Abakinnyi batatu banditse amateka muri Shampiyona y’u Bwongereza iherutse gusozwa

Yanditswe na Eric Tony Ukurikiyimfura
Kuya 14 Gicurasi 2019 saa 01:56
Yasuwe :
0 0

Mu gihe shampiyona y’u Bwongereza, Premier League, yasojwe ku Cyumweru, igikombe kikegukanwa na Manchester City, abakinnyi batatu b’imbere batarimo abanyezamu ni bo babashije gukina imikino yose muri uyu mwaka w’imikino 2018/19 kandi badasimburwa.

Muri rusange abakinnyi 12 muri 501 ni bo bakinnye buri munota wa Premier League 2018/19, aho icyenda muri bo ari abanyezamu mu makipe yabo.

Myugariro wa Burnley, Ben Mee, uwa Wolves, Conor Coady na Luka Milivojevic wa Crystal Palace ni bo bakinnyi bakina mu kibuga imbere (batari abanyezamu) bakinnye buri munota muri Premier League muri uyu mwaka w’imikino.

1. Ben Mee

Uyu myugariro w’Umwongereza w’imyaka 29, yakinnye iminota yose (3420) muri Premier League mu ikipe ye ya Burnley, aho yafashije ikipe gutuma itamanuka mu cyiciro cya kabiri, isoza iri ku mwanya wa 15.

2. Conor Coady

Wolves ni yo kipe yitwaye neza ukuyemo ayaje mu myanya ine ya mbere, aho iyi kipe itozwa na Nuno Espírito Santo yasoje iri ku mwanya wa gatandatu. Myugariro wayo w’Umwongereza, Conor Coady w’imyaka 26, yakinnye buri munota muri Premier League y’uyu mwaka, harimo imikino ikipe ye yatsinzemo Chelsea, Manchester United, Arsenal na Tottenham.

3. Luka Milivojevic

Mu gihe ikipe ye ya Crystal Palace yasoje shampiyona iri ku mwanya wa 12, umukinnyi wayo wo hagati akaba na kapiteni, Luka Milivojevic ukomoka muri Serbie, yakinnye iminota yose ya shampiyona, atsindamo ibitego 12 ndetse atanga n’indi mipira ibiri yavuyemo ibitego kuri bagenzi be.

Uretse aba bakinnyi batatu, abanyezamu bakinnye iminota yose ya Premier League ni: David De Gea wa Manchester United, Alisson Becker wa Liverpool, Ederson Moraes wa Manchester City, Jordan Pickford wa Everton, Kasper Schmeichel wa Leicester City, Lukasz Fabianski wa West Ham United, Martin Dubravka wa Newcastle United, Neil Etheridge wa Cardiff City na Ben Forster wa Watford FC.

Conor Coady yagize umwaka mwiza wa Premier League hamwe na Wolves
Luka Milivojevic yatabaye kenshi ikipe ya Crystal Palace
Ben Mee ni umwe muri ba myugariro bahagaze neza muri Premier League
Umunyezamu wa Manchester City Ederson Moraes ni umwe mu bakinnye iminota yose
De Gea wa Manchester United ni umwe mu banyezamu icyenda batasimbuwe muri Premier League uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza