato bagaragaza impano zitandukanye
Skol iri mu baterankunga bakuru b'isiganwa iri gufasha ab'i Rwamagana kuryoherwa n'umuziki w'abahanzi batandukanye
Tour du Rwanda ni umukino urebwa n'abafana benshi mu Rwanda
Rwamagana ni akarere gakungahaye ku buhinzi bw'urutoki
I Rwamagana biteguye kureba uko inkorokoro zinyonga igare mu gace ka Mbere ka Tour du Rwanda
Abakozi bo muri Cogebanque, umuterankunga w'imena wa Tour du Rwanda
Tour du Rwanda ni umukino wizihira abantu bo mu byiciro bitandukanye

Kanda hano urebe amafoto menshi

Ibyo wamenya ku Karere ka Rwamagana Tour du Rwanda yatangirijwemo

Rwamagana ni kamwe mu turere turindwi tugize Intara y’Uburasirazuba kakaba ari nako karimo icyicaro cyayo. Kagizwe n’imirenge 14, utugari 82 n’imidugudu 474. Gafite ubuso bungana na kilometero kare 682 n’abaturage 313,461, bari ku bucucike bwa 460 kuri kilometero kare imwe.

Akarere ka Rwamagana gakungahaye ku buhinzi bwinganjemo ubw’urutoki, ibigori, ikawa, imbuto, indabo n’ibindi.

Aka karere kazamukana imbaduko mu kwiyubaka kw’ibikorwa remezo, birimo inyubako zigeretse, imihanda ya kaburimbo, ibitaro, amashuri n’ibindi.

Gahunda yo guteza imbere ibikorerwa mu Rwanda (Made in Rwanda), ntiyasigaye inyuma kuko hari agakiriro kabarizwamo ibikoresho by’ubwubatsi n’ububaji, aha kandi hanafasha urubyiruko rwinshi kubona icyo rukora. Mu rwego rwo guteza imbere ishoramari, Rwamagana ifite igice cyahariwe inganda kirimo izikora ibyuma (fer à béton), urukora ibigega ibigega n’izindi.

Mu bijyanye na gahunda yo guteza imbere ubukerarugendo nk’imwe mu nkingi ubukungu bw’igihugu bwubakiyeho, akarere ka Rwamagana gafite ibiyaga bibiri bifite amahoteli na moteli zifasha abagasura kuruhuka, abashaka gukora inama n’ibindi.

Amafoto: Niyonzima Moïse

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza