Tour du Rwanda: Uguhangana kudasanzwe hagati ya Mugisha wambaye umuhondo na Ndayisenga Valens

Yanditswe na Manzi Rema Jules
Kuya 8 Kanama 2018 saa 06:13
Yasuwe :
1 0

Tour du Rwanda 2018 igeze hagati ndetse umwenda w’umuhondo uracyari mu bitugu by’Umunyarwanda Mugisha Samuel, ariko umwuka si mwiza hagati ye na Ndayisenga Valens ashinja gushaka kuwumwambura nyamara we yaramufashije kwegukana iri siganwa mu 2016.

Ubusanzwe mu mukino w’amagare nta wigira kabone n’iyo yaba umuhanga gute, bisaba ko afatanya na bagenzi be bagakora nk’ikipe cyane cyane mu kunaniza abo bahanganye kugira ngo intsinzi iboneke.

Abanyarwanda bakunze gufashanya muri Tour du Rwanda hatitawe ku ikipe buri mukinnyi yitabiriye irushanwa ahagararariye, kuko babikoze mu 2016 Ndayisenga Valens akinira Dimension data yo muri Afurika y’Epfo akaryegukana, n’umwaka ushize barabisubira bafasha Areruya Joseph wakiniraga Dimension Data.

Uyu mwaka Mugisha Samuel, kapiteni wa Team Rwanda, yambaye umwenda w’umuhondo ku munsi wa kabiri nyuma yo kwegukana agace kavaga i Kigali kajya i Huye, gusa yijujutiye ko umwe mu bakinnyi bakomeye muri uyu mukino, Valens Ndayisenga, ari kumusatira cyane aho kumufasha ngo atsinde iri rushanwa.

Mu gace ka Gatatu k’irushanwa kavaga i Huye kajya i Musanze kuri uyu wa Kabiri, Ndayisenga ukinira Equipe De POC Côte De Lumière yo mu Bufaransa, yamusatiriye cyane ashaka kujya gutsinda ndetse no kureba niba yamwambura umwenda w’umuhondo.

No kuri uyu wa Gatatu mu gace kavaga i Musanze kajya i Karongi byongeye kubaho bituma Mugisha agaragaza kutishimira uko mugenzi we ari kwitwara ndetse atangaza ko niba ashaka ko bahangana ariko bigiye kugenda.

Yabwiye itangazamakuru ati “Ntabwo urugendo rw’uyu munsi rwagenze neza kuko hajemo guhangana no kudashaka gufatanya. Ibyo byabaye umwaka ushize ntabwo byari bikwiye kongera kuba uyu mwaka. Ntabwo niyumvisha uburyo Valens [Ndayisenga] yashaka ko nsigara, uriya munya-Ethiopia ayitwaye ntabwo baririmba Rwanda Nziza, kuba akinira ikipe yo mu Bufaransa ntibivuze ko atari Umunyarwanda.”

Yakomeje agira ati “Sinzi impamvu yiyumvisha ko adashobora kumfasha kandi nawe izo yatwaye baramufashije, ntabwo watsinda uri wenyine.”

Mugisha yakomeje asobanura uko yahanganye na Ndayisenga ati “Yatakaga ngasigara njyenyine, abakinnyi banjye basigaye inyuma, urumva ko nta kindi nari gukora nahise nishyiramo ko atagomba kunsiga kuko n’abandi bari kugenda kandi ndabasiga amasegonda 21, byabaye akazi katoroshye ariko ndashima Imana yampaye imbaraga sinsigare.”

Mugisha avuga ko nyuma yo kubona uruhande Ndayisenga ariho nawe yiteguye kugira ngo bahangane kandi yizeye ko azafatanya na bagenzi be bakitwara neza.

Ndayisenga Valens we aganira n’abanyamakuru, yavuze ko yaje mu Rwanda aje gutsinda ndetse aramutse abonye uko yambara umwenda w’umuhondo nta kabuza yawambara, yongeraho ko ibyo akora byose ari ibyo aba yasabwe n’umutoza we.

Yagize ati “Ntabwo tubikora ngo duhangane na Mugisha ahubwo turakora dukurikije ibyo abatoza batubwiye. Mbonye umwenda w’umuhondo nawufata. Gahunda dufite [nka Equipe De POC Côte De Lumière] ni ukwegukana Tour du Rwanda. Niba abatoza bo bivugiye bati ntihagire umuntu wongera kureba ku Munyarwanda, icyo gihe wakora iki ? Biba bicanga umuntu. ”

Abajijwe niba abona bishoboka ko Mugisha yazagumana umwenda w’umuhondo kugera ku munsi wa nyuma, yagize ati “Mugisha ameze neza, yaritoje uko bamwataka kose ndabizi neza azitwara neza kandi umwenda w’umuhondo azawegukana ndamwizeye."

Kugeza ubu Mugisha aracyambaye umwenda w’umuhondo, asiga Uwizeye Jean Claude ukinana na Ndayisenga n’Umunya-Ethiopia Hailemichael Mulu amasegonda 0:21" akarusha Lozano RIBA David wa Team Novo Nordisk umunota 01’51’’, agasiga Doring Jonas wa Team Descartes Romandie iminota 02’10’’ naho Ndayisenga Valens wa gatandatu akamusiga iminota 02’13’’.

Tour du Rwanda izakoremereza i Rubavu mu gace kazahagurukira i Karongi kuri uyu wa Kane kareshya na kilometero 95,1 kuwa Gatanu hakazakinwa agace ka Rubavu-Kinigi kareshya 108,5 km, kuwa Gatandatu hakinwe agace ka Musanze- Kigali (imbere ya MIC) kareshya na 107,4 km naho ku Cyumweru risozwe hakinwa agace ka Kigali (Stade Amahoro)- Kigali (Nyamirambo) ka 82,2 km.

Mugisha w'imyaka 20 wambaye umwenda w'umuhondo nk'umukinnyi uri imbere mu irushanwa ahanzwe amaso n'Abanyarwanda
Valens Ndayisenga ni umwe mu bakinnyi b'abanyarwanda bakomeye mu magare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza