00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yanyuzwe n’intsinzi Arsenal yakuye kuri Tottenham

Yanditswe na IGIHE
Kuya 27 Nzeri 2021 saa 10:20
Yasuwe :
0 0

Perezida wa Repubulika, Paul Kagame usanzwe ari umufana ukomeye wa Arsenal yo mu Bwongereza, yishimiye intsinzi y’ibitego 3-1 iyi kipe yihebeye yabonye ku mukino wayihuje na Tottenham, wabereye kuri Emirates Stadium ku Cyumweru, tariki ya 26 Nzeri 2021.

Arsenal FC yari imbere y’abakunzi bayo yitwaye neza ibaha ibyishimo mu mukino yabonyemo intsinzi mu buryo buyoroheye imbere ya Tottenham itozwa na Nuno Espirito Santo.

Abakinnyi ba Arsenal itozwa na Arteta Mikel binjiye mu mukino hakiri kare kuko mu minota 45 ya mbere bari bamaze kwinjiza ibitego bitatu byatsinzwe na Emile Smith Rowe [12’], Pierre-Emerick Aubameyang [27’] na Bukayo Saka [34’]. Igitego rukumbi cya Tottenham cyatsinzwe na Son Heung-min [79’].

Nyuma y’intsinzi ya Arsenal, Perezida Kagame abinyujije ku rukuta rwe rwa Twitter, yagaragaje ko yanyuzwe n’uko ikipe yitwaye.

Yagize ati “Gushimira aho biri ngombwa. Mwakoze cyane Arsenal, umutoza, abakinnyi ndetse cyane abafana. Ibintu byose byagenze neza uyu munsi. Amahirwe masa kuri buri mukino. Birahebuje!"

Arsenal yatangiye shampiyona nabi itsindwa na Brentford ibitego 2-0, ndetse icyo gihe Perezida Kagame yagaragaje ko atishimiye gutsindwa n’iyi kipe yazamutse muri Premier League uyu mwaka wa 2021/22.

Icyo gihe yagize ati “Ibi ni ibiki? Ni umupira w’amaguru, ni ugutsindwa kwa Arsenal imbere ya Brentford. Brentford yari ikwiriye gutsinda kandi yabikoze. Umukino ubwawo Arsenal n’abafana ntibakwiye kumenyera ibi... Oya! Mvuze ibi nk’umwe mu bafana bakomeye ba Arsenal, hashize igihe kinini nta mpinduka."

Iyi kipe abakunzi bayo bita “The Gunners” yatsinzwe imikino itatu ibanza ndetse nta gitego yinjije, icyo gihe yari ku mwanya wa nyuma ku rutonde. Nyuma y’aho amakipe y’ibihugu avuye mu mikino mpuzamahanga, Arsenal yongeye kwitwara neza ndetse yatsinze imikino yayo itatu irimo uwa Norwich, Burnley na Tottenham.

Nyuma y’umukino w’Umunsi wa Gatandatu wa Premier League, Arsenal iri ku mwanya wa 10 n’amanota icyenda mu gihe Liverpool ya mbere ifite amanota 14.

Perezida Kagame ni umufana wa Arsenal kuva mu 1996, aho avuga ko ayikundira umukino mwiza ikina yatsinda cyangwa igatsindwa.

Arsenal ifitanye umubano n’u Rwanda kuko kuva muri Gicurasi 2018 Urwego rw’Igihugu rw’Iterambere (RDB) rwinjiye mu bufatanye bw’imyaka itatu n’iyi kipe ya Arsenal FC yo muri Premier League, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Iyi kipe iheruka kwegukana igikombe cya Premier League mu mwaka w’imikino wa 2003/04 mu gihe mu mwaka ushize yabaye iya munani ndetse byatumye idakina amarushanwa y’i Burayi mu mwaka w’imikino wa 2021/22.

Emile Smith Rowe ni we wafunguye amazamu ku ruhande rwa Arsenal, hari ku munota wa 12
Kapiteni wa Arsenal, Pierre-Emerick Aubameyang, yishimira igitego yatsinze
Bukayo Saka ni we watsindiye Arsenal igitego cya gatatu
Abakinnyi ba Tottenham ntibumvaga ibyababayeho nyuma yo gutsindwa n'umukeba wabo w'ibihe byose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .