Mugisha Samuel yegukanye Tour du Rwanda 2018 (Amafoto)

Yanditswe na Ishimwe Israel, Manzi Rema Jules
Kuya 12 Kanama 2018 saa 10:25
Yasuwe :
0 0

Mugisha Samuel ukinira Team Rwanda yegukanye isiganwa mpuzamahanga rizenguruka igihugu (Tour du Rwanda) ryasojwe kuri uyu wa 12 Kanama 2018.

Mugisha w’imyaka 20 yafashe umwenda w’umuhondo nyuma yo kwegukana agace ka kabiri ka Tour du Rwanda ka Kigali-Huye ku ntera ya kilometero 120.5, arawugumana kugeza yegukanye irushanwa.

Uyu mukinnyi yegukanye Tour du Rwanda nyuma y’iminsi umunani we na bagenzi be bazenguruka mu bice bitandukanye by’igihugu ku ntera y’ibilometero 946.6.

Agace ka nyuma ka Tour du Rwanda kareshya n’ibilometero 82.2 kakinwe kuri iki Cyumweru, tariki ya 12 Kanama 2018. Umunya-Algeria Azzedine Lagab ukinira Groupement Sportif des Petroliers Algerie ni we wakegukanye akoresheje amasaha abiri, iminota itandatu n’amasegonda 20 (yanatwaye aka Mbere ka Tour du Rwanda 2018 kazengurutse mu Karere ka Rwamagana). Yakurikiwe n’abakinnyi batandatu banganya ibihe barimo Lozano David wa Team Novo Nordisk, Munyaneza Didier wa Team Rwanda, Mugisha Moïse ukinira Les Amis Sportifs.

Mugisha uvuka mu Karere ka Nyabihu yasoje ku mwanya wa munani inyuma y’uwa mbere amasegonda atandatu.

Mugisha yegukanye Tour du Rwanda akoresheje amasaha 24, iminota 26 n’amasegonda 53. Yakurikiwe na Uwizeye Jean Claude ukinira POC Côte de Lumière yo mu Bufaransa arusha amasegonda 21 na Hailemichael Mulu ukomoka muri Ethiopia yarushije umunota umwe n’amasegonda ane.

Mugisha usanzwe ukinira Ikipe ya Dimension Data yo muri Afurika y’Epfo yabaye Umunyarwanda wa Kane utwaye Tour du Rwanda nyuma ya Ndayisenga Valens (ufite ebyiri mu 2014 na 2016), Nsengimana Jean Bosco (2015) na Areruya Joseph (2017).

-  Amafoto y’abakinnyi bitwaye neza bahembwa

Abanyarwanda bamaze kwegukana Tour du Rwanda eshanu kuva iri rushanwa ryaba mpuzamahanga mu 2009
Azzedine Lagab yegukanye agace ka munani ka Tour du Rwanda kuva kuri Stade Amahoro kugera kuri Stade ya Kigali i Nyamirambo
POC Côte de Lumière yo mu Bufaransa yahembwe nk'ikipe yitwaye neza
Abakinnyi ba Team Rwanda bari bafite akanyamuneza nyuma yo kwegukana Tour du Rwanda
Yashimye bagenzi be bakinana muri Team Rwanda bamubaye hafi kugeza asoje isiganwa

-  Ibyishimo bisendereye kuri Mugisha Samuel wegukanye Tour du Rwanda

Mugisha Samuel yashimiye Munyaneza Didier wamufashije kurinda umwenda w'umuhondo kugeza yegukanye Tour du Rwanda
Mugisha Samuel yegukanye Tour du Rwanda 2018
Mugisha Samuel yari afite akanyamuneza nyuma yo gusoza ku isonga
Mugisha yahise yifureba ibendera ry'igihugu

-  Abakinnyi 25 ba mbere muri Tour du Rwanda 2018

-  Uko abakinnyi 25 bakurikiranye mu gace ka munani ka Tour du Rwanda kazengurutse mu Mujyi wa Kigali.

-  Tour du Rwanda 2018 yatewe inkunga na MINISPOC, RDB, Skol, Cogebanque, RwandaAir, Rwanda Tea, Prime Insurance, SP, Inyange, RMC (Rwanda Motorcycle Company), Rwanda Foam Ltd, Ameki Color, Polisi y’Igihugu, Komite Olempike na Sebamed.

Cogebanque iri mu baterankunga b'imena ba Tour du Rwanda imaze iminsi umunani ikinwa

UKO ISIGANWA RYAGENZE:

Mugisha yasesekaye i Nyamirambo mu byishimo by'ikirenga
Uyu musore yavuze ko kuzamuka kwa Mutwe ari hamwe mu hantu hamugoye kurusha ahandi
Ibyishimo byari byose ubwo Mugisha yegukanaga iri siganwa riri mu ya mbere akomeye muri Afurika

-  MUGISHA SAMUEL YEGUKANYE TOUR DU RWANDA 2018

12:34: Azzedine Lagab yegukanye agace ka munani ka Tour du Rwanda kazengurutse mu Mujyi wa Kigali.

12:30: Kohl Roman wa POC Côte de Lumière yazamutse kwa Mutwe ari imbere. Yakurikiwe n’igikundi cy’abakinnyi benshi.

-  Umukinnyi wa mbere aragera imbere ya Stade ya Kigali saa 12:33. Abari imbere bageze mu muhanda uzamuka ku Kimisagara aho bagiye kuzamuka kwa Mutwe mbere yo gusoreza kuri Stade.

-  Amafoto y’abakinnyi bazamuka kwa Mutwe ahazwi nka “Mur de Kigali”

Mugisha Samuel azamuka kwa Mutwe
Ndayisenga Valens wa POC Côte de Lumière yo mu Bufaransa aterera mu mabuye yo kwa Mutwe, umwe mu mihanda igora abanyegare

12:13: Kamau Gichora Joseph wa Kenyan Riders Safaricom, Kohl Roman wa POC Côte de Lumière na Mugisha Moïse ukinira Les Amis Sportifs bari imbere. Abakinnyi 12 barimo Mugisha Samuel ufite umwambaro w’umuhondo babakurikiye. Batatu bari imbere babashyizemo ikinyuranyo cy‘amasegonda 19.

11:58: Abakinnyi basigaje ibilometero 20. Abagera kuri batandatu bari imbere aho basize igikundi amasegonda 53.

-  Amanota ya mbere ku bakinnyi bavuduka cyane (sprint) yegukanywe na Araujo Bruno; yakurikiwe na Favre Teylaz na Kohl Roman.

Mugisha Samuel ari kumwe n'igikundi
Ndayisenga Valens ayoboye igikundi kirimo abakinnyi benshi

11:26: Abakinnyi bari imbere basize igikundi ho umunota umwe n’amasegonda 30.

-  Abakinnyi basigaje ibilometero 58 ngo basesekare imbere ya Stade ya Kigali i Nyamirambo aho basoreza. Bari kuzenguruka inshuro ya gatatu aho abakinnyi bane bari imbere barimo Kohl Roman, Favre Teylaz, Dan na Araujo Bruno.

11:04: Abakinnyi bane bari imbere barimo Kimutai Andrew na Kamau Gichora Joseph ba Kenyan Riders Safaricom basize igikundi ho amasegonda 40.

10: 59: Kamau Gichora Joseph wa Kenyan Riders Safaricom aratatse ashaka gukurikira abari imbere.

-  Uyu munsi abasiganwa barazamuka kwa Mutwe inshuro ebyiri. Aka gace ni ko kagufi muri Tour du Rwanda 2018 ariko kari mu tugoye cyane.

10:49: Favre Teylaz Benjamin wa Haute Savoie na Claven Dan wa Team Embrace The World basize igikundi cy’abandi bakinnyi amasegonda 22.

10:41: Abakinnyi bageze Nyarutarama bakiri mu gikundi. Bari kuzenguruka ku nshuro ya mbere.

-  Bagiye kuzenguruka inshuro enye mu mihanda ya Stade Amahoro- Contrôle Technique- Kimironko- Kabuga ka Nyarutarama- MTN Center- RDB- Airtel Building-Stade Amahoro.

10:30: Agace ka nyuma ka Tour du Rwanda ari nako kagufi mu twakinwe mu minsi irindwi ishize katangiye. Uyu munsi abasiganwa 61 bazengurutse mu Mujyi wa Kigali ku ntera y’ibilometero 82.2.

10:20: Abakinnyi biteguye gutangira gusiganwa mu gace kamenyekaniramo uwegukana Tour du Rwanda iri gukinwa ku nshuro ya 10 kuva ibaye mpuzamahanga mu 2009.

Umutoza wa Team Rwanda, Sterling Magnell
Abakinnyi bishyushya mbere yo guhaguruka
Mugisha Samuel mu muhanda yishyushya mbere yo gukina agace ka nyuma ka Tour du Rwanda
Mugisha Samuel yari afite akanyamuneza

9:42: Abakinnyi bageze imbere ya Stade Amahoro aho bahagurukiye mu gace ka nyuma ka Tour du Rwanda 2018. Bari gukorerwa massage ndetse abakanishi bareba ko amagare yabo nta kibazo afite.

-  Uyu munsi Abanyarwanda bashobora kurara baririmbye Rwanda Nziza. Mugisha Samuel na Uwizeye Jean Claude bari mu bitezwe. Mu mwaka ushize ku wa 19 Ugushyingo 2017, Areruya Joseph nibwo yegukanye Tour du Rwanda.

Ikipe ya Les Amis Sportifs iterwa inkunga na Cogebanque


-  Umufana ushyigikiye Mugisha Moïse ukinira Les Amis Sportifs y’i Rwamagana. Iyi kipe iterwa inkunga na Banki y’Ubucuruzi ya Cogebanque.

Isiganwa mpuzamahanga rizenguruka u Rwanda ryari rimaze iminsi irindwi rijya mu turere dutandukanye, rirasozwa kuri iki Cyumweru abakinnyi bazenguruka mu Mujyi wa Kigali ku ntera y’ibilometero 82.2 ishobora kurangira haririmbwa ‘Rwanda Nziza’, Mugisha Samuel asangira ibyishimo n’igihugu cyose.

Tour du Rwanda 2018 yatangiriye mu Karere ka Rwamagana ku wa 5 Kanama 2018, ihaguruka i Kigali yerekeza i Huye ari naho Umunyarwanda Mugisha Samuel yambariye umwenda w’umuhondo, iva i Huye ijya i Musanze, ikomereza i Karongi ihava ijya i Rubavu isubira i Musanze mu Kinigi igaruka mu Mujyi wa Kigali kuri uyu wa Gatandatu, hose Mugisha akaba yari ari ku isonga.

Mu gace ka nyuma, abakinnyi 61 basigayemo muri 79 bari bitabiriye isiganwa, bazengurutse umuhanda wa Stade Amahoro- Contrôle Technique- Kimironko- Kabuga ka Nyarutarama- MTN Center- RDB- Airtel Building-Stade Amahoro bawunyuremo inshuro enye.

Nyuma bakomereje mu muhanda wa Contrôle Technique- Kimironko- Kibagabaga- kabuga Ka Nyarutarama- UTEXIRWA- Kinamba- Poids Lourd-Kwa Rasta- Kanogo- Cercle Sportif- Rwampara- kuri 40- Mumena- Tapis Rouge- Nyakabanda- Kwa Mutwe- Sky Hotel- Rondpoint yo mu Mujyi -Nyabugogo- Kimisagara- kwa Mutwe- kuri 40- Stade ya Kigali ari naho basoreza.

Ni agace gashobora gusigira Abanyarwanda bose ibyishimo mu gihe Kapiteni wa Team Rwanda, Mugisha Samuel yabasha kwitwara neza akagumishamo cyangwa akongera amasegonda 21 kugeza ubu urusha undi Munyarwanda Uwizeye Jean Claude ariko we ukinira ikipe ya Pays des Olonnes Cycliste Côte de Lumière (POCCL) yo mu Bufaransa naho Umunya-Ethiopia Hailemichael Mulu wa gatatu akaba amurusha 01:10" bigoye ko yakuramo.

Icyizere kuri Mugisha ushaka kwandika amateka

Nyuma yo kugumana umwenda w’umuhondo ku wa Gatandatu asoje ari uwa kane mu gace kavaga i Musanze kerekeza i Kigali, Mugisha yatangaje ko afite icyizere ko isiganwa rizarangira neza nubwo akazi gakenewe gukorwa mu gace ka nyuma gakomeye cyane.

Yagize ati “Gahunda twari twapanze n’ikipe yanjye zaciyemo gusa ntabwo ibintu byari byarangira, no ku munsi wa nyuma ni akazi gakomeye ariko turizera ko bizagenda neza. Intego yari ukutareka Uwizeye Jean Claude na Ndayisenga Valens ngo bagende kuko ni amakipe atandukanye kandi baranyegereye mu bihe.”

Yakomeje agira ati “Bagerageje kugenda tugeze i Shyorongi kandi haramanuka ngerageza kujyana na bo naho uriya Munya-Ethiopia [Mulu] kuko atazi kumanuka cyane nibwo yasigaye. Ku munsi wa nyuma nitubyuka tumeze neza wenda twanatsinda etape ariko byose tuzabireba. Icyo nasaba Abanyarwanda ni ugukomeza kudushyigikira ari benshi kuko dukeneye umusanzu wabo cyane.”

Mugisha nabasha kwegukana iri siganwa, bizaba ari ku nshuro ya gatanu yikurikiranya Abanyarwanda baryegukanye kuva ryaba mpuzamahanga mu 2009, akiyongera kuri Ndayisenga Valens urifite kabiri (2014 na 2016), Nsengimana Jean Bosco ufite irya 2015 na Areruya Joseph wegukanye irya 2017 gusa 2016 na 2017 bakaba bararitwaye bakinira Dimension Data yo muri Afurika y’Epfo.

Aho bitandukaniye na Mugisha Samuel nawe usanzwe akinira Dimension Data ni uko bitewe n’uko iyi kipe ititabiriye Tour du Rwanda, Ferwacy yamusabiye uruhushya rwo gukinira Ikipe y’Igihugu ‘Team Rwanda’ bivuze ko ubu abarwa nk’ukina imbere mu gihugu.

Intsinzi ya Mugisha, gusezera neza kuri 2.2

Mugisha aramutse agumanye umwenda w’umuhondo akegukana iri rushanwa rizenguruka Urw’imisozi 1000, byaba ari urwibutso rwiza kuko ari ku nshuro ya nyuma riri kuba riri ku rwego rwa 2.2 ku bipimo bya UCI (Ishyirahamwe ry’Umukino w’Amagare ku Isi), kuva umwaka utaha, rikazahita rizamurwa rikajya kuri 2.1 aho rizaba riri muri abiri ya mbere akomeye muri Afurika.

Kurizamura mu cyiciro bivuze ko n’ibihembo bihabwa abakinnyi bitwaye neza bizahita bizamuka, rikazajya ryitabirwa n’amakipe akomeye kurushaho.

Amafaranga abakinnyi bahembwa muri Tour du Rwanda:

Muri Tour du Rwanda umukinnyi wegukanye agace (etape) ahabwa amadolari ya Amerika 700 (angana n’ibihumbi 602Frw), uwa kabiri agahabwa 350$, uwa gatatu akabona 170$, uwa kane agahabwa 100$, uwa gatanu akabona 90$, uwa gatandatu n’uwa karindwi babona 60$, uwa cyenda n’uwa 10 babona 50$, uwa 11, 12 na 13 babona 40$, uwa 14, 14 na 16 bahabwa 30$, uwa 17, 18, 19 na 20 bagatahana 20$.

Umukinnyi wegukanye Tour du Rwanda, ahabwa 2000 $, uwa kabiri abona 1350$, uwa gatatu 900$, uwa kane 700$, uwa gatanu 500$, uwa gatandatu 450$, uwa karindwi 400$, uwa munani 350$, uwa cyenda 300$, uwa 10 abona 250$, uwa 11 ahabwa 200$, uwa 12 abona 150$, uwa 13 ahabwa 100$, uwa 14 atahana 80$, uwa 15 ahabwa 70$, uwa 16 ahabwa 60$, uwa 17 abona 50$, uwa 18 ahabwa 40$, uwa 19 ahabwa 30$ naho uwa 20 agatahana 20$.

Umukinnyi usoje Tour du Rwanda yambaye umwenda w’umukinnyi uzamuka kurusha abandi (Meilleur Grimpeur), umukinnyi mwiza mu bakiri bato (Meilleur Jeune), umukinnyi warushije abandi mu kunyonga (Meilleur Sprinteur), Umukinnyi mwiza mu Banyafurika (Meilleur Africain) n’umukinnyi mwiza mu Banyarwanda (Meilleur Rwandais) muri buri cyiciro ahabwa 300$, aba kabiri bakabona 150$ naho aba gatatu bakabona 50$.

Ikipe izasoza isiganwa ariyo ya mbere muri rusange izatahana 550$, iya kabiri 300$ naho iya gatatu ihabwe 100$. Muri rusange Tour du Rwanda izatanga ibihembo bingana n’amadolari 28 100 ya Leta Zunze Ubumwe za Amerika.

Abakinnyi 10 ba mbere ku rutonde rusange nyuma y’uduce turindwi:

1. MUGISHA Samuel wa Team Rwanda 22h20’27’’

2. UWIZEYE Jean Claude wa POC Cote de Lumière 22h20’48’’

3. HAILEMICHAEL Mulu wa Ethiopia 22h21’37’’

4. LAGAB Azzedine wa Groupement Sportif Des Petroliers 22h21’53’’

5. LOZANO RIBA David wa Team Novo Nordisk 22h22’00’’

6. NDAYISENGA Valens wa POC Cote de Lumière 22h22’43’’

7. TEMALEW Bereket Desalegn wa Ethiopia 22h23’17’’

8. DORING Jonas wa Team Descartes Romandie 22h23’53’’

9. MUNYANEZA Didier wa Team Rwanda 22h24’12’’

10. GOUDIN Valentin wa Haute Savoie Auvergne Rhône Alpe 22h25’31’’

Mbere yo guhaguruka abakinnyi bahabwa ifunguro ribafasha mu rugendo
Munyaneza Didier uzwi nka Mbappé ari mu bafashije Mugisha Samuel bakinana muri Team Rwanda

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza