AS Kigali igiye kwirukana abakinnyi 12

Yanditswe na Manzi Rema Jules
Kuya 28 Nyakanga 2018 saa 11:11
Yasuwe :
1 0

Ikipe ya AS Kigali yari yashoye amafaranga menshi mu mwaka w’imikino ushize ariko ntibashe kwegukana igikombe na kimwe, igiye gukora impinduka isezerere abakinnyi 12 batatanze umusaruro igure abandi 12.

Mu ntangiriro z’umwaka ushize wa shampiyona, AS Kigali yari yagenewe ingengo y’imari ya miliyoni 300 z’amafaranga y’u Rwanda n’Umujyi wa Kigali, kugira ngo ibashe guhanganira igikombe cya shampiyona ariko ntiyabigeraho kuko yasoje ari iya kabiri inyuma ya APR FC, ndetse inasezererwa mu gikombe cy’Amahoro itarenze umutaru.

Mu kiganiro IGIHE yagiranye na Visi Perezida w’iyi kipe, Havuguziga Charles, yavuze ko mu nama bakoze yiga ku buryo umwaka ushize wagenze, basanze harabayeho gutera imbere kuko yashoboye kubona umwanya wa kabiri bitandukanye n’uwa kane yari yasojeho mu 2016-2017, bituma n’umutoza Eric Nshimiyimana ashobora guhabwa andi mahirwe.

Yagize ati “Umwaka ushize hari habayeho gutera imbere bigaragara ku buryo n’umutoza twumva twamuha undi mwaka. Kugeza ubu icyo twamusabye ni uko aduha abakinnyi yifuza ko twamuzanira ndetse n’abo twarekura batatanze umusaruro.”

Yakomeje agira ati “Ibyo twaganiriye ni uko yaduha igikombe umwaka utaha ubundi tugasohokera igihugu. Yaduhaye amazina y’abakinnyi 12 batatanze umusaruro tuzarekura bakajya gushakira ahandi, tukaba twifuza ko twakongeramo abandi nkabo baza kudufasha kugera ku ntego zacu.”

Havuguziga yavuze ko n’ubwo umwaka ushize iyi kipe yasohoye amafaranga asaga miliyoni 370 Frw, uyu mwaka noneho ashobora kwiyongera cyane biciye mu gushaka abafatanyabikorwa kuko uko ingengo y’imari izamuka ari nako amahirwe ku gikombe yiyongera.

Yagize ati “Icyo twifuza ni uko yakwiyongera. Hari abandi bafatanyabikorwa [biyongera ku Mujyi wa Kigali] turimo dushaka ndetse n’abagize ubuyobozi bakagira icyo batanga, turi mu biganiro. Ubundi ikipe uko ifite ubushobozi buhagije ni nako iba ifite ubushobozi bwo gutwara ibikombe. Turifuza nka miliyoni 500 Frw gutyo.”

Ku ikubitiro iyi kipe yamaze gusinyisha rutahizamu Elias Maguri ukomoka muri Tanzania amasezerano y’imyaka ibiri, akaba yari asanzwe akina Dhofar SC yo mu cyiciro cya kabiri muri Oman. Biravugwa ko iyi kipe yifuza bikomeye kapiteni wa Rayon Sports Kwizera Pierrot.

Umwaka ushize iyi kipe yari yaguze abakinnnyi benshi barimo; Nshuti Dominique Savio (Rayon Sports), Ngama Emmanuel (Mukura VS), Ishimwe Kevin (Pepiniere FC), Ngandu Omar (APR FC), Jimmy Mbaraga (Marines FC), Ndarusanze Jean Claude (Lydia Ludic Burundi Académic) na Frank Kalanda yakuye muri Vipers FC yo muri Uganda.

AS Kigali izirukana abakinnyi 12 igure abandi 12 bashya
Nshimiyimana Eric ashobora guhabwa andi mahirwe y'umwaak muri AS Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza