00:00:00 IGIHE NETWORK KN KINYARWANDA EN ENGLISH FR FRANCAIS

Gicumbi FC na Étoile de l’Est yari imaze imyaka 24 ibiharanira, zazamutse mu Cyiciro cya Mbere

Yanditswe na Eric Tony Ukurikiyimfura
Kuya 12 Ukwakira 2021 saa 04:57
Yasuwe :
0 0

Gicumbi FC yagarutse mu Cyiciro cya Mbere nyuma y’umwaka umwe nyuma yo gusezerera Heroes FC iyitsinze ibitego 2-1 mu mukino wo kwishyura wa 1/2 wabereye mu Majyaruguru kuri uyu wa Kabiri.

Ibitego bya Gicumbi FC byabonetse muri uyu mukino wo kwishyura, byinjijwe na Nsengayire Shadad ndetse na Dusenge Bertin mu minota 23 ibanza mu gihe Cyubahiro Constantin yatsindiye Heroes FC hagati yabyo byombi.

Gicumbi FC yari imaze umwaka umwe n’amezi ane kuva imanuwe biturutse ku gusoza imburagihe Shampiyona ya 2019/20 bitewe na COVID-19, yazamutse itsinze Heroes FC zari zamanukanye ku giteranyo cy’ibitego 3-1.

Yazamukanye na Étoile de l’Est yatsinze Amagaju FC kuri penaliti 6-5 nyuma yo kunganya igitego 1-1 nk’uko byari byagenze mu mukino ubanza.

Étoile de l’Est yari yakiriye umukino wo kwishyura i Ngoma, yari imaze imyaka 24 mu Cyiciro cya Kabiri mu gihe mu mwaka ushize wa 2020, yagarukiye muri 1/2.

Aya makipe yombi agiye gusimbura AS Muhanga na Sunrise FC yasoreje mu myanya ibiri ya nyuma muri Shampiyona ya 2020/21.

Ku wa Gatanu, tariki ya 15 Ukwakira 2021, ni bwo Gicumbi FC na Étoile de l’Est zizakina umukino wa nyuma mu gihe amakipe yatsinzwe azahatanira umwanya wa gatatu.

Shampiyona y’Icyiciro cya Mbere n’icya Kabiri mu mwaka w’imikino wa 2021/22, zombi zizatangira ku wa 30 Ukwakira 2021. Biteganyijwe ko ingengabihe izashyirwa ahagaragara ku wa Kane.

Amagaju FC agiye kongera gukina umwaka wa gatatu mu Cyiciro cya Kabiri nyuma y’uko yamanutse mu mwaka w’imikino wa 2018/19. Mu 2020, yasezerewe mbere y’uko irushanwa rito ryateguwe ritangira kuko yarwaje COVID-19 abakinnyi 11.

Gicumbi FC yazamutse mu Cyiciro cya Mbere nyuma y'umwaka umwe imanutse
Kera kabaye, Étoile de l'Est yazamutse mu Cyiciro cya Mbere nyuma y'imyaka 24 ibiharanira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .