Amarozi, kugurisha imikino, kwirukanwa kw’abatoza mu mboni za Ruremesha wa Etincelles

Yanditswe na Manzi Rema Jules
Kuya 2 Kanama 2018 saa 12:17
Yasuwe :
0 0

Shampiyona y’u Rwanda ya 2017/2018 yagaragayemo byinshi birimo imyememerere y’amarozi igifite umwanya ukomeye mu makipe, iyirukanwa ry’abatoza ku rwego rwo hejuru ndetse n’amwe yagiye avugwaho kwitsindisha mu buryo bumwe cyangwa ubundi.

Ukwezi kurashize Shampiyona y’u Rwanda ya 2017/2018 yari imaze amezi icyenda amakipe 16 ahangana isojwe. Yegukanywe na APR FC nubwo kugeza ubu itarahabwa igikombe hakaba hatazwi n’igihe izagishyikirizwa ndetse n’igihe shampiyona itaha izatangirira bikaba bikirimo igihirahiro.

Mu kiganiro IGIHE yagiranye na Ruremesha Emmanuel, umutoza wa Etincelles FC wanayifashije gusoza ku mwanya wa kane muri shampiyona iheruka, yagarutse ku byaranze iri rushanwa muri rusange anahishura ibanga ryamufashije kwitwara neza n’ikipe ye.

1. Gukorera hamwe nk’ikipe, akabando kamusindagije umwaka wose

Uyu mutoza uhabwa amahirwe yo kuzatorwa nk’uw’umwaka, avuga ku mwaka we wa kabiri muri Etincelles FC yagize ati “Wari umwaka mwiza cyane, twageze kuri byinshi. Ntabwo biba byoroshye kurangiza imbere y’amakipe nka Kiyovu Sports, Police FC, Bugesera FC cyangwa Mukura VS.”

Yakomeje agira ati “Ikintu cyadufashije ni ugukorera hamwe, abakinnyi barumvikanaga cyane, abayobozi bakagerageza kubaha ibyo babemereye nubwo atari 100% ariko wabonaga ko bafite ubushake.”

2. Isomo rishya shampiyona yamwigishije

Ruremesha wagiye muri Etincelles FC mu 2016 ayisanze ku mwanya wa 12 akayifasha kurangiza ku wa karindwi mu 2016/2017 akongera kuyizamura ku wa Kane umwaka ushize, yavuze ko yasanze bishoboka ko n’amakipe yo mu Turere ashobora gutwara igikombe, ahubwo azira kwivangira.

Yagize ati “Urebye uko twitwaye muri iyi shampiyona irangiye, byanyeretse ko burya n’igikombe bishoboka ku makipe y’uturere. Ubona ko nk’ikipe dufite turamutse twongeyemo abakinnyi batatu cyangwa bane, twahangana. Mwabonye uko amakipe nka Kirehe FC yagiye agora amakipe y’i Kigali, biriya byerekana ko no mu turere umupira uhari ahubwo habura gutegura neza.”

3. Kwirukanwa kw’abatoza

Mu batoza 16 batangiye shampiyona, batanu gusa barimo Eric Nshimiyimana wa AS Kigali, Cassa Mbungo Andre wa Kiyovu Sports, Yves Rwasamanzi wa Marines FC, Francis Haringingo wa Mukura VS na Ruremesha muri Etincelles FC nibo babashije kurangiza umwaka batirukanywe cyangwa ngo basezere kubera impamvu zitandukanye.

Ruremesha yatangarije IGIHE ko kwirukanwa kw’abatoza byafashe indi ntera ariko asanga nabo hari uruhare babigiramo cyane cyane iyo biyemeza kuzagera ku mihigo runaka kandi babibona ko idashoboka.

Yagize ati “Ikintu navuga ni uko n’abatoza hari amakosa dukora. Iyo abayobozi bakubwiye bati turashaka ko uzatugeza mu myanya ine ya mbere cyangwa uzegukana igikombe ugahita ubyemera kandi ubona ko nta gahunda ihamye mwakoze yagufasha kubigeraho. Umuyobozi we nta kindi aba areba, iyo utageze ku ntego arakwirukana. Dukwiye kujya twemera ibyo tubona bishoboka.”

Yanavuze ko by’umwihariko shampiyona ishize yari ikomeye cyane ku buryo amwe mu makipe asanzwe afite amazina yagiye agorwa no kubona umusaruro, bigashyira igitutu ku bayobozi nabo umwanzuro ukaba kwirukana abatoza rimwe na rimwe badafite n’ababasimbura ahubwo ari ugushaka kwiyunga n’abafana.

4. Amarozi yaragabanutse muri shampiyona

Mu mwaka w’imikino wa 2016/2017 havuzwe ibibazo by’amarozi ku rwego rwo hejuru by’umwihariko ku mukino wahuje Rayon Sports FC na Mukuru VS i Huye wanatumye n’ibitangazamakuru mpuzamahanga bigaragaza ruhago mu Rwanda nk’iyamunzwe n’iyo myemerere idafututse.

Mu 2017/2018 nabwo hari imikino yagiye ivugwamo kuroga nk’uwo Rayon Sports yanganyijemo na Police FC igitego 1-1 wari watinze gutangira bitewe n’icupa rishyirwamo umunyu wo ku meza ryagaragaye mu kibuga, bikekwa ko ryazanywe na Munezero Fiston wa Police FC maze abakinnyi ba Rayon Sports babanza kwanga gukina.

Ruremesha avuga ko n’ubwo we atemera amarozi ariko abona mu mwaka ushize atarigeze avugwa cyane nka mbere bityo akaba ari kugenda agabanuka.

Yagize ati “Ku by’amarozi biragoye kubivuga kuko ntabwo uba uzi uko mu zindi kipe bimeze uretse kubibona mu binyamakuru cyangwa ukabona abantu bashwanye. Navuga ko byose biterwa n’uko shampiyona yari ikomeye noneho bakumva ko bakoresheje izindi mbaraga bakitwara neza.”

Yongeyeho ati “Gusa icyo kwishimira uyu mwaka ntabwo byagaragaye cyane nka mbere. Ubona ko abantu bariho bagenda bahindura imyemerere. Muribuka ibyabereye za Huye [ku mukino wa Mukura na Rayon Sports], ibyabereye hirya no hino abantu bagashaka no kurwana ariko ubona ko biri kugabanuka.”

5. Kugurisha imikino byari bigoye

Uyu mutoza umaze igihe kinini mu mupira w’amaguru mu Rwanda, abajiwe ku bijyanye no kugurisha imikino bikunze kuvugwa muri shampiyona, yavuze ko niba binabaho umwaka ushize byari bigoye kuko amakipe yari yegeranye cyane ku buryo ikosa rito ryari gushyira ikipe mu kaga.

Yagize ati “Navuga ko shampiyona yari yegeranye cyane ntabwo byari gukunda niba binabaho kuko amakipe y’imbere yashakaga igikombe, nta kosa yari gukora, amakipe y’inyuma byari bikomeyee kumenya izamanuka ku buryo yakoreshaga imbaraga nyinshi ngo atsinde natwe twari hagati twashakaga kuza mu myanya myiza.”

Iyi shampiyona yarangiye APR FC itari yatangiye umwaka neza iri kumwe na Jimmy Mulisa, yegukanye igikombe igihawe na Petrovic waje hagati, Rayon Sports nayo yaranzwe no guhindagura abatoza ibura n’umwanya wa kabiri wafashwe na AS Kigali mu gihe Gicumbi FC na Miroplast FC zamanutse zisimburwa na AS Muhanga na Intare FC.

Ruremesha Emmanuel yabaye umwe mu batoza beza b'umwaka ushize
Karekezi Olivier watozaga Rayon Sports ni umwe mu batoza benshi birukanwe hagati mu mwaka shampiyona itarangiye
APR FC yegukanye igikombe ariko ukwezi gushize itaragihabwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza