Tour du Rwanda: Umudage Hellmann yegukanye agace ka Huye-Musanze, Mugisha aracyayoboye (Amafoto na Video)

Yanditswe na Ishimwe Israel, Manzi Rema Jules
Kuya 7 Kanama 2018 saa 08:27
Yasuwe :
1 0

Umudage Julian Hellmann ukinira Team Embrace The World yegukanye agace ka gatatu ka Tour du Rwanda ka Huye-Musanze kareshya n’ibilometero 199.7, Umunyarwanda Mugisha Samuel uri muri Team Rwanda agumana umwenda w’umuhondo.

Hellmann yakoresheje amasaha atanu, iminota 11 n’amasegonda ane; yakurikiwe na Lozano Riba David ukinira Team Novo Nordisk na Beneke Calvin wa Afurika y’Epfo banganyije ibihe, abasize amasegonda umunani.

Umunyarwanda Ndayisenga Valens ukina mu Bufaransa ni we waje hafi ku mwanya wa gatanu, mu gihe Mugisha Samuel yasoje ku wa 13, inyuma y’uwa mbere ho umunota n’amasegonda 17.

Uyu munsi isiganwa ryatangiye ririmo abakinnyi 76, batandatu bavuyemo ntibarisoje. Aba barimo BERHE Geberemedhin wa Ethiopia, FOZING DASSIE Robert wa SNH Vélo Club, SOMCHIZA Siyabonga wa Sampada, ZOTHE Thando wa Team Sampada, CHRISTENSON David wa Marc Pro CT, CARVALHO Mario wa Bai - Sicasal - Petro de Luanda.

Mugisha aracyari ku isonga ku rutonde rusange aho amaze gukoresha amasaha 10 n’iminota 34, akurikiwe na Uwizeye Jean Claude na Hailemichael Mulu ukomoka muri Ethiopia arusha amasegonda 21. Tour du Rwanda irakomeza ku wa 8 Kanama 2018, hakinwa agace ka kane kazava Musanze kagana Karongi ku ntera y’ibilometero 135.8.

Amafoto yo gutanga ibihembo:

Umudage Julian Hellmann yahembwe na Skol nyuma yo kwegukana agace ka Huye-Musanze
Mugisha Samuel aracyari ku isonga ku rutonde rusange. Ni we wambaye umwenda w'umuhondo utangwa na Minisiteri ya Siporo n'Umuco
Mugisha ari ku isonga nyuma y'uduce dutatu twa Tour du Rwanda 2018 tumaze gukinwa
Hailemichael Mulu ukomoka muri Ethiopia yahembwe na Cogebanque nk'umukinnyi uzamuka cyane
Hadi Janvier ukinira Benediction Club y'i Rubavu yahembwe nk'umukinnyi witwaye neza mu kuvuduka ahatambika
Prime Insurance yahembye Mugisha Samuel nk'umukinnyi mwiza mu bakiri bato
Doring Jonas ukinira Team Descartes Romandie yahembwe na Rwanda Tea nk’umukinnyi wagaragaje guhangana kurusha abandi
Mugisha Samuel yahembwe nk'umukinnyi mwiza w'Umunyafurika
Mugisha yasoje ari umukinnyi wa mbere mu Banyarwanda
Nyampinga w'u Rwanda Iradukunda Liliane yishimiye kureba Tour du Rwanda ku nshuro ye ya mbere atari kuri televiziyo
POC Côte de Lumière ni yo kipe yahembwe na Inyange nk'iyitwaye neza

Video igaragaza uko abakinnyi bitwaye mu gace ka gatatu ka Tour du Rwanda:

-  Mu baterankunga ba Tour du Rwanda ku isonga hari Banki y’Ubucuruzi ya Cogebanque, Uruganda rwenga ibinyobwa rwa Skol, Ikigo cy’Igihugu cy’Iterambere (RDB), Sosiyete y’Ubwikorezi bw’ingendo zo mu kirere (RwandAir), Uruganda Nyarwanda rukora Moto ( RMC), Sebamed icuruza ibikoresho by’ubwiza n’abandi.

Umuyobozi w'Ishami rishinzwe Icyayi muri NAEB, Nkurunziza Issa n'abandi bakozi bitabiriye Tour du Rwanda
Cogebanque ni umuterankunga w'imena w'umukino w'amagare mu Rwanda
RDB ibinyujije muri "Tembera u Rwanda" yateye inkunga isiganwa rya Tour du Rwanda 2018
Umudage Julian Hellmann yatangarije IGIHE ko ashaka kwegukana uduce, ibya Tour du Rwanda ngo ntibirimo
Ikigo cy’Igihugu gishinzwe kohereza mu mahanga ibikomoka ku Buhinzi n’Ubworozi mu Rwanda (NAEB) cyashoye miliyoni 51 Frw mu kumenyekanisha icyayi cy’u Rwanda muri ‘Tour du Rwanda’
NAEB ibinyujije muri Tour du Rwanda ifite intego yo kugaragariza abantu benshi ubudasa bw’icyayi cy’u Rwanda no gutangaza iyo nkuru mu mahanga

Uko abakinnyi 10 ba mbere bakurikiranye mu gace ka Huye-Musanze:

1. HELLMANN Julian wa Team Embrace the World 05h11’04’’
2. LOZANO RIBA David wa Team Novo Nordisk 05h11’12’’
3. BENEKE Calvin wa South Africa 05h11’12’’
4. DORING Jonas wa Team Descartes Romandie 05h11’14’’
5. NDAYISENGA Valens wa POC Cote de Lumière 05h11’15’’
6. TEMALEW Bereket Desalegn wa Ethiopia 05h11’15’’
7. MUNYANEZA Didier wa Team Rwanda 05h12’03’’
8. GOUDIN Valentin wa Haute Savoie Auvergne Rhône 05h12’03’’
9. LE CLAIRE Bryan wa POC Cote de Lumière 05h12’08’’
10. LAGAB Azzedine wa Groupement Sportif Des Petroliers 05h12’15’’

Abakinnyi 20 bayoboye ku rutonde rusange nyuma y’uduce dutatu twa Tour du Rwanda 2018:

1. MUGISHA Samuel wa Team Rwanda 10h34’00’’
2. UWIZEYE Jean Claude wa POC Cote de Lumière 10h34’21’’
3. HAILEMICHAEL Mulu wa Ethiopia 10h34’21’’
4. LOZANO RIBA David wa Team Novo Nordisk 10h35’55’’
5. DORING Jonas wa Team Descartes Romandie 10h36’07’’
6. NDAYISENGA Valens wa POC Cote de Lumière 10h36’10’’
7. BENEKE Calvin wa South Africa 10h36’17’’
8. HELLMANN Julian wa Team Embrace the World 10h36’31’’
9. LAGAB Azzedine wa Groupement Sportif Des Petroliers 10h36’58’’
10. TEMALEW Bereket Desalegn wa Ethiopia 10h37’01’’
11. MUNYANEZA Didier wa Team Rwanda 10h37’06’’
12. GOUDIN Valentin wa Haute Savoie Auvergne Rhône Alpe 10h37’08’’
13. PERRISSIN FABERT Constantin wa Haute Savoie Auvergne Rhône Alpe 10h37’26’’
14. WELDEAREGAY Zeray wa Ethiopia 10h37’32’’
15. LE CLAIRE Bryan wa POC Cote de Lumière 10h37’35’’
16. JULIUS Jayde wa South Africa 10h41’04’’
17. MUGISHA Moïse wa Les Amis Sportifs 10h42’21’’
18. QUAEDVLIEG Lars wa Team Embrace the World 10h42’25’’
19. NSENGIMANA Jean Bosco wa Benediction Rubavu 10h42’25’’
20. BALASKOVIC Tom wa Haute Savoie Auvergne Rhône Alpe 10h44’22’’

Akanyamuneza kuri Miss Rwanda Iradukunda Liliane warebye Tour du Rwanda bwa mbere:

UKO ISIGANWA RYAGENZE:

Umudage Julian Hellmann ukinira Team Embrace The World yageze imbere y'isoko rya Musanze ari uwa mbere mu gace kahagurukiye muri Huye
Ifoto igaragaza ubwitabire bw'abafana ku mihanda y'i Musanze ahasorejwe isiganwa. Yafashwe na Muhizi Serge
Hellmann yakoresheje amasaha atanu, iminota 11 n’amasegonda ane ava i Huye agana Musanze
Mugisha Samuel aganira n'umunyamakuru wa Radio/Tv10 nyuma yo gusoza agace ka Huye-Musanze

13:50: Hellmann Julian ukinira Embrace The World Cycling ni we wegukanye aka gace ka gatatu ka Tour du Rwanda.

13:40: Abanyonzi batangiye gusatira Umujyi wa Musanze. Harabura ibilometero 10 kugira ngo bagere aho bari busoreze.

Abafana ku muhanda baba batera abakinnyi akanyabugabo

13:11: Kugeza ubu, abanyonzi Beneke Calvin, Rugg Timothy,Tom Balascovic na Nsengimana Bosco ni bo bari imbere mu gihe hasigaye ibilometero 40 ngo abasiganwa bagere i Musanze.

- Ibyiza bya Tour du Rwanda wabibonera mu mafoto

Ifoto y'ubuhanga yafashwe na Niyonzima Moses igaragaza abakinnyi bakata ikorosi mu misozi ya Ngororero

Morali y’i Sashwara ku Gicumbi cy’abakunzi b’amagare

Team Rwanda igizwe n'abakinnyi bakiri bato yeretswe urukundo
Ikipe ya Benediction n'umutoza wayo Sempoma Felix bashimiwe uko bazamuye umukino w'amagare mu Burengerazuba bw'u Rwanda
Mugisha yeretswe urukundo mu gace kanyuze aho yandikiye amateka mu mukino w'amagare

12:40: Imodoka z’abanyamakuru zigeze Sashwara. Hari abafana benshi bafite ibyapa byanditseho amagambo agaragaza ko bashyigikiye abakinnyi b’Abanyarwanda biganjemo abakomoka muri aka gace.

Mugisha Samuel yakinnye ari mu gikundi kugeza asoje. Umukinnyi ufite umwenda w'umuhondo aba ahanzwe ijisho

- Abakinnyi bakoresheje umuhanda wa Huye banyuze i Muhanga bambuka Nyabarongo binjira muri Ngororero.

Aka gace karimo ahazamuka kuva Mata ugana Ryakarimira. Amagare aranyura mu Myiha muri Nyabihu, ku Kabaya, akomereze Mukamira na Byangabo mbere yo kugera mu Mujyi wa Musanze imbere y’isoko.

Cogebanque imaze kuba ubukombe mu gutanga serivisi za banki mu gihugu hose. Aha ni mu Karere ka Muhanga

11:28: Abakinnyi batatu bakiyoboye abandi bageze mu Murenge wa Muhororo mu Karere ka Ngororero bagana i Musanze, aho irushanwa mu gace k’uyu munsi risorezwa.

Mu bakinnyi 76 batangiye isiganwa ry'uyu munsi, batandatu ntibarisoje

11:10 : Abakinnyi bambutse Nyabarongo binjira mu Karere ka Ngororero. Abari imbere ni Rugg Timothy, Döring Jonas na Munyaneza Didier, basize igikundi kibakurikiye 2:04’.

10:50: Abakinnyi barenze i Buringa, abari imbere ni Munyaneza Didier, Rugg Timothy na Jonas Döring.

10:00: Abakinnyi bari imbere basize igikundi kirimo Mugisha Samuel wa Team Rwanda na Ndayisenga Valens ho iminota itatu n’amasegonda 23.

9:55: Igikundi cy’abakinnyi bari imbere cyasize abandi iminota ibiri n’amasegonda 38. Abakinnyi bari gusatira mu Byimana mu Karere ka Ruhango.

-  Nsengimana Jean Bosco ukinira Benediction Club y’i Rubavu wegukanye Tour du Rwanda 2015 n’uyu mwaka uri mu bakomeye bitabiriye isiganwa, aganira na IGIHE mbere yo kuva i Huye bajya i Musanze, yavuze ko intego ya mbere afite ari ugufasha bagenzi be.

Yagize ati "Niteguye neza, uyu munsi ni ugufasha bagenzi banjye tugakomeza kugumana umwenda w’umuhondo. Mugisha uwambaye icyo asabwa ni ukutivangira mu mutwe cyangwa ngo ahangayike. Tumuri inyuma, urugero nkanjye ndi umukinnyi utapfa gukuraho ahantu hazamuka ndamufasha kandi na we muramuzi mu misozi, turizera ko uyu munsi awugumana."

Yakomeje agira ati "Mu nama twakoze, umutoza icyo yadusabye ni uko twaza gufata Umunyarwanda akajya kwataka kuko amasegonda ari hagati ya Mugisha n’Umunya Ethiopia Mulu ni make aramutse agize ikibazo byatugora, hagomba kuba hari undi Munyarwanda uri hafi wakambara uyu mwenda."

9:46: Abakinnyi binjiye mu Mujyi wa Ruhango bakiri mu gikundi aho bakirijwe amashyi y’urufaya n’abafana bahari. Bari kugendera ku muvuduko uri hejuru.

Mugisha Samuel ni we wahagurutse i Huye yambaye umwenda w'umuhondo

9:35: Ibihe byiyongereye, igikundi kirimo Mugisha Samuel w’imyaka 20 cyasizwe iminota itatu n’amasegonda 20.

9:25: Abasiganwa basigaje kugenda ibilometero 168. Basize igikundi kirimo Mugisha ho iminota ibiri n’amasegonda 51.

9:05 Abakinnyi bamaze kugenda ibilometero 20. Abagera kuri batanu bari basize igikundi basatiriwe n’abandi bari kugendera hamwe ari 23 imbere basize umunota umwe n’amasegonda 46 igikundi kirimo Mugisha Samuel ufite umwenda w’umuhondo.

Icyizere kuri Mugisha Samuel ufite umwambaro w’umuhondo

Nyuma yo kwegukana umwenda w’umuhondo ku wa Mbere, Mugisha yatangarije IGIHE ko yifitiye icyizere kandi azafatanya na bagenzi be kugira ngo bakomeze kuwurinda.

Yagize ati "Kwambara umwenda w’umuhondo siyo yari intego yanjye uyu munsi [ku wa Mbere] numvaga ngomba gukora cyane kugira ngo nkomeze kuba mu b’imbere ariko nabonye uwari uwambaye asa n’uwananiwe ndavuga nti birashoboka ndagenda."

Yongeyeho ati "Kuba nambaye umwenda w’umuhondo birumvikana hari uko ngomba gukina ariko nifitiye icyizere nzakinana na bagenzi banjye turebe uko twawurinda."

Mugisha yavuze ko agace ka Huye-Musanze kagoye cyane kuko ari karekare ariko bitewe n’uko kazamuka kandi asanzwe ari umuzamutsi ukomeye ndetse n’imyitozo akorera mu Butaliyani ikaba iba igoye, biri bumufashe kumenya uko agakina kandi yizeye kudatakaza ibihe bye mu gihe nta kindi kibazo yagira mu muhanda.

-  Uyu munsi haratangwa ibihembo ku bakinnyi bazi kuvuduka cyane (sprint) bageze imbere ya Gare ya Muhanga bamaze kugenda ibilometero 72.8, bongere kubarirwa muri Ngororero bagenze ibilometero 121.

8:50: Abakinnyi batatu barimo Hadi Janvier wa Benediction Club y’i Rubavu, Benjamin Favre n’Umuyamerika Rugg Timothy bacomotse mu gikundi bakiri mu Karere ka Huye. Basize igikundi ho amasegonda 36.

-  Twibukiranye abatwaye ibihembo mu gace ka kabiri ka Tour du Rwanda

Abakinnyi batwaye ibihembo mu gace ka kabiri ka Kigali-Huye kakinwe ku ntera ya kilometero 120.5

8:35: Abasiganwa basoje ibilometero 3.8 bava mu Mujyi. Batangiye kubarirwa ibihe bageze mu Murenge wa Mbazi mu Karere ka Huye.

8:30: Abakinnyi bose 76 bahagurutse mu Karere ka Huye. Abafana ni benshi ku mihanda yo mu Mujyi wa Huye.

Abakinnyi ba Marc Pro CT yo muri Amerika mbere yo gutangira agace ka Huye-Musanze

8:20: Abakinnyi batangiye guhamagarwa bitegura guhaguruka. Abafana bari ku mihanda y’i Huye aho biteguye kureba uko bayonga igare.

Abakinnyi ba Team Rwanda bishyushya mbere yo guhaguruka i Huye
Skol iri mu baterankunga bakuru ba Tour du Rwanda

7:30: Abakinnyi 76 batangiye kugera aho bahagurukira mu Karere ka Huye imbere ya Station SP.

Abafatanyabikorwa batandukanye bajyana na Tour du Rwanda hose

Huye - Musanze agace kanditse amateka muri Tour du Rwanda

Agace ka gatatu ka Tour du Rwanda 2018 kava i Huye kerekeza i Musanze ni ku nshuro ya mbere kabayeho muri iri siganwa by’umwihariko kakaba ari nako karekare gakinwe kuva mu 2009 ryagirwa mpuzamahanga.

Abasiganwa bakoze ibilometero 200 harimo 3,8 byo gutangira bitabazwe. Utundi duce tureture twari twarabayeho muri iri siganwa harimo ak’ibilometero 182.4 mu 2014 kavaga i Rubavu kajya i Nyanza ndetse n’ak’ibilometero 180.6 kavaga i Nyanza kajya Rubavu umwaka ushize.

Ibirori bya Tour du Rwanda 2018 mu gace ka gatatu byasorejwe i Musanze, Akarere karimo Ikigo cy’Umukino w’Amagare “Africa Rising Cycling Center” gicumbikira kikanitorezwamo Abanyarwanda bose bakina uyu mukino, aho abasiganwa basesekaye aribo bayoboye mu mwenda w’umuhondo ufitwe na Mugisha Samuel.

Ni agace ka gatatu k’iri siganwa rimaze kuba ubukombe ndetse umwaka utaha rizazamurwa mu byiciro rikajya muri abiri ya mbere akomeye muri Afurika. Abasiganwa bari mu makipe 16 akomoka ku migabane itandukanye y’Isi, bahagurutse i Huye saa 08:30” berekeza i Musanze aho uwa mbere yasesekaye saa 13:50”.

Mu bakinnyi 79 bari batangiye isiganwa ku munsi wa mbere, batatu barimo Behringer Olivier wa Team Novo Nordisk, Bissa Badoja ukinira SNH Velo Club na Jilowa Agoster wa Sampada basezeye ku munsi wa kabiri nyuma yo kunanirwa gusoza intera ya Kigali-Huye ireshya na kilometero 120,5 yakinwe ku wa 6 Kanama 2018.

2018, umwaka mwiza kuri Mugisha Samuel?

Ku myaka 20, Mugisha Samuel wavukiye mu Karere ka Nyabihu yegukanye agace (etape) ku nshuro ya mbere muri eshatu amaze gukina Tour du Rwanda ahita anambara umwenda w’umuhondo awambuye Umunya-Algeria w’imyaka 31, Lagab Azzedine ukinira Groupement Sportif des Petroliers Algerie.

N’ubwo Tour du Rwanda ikiri ku ntangiriro kuko hamaze gukinwa uduce tubiri mu munani tuyigize, Mugisha yerekanye ko afite ubushobozi bitewe n’ibihe bigera ku minota 3:04” asiga abandi barimo abakomeye bityo akaba agomba guhanga ijisho babiri barimo Umunyarwanda Jean Claude Uwizeye ukina mu Bufaransa n’Umunya Ethiopia Hailemichael Mulu asiga amasegonda 21.

Mugisha wamamaye cyane ndetse akigarurira imitima y’Abanyarwanda mu 2016 akina Tour du Rwanda ku nshuro ya mbere akegukanamo umwenda w’umukinnyi uzamuka kurusha abandi byanatumye umwaka ukurikiye abona ikipe y’ababigize umwuga ya Dimension Data yo muri Afurika y’Epfo yamufashije kumara igihe yitoreza i Burayi, kuri ubu niwe uhanzwe amaso.

Mu masiganwa atandukanye yakinnye kuva 2018 yatangira, yagiye yitwara neza harimo irya Tour du Val d’Aoste U23 yatwayemo igihembo cy’umukinnyi uzamuka cyane, Tour de l’Espoir U23 yegukanyemo agace akanafasha Areruya Joseph kuryegukana kimwe na Shampiyona ya Afurika mu gusiganwa mu muhanda yabereye mu Rwanda n’andi atandukanye.

Kuri ubu arasabwa ibirenze ibyo yakoze kuva yatangira umukino w’amagare, kurinda umwenda w’umuhondo iminsi itandatu, ibintu bikomeye cyane ariko bishoboka kuko n’umwaka ushize Areruya Joseph yawambariye i Huye ku munsi wa kabiri awurwanaho afashijwe na bagenzi be isiganwa rirangira akiwufite.

Mugisha wahawe uruhushya na Dimension Data kugira ngo akinire Team Rwanda aho anayibereye kapiteni, aramutse yegukanye iri siganwa yaba abaye Umunyarwanda wa kane ubikoze nyuma ya Ndayisenga Valens uyifite kabiri, Nsengimana Jean Bosco na Areruya Joseph baritwaye inshuro enye ziheruka.

Ese Mugisha ni umwana biragoye ko yarinda umwenda w’umuhondo?

Mu mukino w’amagare inararibonye rirafasha ariko siryo ryonyine, impano no kwigirira icyizere ni ingenzi. Ku myaka 21 iburaho iminsi mike kuko azayuzuza mu Ukuboza, Mugisha si umwana kuko mu 2014, Ndayisenga Valens yarwanye ku mwenda w’umuhondo afite imyaka 20 ndetse birangira yanditse amateka n’uyu munsi atarakorwa n’undi muntu yo kwegukana Tour du Rwanda ari muto.

Team Rwanda Mugisha ari gukinira igizwe n’abana bato bose bari munsi y’imyaka 21 ariko nk’uko bimaze kumenyerwa, iyo Umunyarwanda yambaye umwenda w’umuhondo biba ngombwa ko n’andi makipe yo mu Rwanda amufasha ahanini kubera ishema ry’igihugu. Bivuze ko nta kabuza, Les Amis Sportif na Benediction zirimo abakinnyi bakuru kandi bakomeye nazo zizi icyo gukora.

Amafoto: Niyonzima Moïse

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza