Kagere Meddie yatowe nk’umukinnyi w’ukwezi muri Tanzania

Yanditswe na Eric Tony Ukurikiyimfura
Kuya 10 Nzeri 2019 saa 06:05
Yasuwe :
0 0

Rutahizamu w’ikipe y’igihugu y’u Rwanda ‘Amavubi’, Meddie Kagere ukinira Simba SC, yatowe nk’umukinnyi w’ukwezi gushize kwa ‘Kanama’ muri Shampiyona y’icyiciro cya mbere muri Tanzania ‘Vodacom Premier League’.

Kagere Meddie yari ahanganiye iki gihembo n’abarimo Lukas Kikoti wa Namungo FC na Seif Karihe wa Lipuli FC.

Gutsinda ibitego bibiri mu mukino ubanza wa Shampiyona ya Tanzania ubwo Simba SC yanyagiraga JKT ibitego 3-1 mu mpera z’ukwezi gushize, ni byo byamuhesheje kwegukana iki gihembo.

Muri uyu mukino, Kagere Meddie yafunguye amazamu ku munota wa 20, atsinda icya kabiri ku wa 59 mbere y’uko atanga umupira wavuyemo icya gatatu cyatsinzwe na Miraji Athumani ’Madenge’ ku wa 73.

Kagere yageze muri Simba SC avuye muri Gor Mahia yo muri Kenya mu mpeshyi y’umwaka ushize.

Mu mwaka we wa mbere, yatsindiye Simba SC ibitego 34 mu mikino yose yakinnye, atorwa nk’umukinnyi w’umwaka w’iyi kipe ndetse ahabwa igihembo cy’uwayitsindiye ibitego byinshi.

Simba SC ifite igikombe cya Shampiyona ya Tanzania, izagaruka mu kibuga ku munsi wa kabiri wa Shampiyona mu mukino izahuramo na Mtibwa Sugar tariki ya 18 Nzeri kuri Uwanja wa Uhuru mu Mujyi wa Dar es Salaam.

Kagere Meddie yatowe nk’umukinnyi w’ukwezi muri Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza